មន្ត្រីកសិកម្មខេត្តស្ទឹងត្រែង អំពាវនាវឱ្យកសិករប្រុងប្រយ័ត្នជំងឺ ម្យ៉ាងលើដំណាំពោត
- ស្ទឹងត្រែង
ខេត្តស្ទឹងត្រែង៖ មន្ត្រីជំនាញកសិកម្មខេត្តស្ទឹងត្រែងបាន អំពាវនាវ និងណែនាំដល់ប្រជាកសិករឱ្យបង្កើនការយល់ដឹងអំពីបច្ចេកទេសជ្រើសរើសពូជ និងការរៀបចំដីដាំដុះ ជាពិសេសការការពារជំងឺផ្សិតលើដំណាំពោត ដែលអាចរំខានដល់ការលូតលាស់ និងធ្វើឱ្យខូចខាតទិន្នផលនៅពេលពោតចាប់ផ្តើមចេញស្នៀត និងដាក់គ្រាប់។
ការណែនាំនេះបានធ្វើឡើងក្នុងឱកាសដែលមន្ត្រីជំនាញចុះពិនិត្យសកម្មភាពប្រមូលផលពោតរបស់ ប្រជា កសិករ ស្ថិតនៅភូមិកោះខនឌិន សង្កាត់សាមគ្គីក្រុងស្ទឹងត្រែង ខេត្តស្ទឹងត្រែង កាលពីពេលថ្មីកន្លងទនេះ ។
លោក ឆិល វិបុល ប្រធានការិយាល័យផ្សព្វផ្សាយកសិកម្ម នៃមន្ទីរកសិកម្ម រុក្ខាប្រមាញ់ និងនេសាទខេត្តស្ទឹងត្រែង បានគូសបញ្ជាក់ថានៅរដូវវស្សា ដំណាំពោតប្រឈមនឹងហានិភ័យខ្ពស់នៃជំងឺ និងសមាសភាពសត្វល្អិតជាងរដូវប្រាំង។ លោកបានបន្ថែមថា ក្រៅពីការរំខានដោយដង្កូវហ្វូងប្រភេទថ្មី ដំណាំពោតក៏ងាយ ប្រឈមខ្លាំងនឹងជំងឺផ្សិត Downy Mildew (ដែលកសិករ និយមហៅថា ជំងឺបួស ឬ ជំងឺឆ្កួតពោត)។ ដើម្បីទប់ស្កាត់បញ្ហានេះ កសិករត្រូវអនុវត្តតាមបច្ចេកទេសដែលធ្លាប់ទទួលបានការបណ្តុះបណ្តាល ចាប់តាំងពីការ ជ្រើសរើសដីចម្ការមិនឱ្យដក់ទឹក ការជ្រើសរើសគ្រាប់ពូជធន់ និងការថែទាំ។ ករណីផ្ទុះជំងឺផ្សិតនេះ កសិករត្រូវប្រញាប់ប្រញាល់ប្រើប្រាស់ថ្នាំកម្ចាត់ដែលមានធាតុសកម្ម មេតាឡាក់ស៊ីល (Metalaxyl) ឬថ្នាំព្យាបាលជំងឺផ្សិតដែលទទួលបានការណែនាំពីមន្ត្រីជំនាញ។
ទាក់ទិននឹងស្ថានភាពដាំដុះជាក់ស្តែង លោក ហេង ធន តំណាងកសិករដាំពោតនៅភូមិកោះខនឌិន បានអោយដឹងថា ឆ្នាំនេះរបបទឹកភ្លៀងមានភាពល្អប្រសើរចាប់តាំងពីខែមិថុនាមក ដែលអំណោយផលដល់ការលូតលាស់នៃដំណាំ។ ទោះជាយ៉ាងណា ការដាំដុះនៅតំបន់នេះនៅតែជួបប្រឈមនឹងកត្តាធម្មជាតិ ជាពិសេស ជំនន់ទឹកទន្លេមេគង្គដែលតែងតែកើនឡើងលឿន រហូតបង្ខំឱ្យកសិករត្រូវប្រមូលផលទាំងប្រញាប់ប្រញាល់។
លោកបានបន្តថា ដីចម្ការនៅតំបន់លិចទឹកមានអត្ថប្រយោជន៍ត្រង់ថាសម្បូរជីជាតិដីល្បាប់ធម្មជាតិ ធ្វើឱ្យកសិករមិនបាច់ចំណាយច្រើនលើការប្រើប្រាស់ជីគីមីនោះទេ ពោលគឺប្រើប្រាស់តែបន្តិចបន្តួចនៅកន្លែងណាដែលដីខ្សោយប៉ុណ្ណោះ។
ជាមួយគ្នានេះដែរ លោកស្រី ឈាវ គឹមស្រួ កសិករដាំពោតមួយរូបទៀត បានទទួលស្គាល់ថា មុខរបរកសិកម្មតែងតែមានការប្រែប្រួលទៅតាមធាតុអាកាស និងបច្ចេកទេស ប៉ុន្តែមូលហេតុដែលអ្នកភូមិសម្រេចចិត្តដាំពោតច្រើនគ្រួសារ ដោយសារដំណាំពោតមានទីផ្សារទូលំទូលាយ និងស្រួលលក់ជាងបន្លែបង្ការផ្សេងៗទៀត។
សូមបញ្ជាក់ថា នៅភូមិកោះខនឌិន សង្កាត់សាមគ្គី មានប្រជាកសិករប្រកបរបរដាំដុះពោតជាប្រចាំ ប្រមាណ ២០គ្រួសារ។ ក្រៅពីដំណាំពោត ពួកគាត់ក៏បានឆ្លៀតដាំដំណាំរួមផ្សំផ្សេងៗទៀតដូចជា ប៉ិគួក ត្រសក់ ឪឡឹក និងសណ្តែក ដើម្បីនាំយកទៅផ្គត់ផ្គង់នៅលើទីផ្សារក្នុងខេត្តស្ទឹងត្រែងជារៀងរាល់ថ្ងៃផងដែរ៕
ចែករំលែកព័តមាននេះ