រដ្ឋមន្រ្តីអប់រំ៖ ការប្រឡងបាក់ឌុបឆ្នាំនេះល្អជាងឆ្នាំមុន លទ្ធ ផលប្រឡងគ្រោងប្រកាសនៅថ្ងៃទី២ កញ្ញា
- ភ្នំពេញ
រាជធានីភ្នំពេញ ៖ ឯកឧត្តមឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ហង់ជួន ណារ៉ុន បានគូសបញ្ជាក់ថា ដំណើរការប្រឡងសញ្ញាបត្រមធ្យមសិក្សាទុតិយភូមិឆ្នាំ២០២៦នេះ ប្រព្រឹត្តិទៅបានល្អប្រសើរជាងឆ្នាំមុន ដោយសារឆ្នាំមុនទាំងបេក្ខជន បេក្ខនារី និងអគារមណ្ឌលប្រឡងមួយចំនួនទទួលរងផលប៉ះពាល់ ដោយសារការឈ្លានពានពីសំណាក់យោធាថៃ លើអធិបតេយ្យភាពកម្ពុជា ។
ការថ្លែងរបស់ឯកឧត្តម ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡាខាងលើនេះ ធ្វើឡើងនាឱកាសអញ្ជើញចូលរួមជាមួយឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ រួមទាំងឯកឧត្តម ឃួង ស្រេង អភិបាលរាជធានីភ្នំពេញ អញ្ជើញបើកប្រធានវិញ្ញាសាជានិមិត្តរូប ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ១០ សីហា ២០២៦ នៅមណ្ឌលប្រឡងវិទ្យាល័យព្រះស៊ីសុវត្ថិ នាព្រឹកថ្ងៃទី១០ ខែសីហា ឆ្នាំ២០២៦ ។
ឯកឧត្តម ហង់ជួន ណារ៉ុន បានថ្លែងថា ស្ថានភាពនៃការប្រឡងបាក់ឌុបឆ្នាំនេះ ល្អប្រសើរជាងឆ្នាំមុន ពោលទាំងសិស្សានុសិស្ស និងអគារសិក្សា បើទោះបីជាមានសាលារៀន២៥កន្លែង ដែលសិស្សមិនទាន់អាចត្រឡប់ទៅសិក្សាបាន ប៉ុន្តែរាជរដ្ឋាភិបាលកំពុងតែទាមទារ ខិតខំធ្វើយ៉ាងណាដើម្បីអាចឱ្យសាលាទាំងអស់ រួមទាំងសិស្សអាចត្រឡប់ទៅសាលាវិញបាន ។
សូមបញ្ជាក់ថា ប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំនេះ ប្រព្រឹត្តិទៅរយៈពេល២ថ្ងៃ ចាប់ពីថ្ងៃទី១០-១១ ខែសីហា ឆ្នាំ២០២៦ ដោយមានបេក្ខជនចុះឈ្មោះប្រឡងសរុប ១៥១ ២៣៨នាក់ ។ ដោយឡែកចំពោះទិដ្ឋភាព សន្តិសុខសណ្តាប់ធ្នាប់ ជុំវិញបរិវេណមណ្ឌលប្រឡងទាំងអស់ ត្រូវបានរៀបចំយ៉ាងល្អប្រសើរ ដោយមានការចូលរួមពីអាជ្ញាធរមានសមត្ថកិច្ច ។
ឯកឧត្តមឧបនាយករដ្ឋមន្ត្រី បានថ្លែងប្រកាស ហាមមិនឱ្យយកប្រធានវិញ្ញាសាចេញពីបន្ទប់ប្រឡង ហើយមិនថតបង្ហោះឡើយ ដើម្បីធានាការជឿទុកចិត្ត និងមិនឱ្យមានភាពរញ៉េរញ៉ៃ។ វិញ្ញាសាប្រឡងសញ្ញាបត្រមធ្យមសិក្សាទុតិយភូមិទាំងអស់ ត្រូវបានជ្រើសរើស តាក់តែង រៀបចំ និងគ្រប់គ្រងដោយក្រសួងអប់រំ យុវជន និងកីឡា ។
វិញ្ញាសាប្រឡង ត្រូវបានកំណត់សម្រាប់ថ្នាក់វិទ្យាសាស្ត្រ និងសម្រាប់ថ្នាក់វិទ្យាសាស្ត្រសង្គម ។ ទម្រង់វិញ្ញាសា ត្រូវបានរៀបចំជាពីរ គឺទម្រង់វិញ្ញាសាចម្លងដាក់លើក្តារខៀន និងទម្រង់វិញ្ញាសាសន្លឹកក្រដាសចែកជូនបេក្ខជន ។ ការលើកឡើងរបស់ឯកឧត្តមឧបនាយករដ្ឋមន្ត្រី ហង់ជួន ណារ៉ុន នាឱកាសអញ្ជើញចូលរួមជាមួយឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ ឯកឧត្តម ឃួង ស្រេង អភិបាលរាជធានីភ្នំពេញ បើកប្រធានវិញ្ញាសាជានិមិត្តរូប ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ១០ សីហា ២០២៦ នៅមណ្ឌលប្រឡងវិទ្យាល័យព្រះស៊ីសុវត្ថិ នាព្រឹកថ្ងៃទី១០ ខែសីហា ឆ្នាំ២០២៦ ។
ចែករំលែកព័តមាននេះ