អន្តរជាតិ ៖ តម្លៃប្រេងឆៅពិភពលោកបានកើនឡើងនៅដើមសប្តាហ៍ថ្ងៃទី១០ ខែសីហា ឆ្នាំ២០២៦ ដោយសារភាពមិនប្រាកដប្រជានៅតែបន្តកើតមានជុំវិញការបើកច្រកសមុទ្រហ័រមូស (Hormuz) ឡើងវិញ ខណៈដែលប្រទេសអ៊ីរ៉ង់ថ្លែងថា សហរដ្ឋអាមេរិកត្រូវតែបំពេញលក្ខខណ្ឌមួយចំនួន ទោះបីជាអ៊ីរ៉ង់ខ្លួនឯង និងប្រទេសអូម៉ង់បានឈានចូលដល់ដំណាក់កាលចុងក្រោយនៃការព្រមព្រៀងគ្នាលើផ្លូវនាវាចរណ៍មួយនេះក៏ដោយ។ នេះបើតាមប្រភពពីទីភ្នាក់ងារសារព័ត៌មាន Reuters បានចេញផ្សាយ។
តម្លៃប្រេងឆៅម៉ាក Brent ដែលជាស្តង់ដាពិភពលោក បានកើនឡើង ៨៤ សេន ឬ ១% ឡើងដល់ ៨៤,៣៩ ដុល្លារក្នុង១បារ៉ែល គិតត្រឹមម៉ោង ១១:២៥ ព្រឹក (ម៉ោងនៅកម្ពុជា) ខណៈតម្លៃប្រេងឆៅ West Texas Intermediate (WTI) របស់សហរដ្ឋអាមេរិក បានកើនឡើង ៦០ សេន ឬ ០,៧៥% ដល់ ៧៨,៧៧ ដុល្លារក្នុង១បារ៉ែល។
ការជួញដូរប្រេងទាំងពីរនេះ បានធ្លាក់ចុះជាង ៧% កាលពីសប្តាហ៍មុន ព្រោះក្តីសង្ឃឹមថា អ៊ីរ៉ង់ និងអូម៉ង់ជិតសម្រេចបានកិច្ចព្រមព្រៀងមួយ ដែលនឹងឈានទៅដល់ការបើកច្រកសមុទ្រហ័រមូសឡើងវិញ ដែលជាច្រកដឹកជញ្ជូនប្រេងមួយភាគប្រាំរបស់ពិភពលោកមុនពេលមានសង្គ្រាម។
ទោះបីជាអ៊ីរ៉ង់កាលពីថ្ងៃអាទិត្យ បានប្រកាសថា កិច្ចព្រមព្រៀងជាមួយអូម៉ង់ស្ថិតនៅក្នុង ដំណាក់កាលចុងក្រោយក៏ដោយ ក៏ទីក្រុងតេហេរ៉ង់បានសង្កត់ធ្ងន់ជាថ្មីថា ផ្លូវទឹកនេះនឹងបើកឡើងវិញលុះត្រាតែទីក្រុងវ៉ាស៊ីនតោនបំពេញលក្ខខណ្ឌផ្សេងទៀត រួមទាំងការដែលសហរដ្ឋអាមេរិកត្រូវផ្តល់សំណងសម្រាប់ការវាយប្រហារយ៉ាងខ្លាំងក្លាមកលើអ៊ីរ៉ង់។
រដ្ឋមន្ត្រីការបរទេសអ៊ីរ៉ង់ លោក Abbas Araqchi កាលពីថ្ងៃអាទិត្យបានថ្លែងថា អ៊ីរ៉ង់ និងសហរដ្ឋអាមេរិកមិនបានចូលរួមក្នុងកិច្ចចរចានោះទេ ហើយទីក្រុងតេហេរ៉ង់នឹងមិនចាប់ផ្តើមចរចាឡើយ ដរាបណាទីក្រុងវ៉ាស៊ីនតោននៅតែរំលោភលើកិច្ចព្រមព្រៀងបណ្តោះអាសន្ន ដែលបានចុះហត្ថលេខាកាលពីខែមិថុនា។
ទន្ទឹមនឹងនេះ នៅក្នុងការគំរាមកំហែងបន្ថែមទៀតដល់ការផ្គត់ផ្គង់ប្រេងនោះ ក្រុមហ៊ូធី (Houthis) ដែលមានសម្ព័ន្ធភាពជាមួយអ៊ីរ៉ង់ បានប្រកាសថាបានវាយប្រហារលើរោងចក្រចម្រាញ់ប្រេង Jazan របស់ក្រុមហ៊ុន Saudi Aramco របស់ប្រទេសអារ៉ាប៊ីសាអូឌីត កាលពីថ្ងៃអាទិត្យ។ ការវាយប្រហារនេះបានកើតឡើងពីរថ្ងៃ បន្ទាប់ពីព្រះរាជាណាចក្រមួយនេះ បានចុះហត្ថលេខាលើកិច្ចព្រមព្រៀងការពារជាតិជាមួយសម្ព័ន្ធមិត្តតួកគី និងប៉ាគីស្ថាន ដើម្បីឆ្លើយតបទៅនឹងអស្ថិរភាពក្នុងតំបន់ដែលកំពុងកើនឡើង ចេញពីសង្គ្រាមអាមេរិក-អ៊ីស្រាអែល ប្រឆាំងនឹងអ៊ីរ៉ង់។
ដោយឡែកពីគ្នានេះ ក្រុមហ៊ុនប្រេង ADNOC របស់ប្រទេសអេមីរ៉ាតអារ៉ាប់រួម កាលពីថ្ងៃសុក្រសប្តាហ៍មុនបានប្រកាសថា កប៉ាល់របស់ខ្លួនចំនួន ១៥ គ្រឿង ត្រូវបានវាយប្រហារពេលកំពុងធ្វើដំណើរឆ្លងកាត់ច្រកសមុទ្រហ័រមូស ចាប់តាំងពីការចាប់ផ្តើមនៃជម្លោះដ៏កក្រើកតំបន់មជ្ឈិមបូព៌ាមួយនេះ៕
ចែករំលែកព័តមាននេះ