សុខភាព៖ យោងតាមការចុះផ្សាយពីប្រភពបរទេស ការដាំទឹកឱ្យពុះ គឺជាវិធីសាមញ្ញមួយដែលអាចជួយកាត់បន្ថយហានិភ័យពីមេរោគមួយចំនួនក្នុងទឹក។ ប៉ុន្តែការដាំទឹក និងរក្សាទុកមិនត្រឹមត្រូវ អាចបង្កបញ្ហាដែលមនុស្សជាច្រើនមិនបានយកចិត្តទុកដាក់។

ទី១ ដាំទឹកម្តងហើយម្តងទៀត

ការដាំទឹកឡើងវិញមិនមានន័យថា ទឹកនឹងកាន់តែស្អាតនោះទេ។ ការដាំទឹកអាចជួយកម្ចាត់បាក់តេរី វីរុស និងប៉ារ៉ាស៊ីតមួយចំនួន ប៉ុន្តែមិនអាចកម្ចាត់សារធាតុគីមី ឬលោហៈធ្ងន់ដែលមានក្នុងប្រភពទឹកបានទេ។ ប្រសិនបើទឹកត្រូវបានដាំជាច្រើនដង ហើយទឹកមួយផ្នែកហួតទៅ សារធាតុដែលមិនហួតអាចមានកំហាប់កើនឡើង។ ដូច្នេះ គួរដាំតែបរិមាណដែលត្រូវការប្រើប្រាស់។

ទី២ ប្រើកំសៀវទឹកយូរ ដោយមិនសម្អាត

ការប្រើកំសៀវទឹកជាប្រចាំដោយមិនសម្អាត អាចធ្វើឱ្យកកស្ទះជាតិរ៉ែ ដូចជា កាល់ស្យូម និងម៉ាញេស្យូម នៅបាត ឬជញ្ជាំងកំសៀវ ជាពិសេសប្រសិនបើប្រភពទឹកមានជាតិរឹងខ្ពស់។ គួរសម្អាតកំសៀវជាប្រចាំ និងយកចិត្តទុកដាក់លើគម្រប មាត់កំសៀវ និងបាតកំសៀវ ដើម្បីរក្សាអនាម័យ។

ទី៣ ទុកទឹកដែលបានដាំពុះយូរពេក

ការដាំទឹកអាចកម្ចាត់មេរោគជាច្រើន ប៉ុន្តែមិនមានន័យថាទឹកនឹងនៅតែគ្មានមេរោគជារៀងរហូតទេ។ ប្រសិនបើទឹកត្រូវបានទុកក្នុងធុងមិនស្អាត គ្មានគម្រប ឬប៉ះពាល់ជាមួយបរិយាកាស និងដៃជាញឹកញាប់ វាអាចមានហានិភ័យកខ្វក់ឡើងវិញ។

ដូច្នេះ បន្ទាប់ពីដាំទឹក គួររក្សាទុកក្នុងធុងស្អាត មានគម្របបិទជិត និងជៀសវាងការប៉ះពាល់ដោយផ្ទាល់ជាមួយបរិយាកាស។ ការដាំតែបរិមាណដែលត្រូវប្រើប្រាស់ និងសម្អាតឧបករណ៍ជាប្រចាំ គឺជាវិធីងាយស្រួលក្នុងការរក្សាគុណភាព និងអនាម័យទឹកផឹក៕