បេក្ខជនប្រឡងសញ្ញាបត្រទុតិយភូមិនៅខេត្តកំពង់ឆ្នាំង មានជាង ៥ពាន់នាក់ អវត្តមានជាង ៥០នាក់
- កំពង់ឆ្នាំង
ខេត្តកំពង់ឆ្នាំង បេក្ខជនប្រឡងសញ្ញាបត្រទុតិយភូមិថ្ងៃដំបូងត្រូវនឹងថ្ងៃទី 10 ខែសីហាឆ្នាំ 2026 នៅខេត្តកំពង់ឆ្នាំងមានបេក្ខជនជាង ៥ពាន់នាក់បានដាក់ពាក្យចូលប្រលង ក្នុងនោះស្រីជាង ២ពាន់ នាក់ ។នេះជាការបញ្ជាក់របស់មន្ទីរអប់រំយុវជននិងកីឡាខេត្តកំពង់ឆ្នាំង។
នៅក្នុងបើកវិញ្ញាសាប្រឡងនាព្រឹកនោះ គេឃើញវត្តមានលោកជំទាវ កែ ច័ន្ទមុនី អ្នកតំណាងរាស្ត្រមណ្ឌលកំពង់ឆ្នាំង ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង ឯកឧត្តម ប៊ូ ជុំសិរី អនុរដ្ឋលេខាធិការក្រសួងអប់រំយុវជននិងកីឡា ព្រមទាំង លោកគ្រូអ្នកគ្រូ មន្ត្រីអង្គភាពប្រឆាំងអំពើពុករលួយជាច្រើនរូបទៀត។
ឯកឧត្តមស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានជួបសំណេះសំណាលនិងផ្ដាំផ្ញើដល់បេក្ខជនដែលបានដាក់ពាក្យចូលប្រលងត្រូវខិតខំតាំងស្មារតីឲ្យបានដឹកនាំយកចំណេះដឹងដែលខ្លួនមាន មកបំពេញវិញ្ញាសាប្រឡងឲ្យបានត្រឹមត្រូវកុំតក់ស្លុត ប្រឹងឱ្យអស់សមត្ថភាព អ្វីសំខាន់ សំណួរណាដែលចេះធ្វើមុនទើបជាការប្រសើរ។ មិនត្រូវមានឯកសារ ឬឧបករណ៍អេឡិចត្រូនិច លាក់តាមខ្លួនចូលក្នុងបន្ទប់ប្រឡងឡើយ។ បើអនុរក្សចាប់បាននឹងត្រូវធ្លាក់ដោយស្វ័យប្រវត្តិ។ ត្រូវចាំថាបើចេះគឺជាប់ ។មួយវិញទៀតសូមថែរក្សាសុខភាពឱ្យបានល្អក្នុងពេលប្រឡង ចៀសវាងចំណីអាហារដែលនាំឲ្យឈឺពោះរាគរុសជាដើម។
ជាមួយគ្នានោះអភិបាលខេត្តកំពង់ឆ្នាំងក៏បានផ្ដាំផ្ញើដល់កងកម្លាំង ត្រូវពង្រឹងរក្សាសន្តិសុខសណ្ដាប់ធ្នាប់ជុំវិញមិនដល់ប្រឡងឲ្យបានល្អប្រសើរ ។
យោងតាមរបាយការណ៍របស់មន្ទីរអប់រំយុវជននិងកីឡាខេត្តកំពង់ឆ្នាំងបានបញ្ជាក់ថា បេក្ខជនបានដាក់ពាក្យប្រឡងសញ្ញាបត្រទុតិយៈភូមិឆ្នាំ 2026 នេះមានចំនួន 5053 នាក់ ក្នុងនោះស្រី 2,970 នាក់ ។មណ្ឌលប្រឡងមានចំនួន 8 មណ្ឌល ចែកចេញជា 203 បន្ទប់ ។
បេក្ខជនអវត្តមានមិនមកប្រលងមានចំនួនសរុប 54 នាក់ ស្រី 22 នាក់ ភាគច្រើនជាបេក្ខជនស្វាយរិននិងសាលាបំពេញវិជ្ជារៀបរយខេត្ត ៕
ចែករំលែកព័តមាននេះ