ខេត្តកណ្តាល ៖ កម្លាំងនគរបាល នៃអធិការដ្ឋានស្រុកអង្គស្នួល បានចុះទៅឃាត់ប្រមូលក្រុមក្មេងទំនើង២ក្រុម សរុប១៨នាក់ នាំយកទៅកាន់អធិការដ្ឋាននគរបាលស្រុក ដើម្បីដុសក្អែលចេញម្ដង ខណៈដែលយប់រំលងអធ្រាត្រទៅហើយ មិនគិតចូលផ្ទះដេកពួនទេ បែរជានាំគ្នាផឹកស៊ីពពាក់ពពូននៅតាមចិញ្ចើមផ្លូវសាធារណៈទៀត ។
ការឃាត់ខ្លួនក្មេងទំនើងខាងលើ បានធ្វើឡើងកាលពីវេលាម៉ោង២ និង៣០នាទីយប់រំលងអធ្រាត្រ ឈានចូលថ្ងៃទី៩ ខែសីហា ឆ្នាំ២០២៦ នៅលើផ្លូវបេតុង ស្ថិតនៅក្នុងភូមិព្រៃបឹង ឃុំបែកចាន ស្រុកអង្គស្នួល ខេត្តកណ្តាល ។
នគរបាលបានមិនបានប្រាប់ឲ្យដឹងអំពីអត្តសញ្ញាណក្មេងទំនើងទាំង២ក្រុមខាងលើនោះទេ ដោយគ្រាន់ប្រាប់ថា តាមរយៈការធ្វើតេស្តរកសារធាតុញៀន ពួកនោះគ្មានសារធាតុញៀនក្នុងទឹកនោមនោះទេ។ ពួកគេមានអាយុចន្លោះពី១៥ឆ្នាំដល់២៥ឆ្នាំ ហើយអ្នកខ្លះគឺជាសិស្ស និងខ្លះទៀតគឺជាកម្មករ។ ដោយឡែកការស្នាក់នៅវិញមួយចំនួនស្នាក់នៅក្នុងខណ្ឌកំបូល រាជធានីភ្នំពេញ មួយចំនួនស្នាក់នៅក្នុងស្រុកអង្គស្នួល ខេត្តកណ្ដាល និងមួយចំនួនទៀតស្នាក់នៅក្នុងស្រុកសំរោងទង ខេត្តកំពង់ស្ពឺ ។
នគរបាលបានប្រាប់ឲ្យដឹងបន្តទៀតថា នៅវេលាម៉ោងខាងលើ កម្លាំងផ្នែកអន្តរាគមន៍នៃអធិការដ្ឋាននគរបាលស្រុកអង្គស្នួល រួមជាមួយកម្លាំងប៉ុស្ដិ៍នគរបាលរដ្ឋបាលទាំង១០ បានចេញល្បាតទប់ស្កាត់បទល្មើសនៅក្នុងភូមិសាស្ដ្រស្រុកអង្គស្នូល ។ ពេលទៅដល់ត្រង់ចំណុចខាងលើ ក៏បានប្រទះឃើញក្រុមក្មេងទំនើងចំនួន២ក្រុមកំពុងជួបជុំគ្នាផឹកស៊ីនៅតាមចិញ្ចើមផ្លូវ ហើយកម្លាំងនគរបាលក៏បាននាំខ្លួនយកទៅអធិការដ្ឋាននគរបាលស្រុកអង្គស្នួលទាំងយប់តែម្ដង ។
នគរបាលបានប្រាប់បន្ថែមទៀតថានៅក្នុងពេលឃាត់ខ្លួនក្រុមក្មេងទំនើងទាំងនោះ កម្លាំងល្បាតបានធ្វើការដកហូតម៉ូតូចំនួន១២គ្រឿងផងដែរក្នុងនោះរួមមាន ម៉ូតូម៉ាកហុងដាឌ្រីមសេ១២៥ ចំនួន៧គ្រឿង ,ម៉ាកស៊ុយហ្ស៊យគីនិចចំនួន២គ្រឿង,ម៉ូតូម៉ាកហុងដាអេឌីវី ១គ្រឿង ,ម៉ូតូម៉ាកស៊ីប៊ី១៥០សេសេ១គ្រឿង និងម៉ូតូម៉ាកហុងដាស្កូបពី១គ្រឿង។ បន្ទាប់មកកម្លាំងនគរបាលបានធ្វើការសាកសួរ និងអប់រំ ព្រមទាំងដាក់ពិន័យឲ្យពួកក្មេងទំនើងទាំងនោះធ្វើអនាម័យរយៈពេល ៣៦ម៉ោងទៅ៤៨ម៉ោង រួចទើបហៅអាណាព្យាបាលឲ្យទៅធ្វើកិច្ចសន្យាធានាយកទៅផ្ទះវិញ ៕
ចែករំលែកព័តមាននេះ