ខេត្តសៀមរាប ៖ នាព្រឹកថ្ងៃទី១១ ខែសីហានេះ ដែលជាថ្ងៃទី២ នៃការប្រឡងបាក់ឌុប មានសេចក្តីរាយការណ៍អំពីបេក្ខជនចំនួន ២រូប ជួបប្រទះបញ្ហាសុខភាព ប៉ុន្តែនៅតែបន្តបង្ហាញស្មារតីតស៊ូយ៉ាងមុតមាំក្នុងការប្រឡង ។ នេះបើយោងតាមការបច្ចុប្បន្នភាពព័ត៌មានពីអង្គភាពប្រឆាំងអំពើពុករលួយ (ACU)។
ជាក់ស្តែងនៅមណ្ឌលវិទ្យាល័យ ១០មករា ជើង បន្ទាប់ពីបានតស៊ូប្រឡងបញ្ចប់ថ្ងៃទី១ កាលពីម្សិលមិញដោយជោគជ័យរួចមក បេក្ខជនដែលទើបតែឆ្លងកាត់ការវះកាត់ខ្នែងពោះវៀន (ប្រចាំបន្ទប់លេខ ០១ លេខតុ ១០) នៅតែបន្តបង្ហាញឆន្ទៈមុតមាំ ក្នុងការចូលរួមប្រឡងមុខវិជ្ជាអក្សរសាស្ត្រខ្មែរ នាព្រឹកថ្ងៃទី២ នេះ ។ ដោយមើលឃើញពីការខិតខំប្រឹងប្រែងនេះ គណៈមេប្រយោគទូទាំងប្រទេស អប្បមាទ និងប្រធានមណ្ឌល បានសម្របសម្រួល និងអនុញ្ញាតឱ្យប្អូនប្រុសអាចបន្តការប្រឡងនៅក្នុងបន្ទប់ពេទ្យបាន ដើម្បីធានាទាំងសុវត្ថិភាពសុខភាព និងលទ្ធផលនៃការសិក្សា ។
ចំណែកនៅមណ្ឌលអនុវិទ្យាល័យ ហ៊ុន សែន គ្រួស ឈានចូលដល់ថ្ងៃទី២នេះ ទោះបីជាស្ថានភាពជំងឺគ្រុនឈាមនៅមិនទាន់ធូរស្រាលយ៉ាងណាក្តី បេក្ខនារីប្រចាំបន្ទប់លេខ១៧ នៅតែបន្តរក្សាស្មារតីតស៊ូយ៉ាងមុតមាំ និងខិតខំពុះពារធ្វើវិញ្ញាសាជាបន្តទៀត ដោយមានការតាមដានមើលថែយ៉ាងយកចិត្តទុកដាក់ពីក្រុមគ្រូពេទ្យប្រចាំការដដែល។
សង្ឃឹមយ៉ាងមុតមាំថា ការលះបង់ និងការខិតខំប្រឹងប្រែងរបស់ប្អូនៗទាំងពីររូប នឹងនាំមកនូវលទ្ធផលដ៏ល្អប្រសើរជាទីគាប់ចិត្ត! សូមជូនពរប្អូនៗឆាប់ជាសះស្បើយ ៕
ចែករំលែកព័តមាននេះ