ហក់ឡើងជាបន្តបន្ទាប់! ទឹកទន្លេមេគង្គនៅកំពង់ចាមកើនឡើងដល់១១,២៨ ម៉ែត្រ ស្របពេលភ្លៀងធ្លាក់ពាសពេញខេត្ត
- កំពង់ចាម
ខេត្តកំពង់ចាម ៖ ទឹកទន្លេមេគង្គខេត្តកំពង់ចាម បានបន្តហក់ឡើងថែមទៀត ដល់កម្ពស់ជាង១១ម៉ែត្រ ស្របពេលមានភ្លៀងធ្លាក់តិច ឬច្រើន នៅតាមបណ្តាក្រុង/ស្រុក ។ នេះបើយោងតាមផេកមន្ទីរព័ត៌មានខេត្តកំពង់ចាម បានប្រកាសនាព្រឹកថ្ងៃទី១១ ខែសីហានេះ ។
ទឹកទន្លេមេគង្គនៅខេត្តកំពង់ចាម បានបន្តហក់ឡើងថែមទៀត ដោយនៅថ្ងៃទី១១ ខែសីហា ឆ្នាំ២០២៦ កម្ពស់ទឹកបានកើនឡើងដល់កម្ពស់១១,២៨ម៉ែត្រ គឺកើនឡើង០,២០ម៉ែត្រ បើធៀបនឹងថ្ងៃម្សិលមិញ ។
ទោះជាយ៉ាងណា លោក អ៊ុម វិបុល ប្រធានមន្ទីរធនធានទឹក និងឧតុនិយមខេត្តកំពង់ចាម បានឱ្យដឹងថា កម្ពស់ទឹកទន្លេមេគង្គនៅពេលនេះ នៅទាបជាងកម្ពស់ទឹក កាលពីឆ្នាំ២០២៥ ដែលមានកម្ពស់១១,៦២ម៉ែត្រខណៈកម្ពស់ទឹកដែលត្រូវប្រកាសប្រុងប្រយ័ត្ននៅតំបន់នេះគឺ១៥,២០ម៉ែត្រ ។
ទន្ទឹមស្ថានភាពទឹកទន្លេមេគង្គបែបនេះ បានធ្វើឲ្យព្រែកចំនួន១៦ ក្នុង៤១ព្រែក បានទទួលរបបទឹកទន្លេមេគង្គ ដោយក្នុងនោះ ស្ថិតនៅស្រុកកងមាស ចំនួន៦/១៣ ស្រុកស្ទឹងត្រង់៥/៥ ស្រុកកំង់សៀម២/១១ ស្រុកស្រីសន្ធរ២/៧ និងស្រុកកោះសូទិនចំនួន១/៥។
ដោយឡែក ចំពោះស្ថានភាពអាកាសធាតុវិញ កាលពីម្សិលមិញនេះ គឺមានធ្លាក់នៅតាមបណ្តាក្រុង/ស្រុកចំនួន៨ ដោយភូមិ/ឃុំ ក្នុងស្រុក/ក្រុងមានភ្លៀងធ្លាក់តិច ឬច្រើនទៅតាមទីកន្លែងជាក់ស្តែង ៕
ចែករំលែកព័តមាននេះ