ប្រទេសយេម៉ែន ៖ ពួកឧទ្ទាមហ៊ូធីយេម៉ែនគាំទ្រដោយអ៉ីរ៉ង់ អះអាងកាលពីថ្ងៃទី៩ សីហា ពីការវាយប្រហារនានាប្រឆាំងបណ្ដាផលប្រយោជន៍របសអារ៉ាប៊ី សាអូឌីត ។ ទីតាំង២រងការវាយប្រហារដំបូង នៅអារ៉ាប៊ីសាអូឌីតក្នុងក្រុងJEZAN ភាគនិរតីប្រទេសនេះ ដែលជាការវាយប្រហារលើរោងចក្រចម្រាញ់ប្រេងកាតធំមួយរបស់ក្រុមហ៊ុនប្រេងយក្ស ARAMCO។ បន្ទាប់មក កំពង់ផែMOKHAនៅយេម៉ែន ស្ថិតនៅមាត់សមុទ្រក្រហមក៏រងការវាយប្រហារដោយដ្រូន និងមីស៊ីលបាលីស្ទិកដែរ ។
ការវាយប្រហារទាំងនេះ បង្ហាញពីការកើនឡើងថ្មីនៃជម្លោះនៅយេម៉ែន ។ បទឈប់បាញ់គ្នាដែលសម្រេចបានក្នុងការចរចា កាលពីឆ្នាំ២០២២ រវាងពួកហ៊ូធី និងកងកម្លាំងរដ្ឋាភិបាលយេម៉ែន ត្រូវរលាយកាលពីខែមុនបន្ទាប់ពីអារ៉ាប៊ីសាអូឌីតទម្លាក់គ្រាប់បែកលើព្រលានយន្តហោះរដ្ឋធានីសាណា ដើម្បីរារាំងយន្តហោះមួយគ្រឿងហោះមកពីអ៉ីរ៉ង់ចុះចត ដោយយន្តហោះនេះដឹកគណៈប្រតិភូរបស់ក្រុមហ៊ូធីមកពីចូលរួមក្នុងពិធីបុណ្យសព អតីតមេដឹកនាំកំពូលអ៉ីរ៉ង់លោកអាយ៉ាតុឡាអាលីខាមេនី។ ដូច្នេះហើយបានជាការប៉ះទង្គិចគ្នាកើតមានឡើងវិញ បណ្ដាលឲ្យមនុស្សស្លាប់ច្រើនសិបនាក់រួចមកហើយ។ ពេលនេះ ពួកហ៊ូធីគាំទ្រដោយអ៉ីរ៉ង់ គំរាមដោយផ្ទាល់វាយប្រហារបណ្ដាផលប្រយោជន៍របស់អារ៉ាប៊ីសាអូឌីត ។
យេម៉ែនពេលនេះ កំពុងតែរំកិលទៅរកសង្គ្រាមដោយទ្រង់ទ្រាយធំជាថ្មី ក្រោយសង្គ្រាមស្ងប់ស្ងាត់អស់ពេលជាង៧ឆ្នាំ ។ចាប់តាំងពីខែកក្កដាមកការប្រយុទ្ធគ្នាចាប់កើតមានឡើងវិញ ។ ពួកហ៊ូធីបានវាយប្រហារកងទ័ពរដ្ឋាភិបាល គាំទ្រដោយអារ៉ាប៊ីសាអូឌីតបណ្ដាលឲ្យស្លាប់ទាហានច្រើនសិបនាក់។ ការវាយប្រហាររបស់ពួកហ៊ូធីសំដៅលើបណ្ដាផលប្រយោជន៍យុទ្ធសាស្ត្ររបស់ក្រុងរីយ៉ាដ ហើយទាំងសងខាងវាយប្រហារតបតគ្នាវិញ ៕
ចែករំលែកព័តមាននេះ