ខេត្តសៀមរាប ៖ អង្គភាពប្រឆាំងអំពើពុករលួយបានប្រកាសនាព្រឹកថ្ងៃទី១០ ខែសីហានេះថា ៖ ការអនុវត្តបទប្បញ្ញត្តិប្រឡងត្រូវបានធ្វើឡើងយ៉ាងតឹងរ៉ឹង ។ អ.ប.ព. ធ្វើកំណត់ហេតុលើអនុគណៈកម្មការប្រឡង ៣រូប នៅខេត្តសៀមរាប ដោយសារពាក់ Smart Watch ។
អង្គភាពប្រឆាំងអំពើពុករលួយ បានបន្តថា ដំណើរការប្រឡងមួយព្រឹកថ្ងៃទី១០ ខែសីហា ឆ្នាំ២០២៦ នេះ គណៈមេប្រយោគទូទាំងប្រទេសប្រចាំខេត្តសៀមរាប និងក្រុមការងារសង្កេតការណ៍ អ.ប.ព. បានសម្រេចធ្វើកំណត់ហេតុពិសេស ករណីគណៈកម្មការប្រឡងចំនួន០៣រូប ពាក់នាឡិកាឆ្លាតវៃ (Smart Watch) ក្នុងពេលកំពុងដំណើរការប្រឡង ក្នុងនោះសមាជិកគណៈកម្មការកណ្ដាល២រូប នៅមណ្ឌលវិទ្យាល័យ ហ៊ុន សែន សៀមរាប និងសមាជិកគណៈកម្មការត្រួតពិនិត្យអគារ១រូប នៅមណ្ឌលវិទ្យាល័យហ៊ុនសែន វត្តស្វាយត្បូង ។
ការចាត់វិធានការភ្លាមៗ និងទាន់ពេលវេលានេះ បានស្តែងឱ្យឃើញយ៉ាងច្បាស់ពីការរឹតបន្តឹងការអនុវត្តច្បាប់ និងបទបញ្ជាផ្ទៃក្នុងនៃការប្រឡងដោយគ្មានការលើកលែងឡើយ ទោះបីជាបេក្ខជនប្រឡង ឬជាសមាជិកគណៈកម្មការប្រឡងក៏ដោយ ដើម្បីធានាឱ្យបាននូវភាពស្អាតស្អំ និងទំនុកចិត្តខ្ពស់ក្នុងដំណើរការប្រឡងទាំងមូល ៕
ចែករំលែកព័តមាននេះ