ឪពុកម្តាយកាន់រូបថតកូនប្តឹងស្វែងរក ក្រោយចេញពីផ្ទះនៅឯខេត្ត មកស្នាក់នៅការដ្ឋានសំណង់នៅភ្នំពេញ២ថ្ងៃ ស្រាប់តែបាត់ខ្លួន មិនដឹងមូលហេតុ
- ភ្នំពេញ
រាជធានីភ្នំពេញ៖ យុវជនម្នាក់ទើបតែចាកចេញពីផ្ទះនៅឯខេត្តសៀមរាបមកស្នាក់នៅក្នុងការដ្ឋានសំណង់ជាមួយឪពុកនៅរាជធានីភ្នំពេញបាន២ថ្ងៃប៉ុណ្ណោះ ក៏ស្រាប់តែបាត់ខ្លួនមិនដឹងមូលហេតុ ធ្វើឲ្យឪពុកម្ដាយមានការព្រួយបារម្ភយ៉ាងខ្លាំង និងបានតាមរកគ្រប់ទីកន្លែងប៉ុន្តែមិនឃើញសោះ ។ រហូតមកដល់វេលាម៉ោង១០និង៣០ទីព្រឹកថ្ងៃទី១១ ខែសីហា ឆ្នាំ២០២៦ ឪពុកម្ដាយយុវជនរូបនោះបានកាន់រូបថតកូនប្រុស ធ្វើដំណើរទៅកាន់ប៉ុស្តិ៍នគរបាលរដ្ឋបាលចោមចៅទី៣ នៃអធិការដ្ឋាននគរបាលខណ្ឌពោធិ៍សែនជ័យ រាជធានីភ្នំពេញ ដើម្បីសុំឲ្យនគរបាលជួយស្រាវជ្រាវរកកូនប្រុសរបស់គាត់រូបនោះផងដែរ ។
យុវជនដែលបាត់ខ្លួននោះឈ្មោះតេង មេសា អាយុ១៨ឆ្នាំ មានឪពុកឈ្មោះតេង ស៊ើប អាយុ៤៧ឆ្នាំ និងម្ដាយឈ្មោះជៀក អែម អាយុ៤១ឆ្នាំមានទីលំនៅភូមិគោកក្បាត់ ឃុំចាឈូក ស្រុកអង្គរជុំ ខេត្តសៀមរាប ។
បុរសជាឪពុកបាននិយាយថា គាត់បានមកស្នាក់នៅ ធ្វើជាជាងសំណង់នៅក្នុងការដ្ឋានសំណង់មួយកន្លែងនៅក្នុងភូមិជម្ពូវ័ន២ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ រីឯប្រពន្ធគាត់និងកូនប្រុសខាងលើមិនបានមកនៅជាមួយនោះទេ គឺពួកគាត់នៅផ្ទះឯខេត្តសៀមរាប ។ លុះដល់ថ្ងៃទី០៨ ខែសីហា ឆ្នាំ២០២៦ កូនប្រុសឈ្មោះតេង មសា បានធ្វើធ្វើដំណើរចាកចេញពីផ្ទះមកកាន់រាជធានីភ្នំពេញ ដើម្បីរកការងារសំណង់ធ្វើ ។ ដោយបានមកដល់កន្លែងដែលគាត់(ឪពុក)ស្នាក់នៅក្នុងការដ្ឋានសំណង់ កាលពីវេលាម៉ោង៩យប់ថ្ងៃដដែលនោះ ហើយក៏បានស្នាក់នៅក្នុងការដ្ឋានសំណង់នោះជាមួយគាត់ ។
ឪពុករូបនោះបាននិយាយបន្តទៀតថា ពេលនោះពុំទាន់រកកាងារបានធ្វើនៅឡើយទេ ស្រាប់តែនៅវេលាយប់ថ្ងៃទី០៩ ខែសីហា កូនប្រុសគាត់រូបនេះក៏បានបាត់ខ្លួនដោយគ្មានមូលហេតុ ពុំដឹងថាវង្វេងបាត់ ឬក៏មានបញ្ហាអ្វីកើតឡើងនោះឡើយ ។ ពេលបាត់ខ្លួននោះកូនគាត់មានតែខោអាវ១កំប្លេរជាប់ខ្លួនប៉ុណ្ណោះ គ្មានអ្វីផ្សេងទៀតនោះទេ ហើយគាត់ក៏បានតាមដើររកដែរ ប៉ុន្តែរកមិនឃើញសោះ រួចក៏បានខលទៅសួរប្រពន្ធនៅផ្ទះថា មានឃើញកូនទៅផ្ទះវិញទេ? ប្រពន្ធប្រាប់ថាអត់ឃើញទេ ។ ក្រោយពេលទទួលដំណឹងថាបាត់កូនបែបនេះ ប្រពន្ធគាត់ក៏បានធ្វើដំណើរចេញពីផ្ទះ មករាជធានីភ្នំពេញដើម្បីជួយរកកូនប្រុសដែរ ហើយរហូតមកដល់ពេលនេះមានរយៈពេល២ថ្ងៃហើយនៅតែរកកូនមិនឃើញដដែល ។
ប្ដីប្រពន្ធខាងលើបានអះអាងថា កូនប្រុសគាត់មានសតិស្មារតី និងកាយសម្បទារល្អជាធម្មតាទេ ហើយក៏មិនដែលមានស្នេហាជាមួយស្រីណា ដែលអាចឲ្យរូបគេរត់តាមស្រីនោះដែរ ។ ចំណែកការបាត់ខ្លួននេះមិនដឹងថាមានរឿងអ្វីទេ ពិតជាធ្វើឲ្យពួកគាត់មានការព្រួយបារម្ភខ្លាំងណាស់ ហើយដោយសារតែមិនដឹងថាត្រូវទៅរកកូននៅទីណាទៀតនោះ ទើបនោវេលាព្រឹកថ្ងៃទី១១ ខែសីហា ពួកគាត់ក៏បានធ្វើដំណើរទៅកាន់ប៉ុស្តិ៍នគរបាលរដ្ឋបាលចោមចៅទី៣ ដើម្បីសុំឲ្យនគរបាលជួយស្រាវជ្រាវរកកូនប្រុសរូបនោះផង ៕
ចែករំលែកព័តមាននេះ