រាជធានីភ្នំពេញ ៖ កម្លាំងអធិការដ្ឋាននគរបាលខណ្ឌដង្កោ នៅវេលាព្រឹកថ្ងៃទី១០ ខែសីហា ឆ្នាំ២០២៦ បានបង្ហាញមុខជនសង្ស័យចំនួន៣នាក់ ពាក់ព័ន្ធទៅនឹងអំពើចោរកម្ម ចំនួន៣ករណីផ្សេងពីគ្នា ក្រោយពីការស្រាវជ្រាវ និងឃាត់ខ្លួនបាន ក្នុងរយៈពេលប៉ុន្មានថ្ងៃមកនេះ ។
នគរបាលខណ្ឌដង្កោ បានឲ្យដឹងថា ជនសង្ស័យទី១.ឈ្មោះ ថុ សិរីរតនា ភេទប្រុស អាយុ២៤ឆ្នាំ មុខរបរ បុគ្គលិកដឹកជញ្ជូន មានទីលំនៅភូមិ ព្រៃសលិច សង្កាត់ព្រៃស ខណ្ឌដង្កោ រាជធានីភ្នំពេញ ។
ជនសង្ស័យខាងលើបានធ្វើសកម្មភាពលួចម៉ូតូ១គ្រឿង ម៉ាកហុងដាឌ្រីមសេ១២៥ ពណ៍ខ្មៅ ពាក់ស្លាកលេខ តាកែវ1X-9761 កាលពីវេលាម៉ោង១០និង១៥នាទី ថ្ងៃទី៧ ខែសីហា ឆ្នាំ២០២៦ នៅចំណុចបុរីH ស្ថិតនៅតាមផ្លូវបេតុង ភូមិព្រៃសលិច សង្កាត់ព្រៃស ខណ្ឌដង្កោ ។ ម្ចាស់ម៉ូតូឈ្មោះ ម៉ូក សំភាស់ ភេទស្រី អាយុ២៧ឆ្នាំ មុខរបរលក់ដូរ មានទីលំនៅកន្លែងកើតហេតុខាងលើ ។
ជនសង្ស័យទី២. ឈ្មោះ ឡូយ បញ្ញា ភេទប្រុស អាយុ២០ឆ្នាំ មុខរបរកម្មករ ស្នាក់នៅភូមិកណ្តាល សង្កាត់រលួស ខណ្ឌដង្កោ រាជធានីភ្នំពេញ ។ ជននេះបានធ្វើសកម្មភាពលួចកាបូប១ដែលមានប្រាក់រៀល ចំនួន៣០០,០០០រៀល និងប្រាក់ដុល្លារចំនួន៤៦០ដុល្លារ ពីបុរសអ្នកលក់បន្លែម្នាក់ឈ្មោះ ឡេង សម្បត្តិ ។
ជនសង្ស័យទី៣. ឈ្មោះ អ៊ីង ហ្វីហាវ ភេទប្រុស អាយុ១៨ឆ្នាំ មុខរបរមិនពិតប្រាកដ មានទីលំនៅផ្ទះលេខG11 ផ្លូវបេតុង សំណង់ផ្ទះល្វែងកសិកម្ម ភូមិខ្វា សង្កាត់ដង្កោ ខណ្ឌដង្កោ ។ ជនសង្ស័យរូបនេះបានធ្វើសកម្មភាពលួចកាច់កញ្ចក់រថយន្តម៉ាកតូយ៉ូតាព្រូស១គ្រឿង យកបានកញ្ចក់មើលក្រោយ ទាំងសងខាង ។ ដោយឡែកម្ចាស់រថយន្តឈ្មោះ កុយ ពិសិដ្ឋ ភេទប្រុស អាយុ៣១ឆ្នាំ មុខរបរយោធា ។
ដោយឡែកនៅវេលាព្រឹកថ្ងៃទី១០ ខែសីហាដដែលនោះដែរ ក្រោយពីបញ្ចប់ការសាកសួរនិងកសាងសំណុំរឿងរួចមក កម្លាំងនគរបាល ខណ្ឌដង្កោ ក៏បានបញ្ជូនជនសង្ស័យទាំង៣នាក់នោះទៅកាន់សាលាដំបូងរាជធានីភ្នំពេញ ដើម្បីចាត់ការតាមច្បាប់ហើយ ៕
ចែករំលែកព័តមាននេះ