ខេត្តកំពង់ចាម ៖ អង្គភាពប្រឆាំងអំពើពុករលួយបានប្រកាសនាមុននេះថា ៖ នៅមណ្ឌលវិ.ហស សំបួរមាស នាម៉ោង៧និង៣០នាទីព្រឹក ថ្ងៃទី១១ ខែសីហានេះ មានករណីសិស្សធ្លាក់ថ្នាក់ទី១១ ក្នុងឆ្នាំសិក្សា២០២៤-២០២៥ មិនមានឈ្មោះក្នុងបញ្ជីប្រឡង ឆ្នាំ២០២៦ ធ្វើជាចូលមកមណ្ឌលប្រឡង ដោយខ្លាចឪពុក-ម្តាយ ស្តីបន្ទោស ព្រោះឪពុក-ម្តាយ មិនដឹងថា កូនបានប្រឡងធ្លាក់ តាំងពីថ្នាក់ទី១១មក ។
អង្គភាពប្រឆាំងអំពើពុករលួយ បានបន្តថា សិស្សឈ្មោះ សឿន វិសា ជាសិស្សប្រឡងធ្លាក់ថ្នាក់ទី១១ ក្នុងឆ្នាំសិក្សា២០២៤-២០២៥ បានមកមណ្ឌលប្រឡង និងចូលក្នុងមណ្ឌលប្រឡង ព្រោះបានកុហកឪពុកម្តាយថា ខ្លួនមានឈ្មោះប្រឡងសញ្ញាបត្រមធ្យមសិក្សាទុតិយភូមិសម័យប្រឡង១០សីហា២០២៦ ។
ក្រោយពីពិនិត្យផ្ទៀងផ្ទាត់រួច គឺមិនមានឈ្មោះសិស្សនេះ ក្នុងបញ្ជីបេក្ខជនប្រឡងទេ ហើយគណៈមេប្រយោគទូទាំងប្រទេសប្រចាំខេត្ត ក្រុមការងារ អ.ប.ព. ប្រចាំខេត្ត និងភាគីពាក់ព័ន្ធបាន អញ្ជើញឳពុករបស់សិស្ស មកធ្វើការធានាអះអាង និងទទួលស្គាល់កូន ព្រមទាំងទទួលស្គាល់ថា កូនរបស់ខ្លួនពិតជាប្រឡងធ្លាក់ តាំងពីថ្នាក់ទី១១មកម្លេះ ហើយពិតជាមិនមានឈ្មោះក្នុងបញ្ជីឈ្មោះបេក្ខជនប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ១០ សីហា ២០២៦ និងមិនបានមកប្រឡងជំនួសអ្នកណានោះឡើយ ព្រមទាំងបាន ធ្វើកំណត់ហេតុ និងណែនាំសិស្ស សឿន វិសា មិនអោយប្រព្រឹត្តកំហុសបែបនេះបន្តទៀត ព្រមទាំងសន្យាកែខ្លួននៅចំពោះមុខគណៈកម្មាការទាំងអស់ ព្រមទាំងចំពោះមុខឪពុករបស់ខ្លួនផងដែរ៕
ចែករំលែកព័តមាននេះ