កម្លាំងឧទ្យានុរក្សបង្ក្រាបទីតាំងសិប្បកម្មកែច្នៃឈើខុសច្បាប់ ៤ កន្លែងនៅខេត្តព្រះវិហារ និងដកហូតវត្ថុតាងជាច្រើន
- ព្រះវិហារ
ខេត្តព្រះវិហារ ៖ កម្លាំងមន្ត្រីឧទ្យានុរក្សនៃដែនជម្រកសត្វព្រៃឆែប-ព្រះរការ និងគូលែន-ព្រហ្មទេព សហការជាមួយអាជ្ញាធរពាក់ព័ន្ធ ដោយមានការសម្របសម្រួលនីតិវិធីពីព្រះរាជអាជ្ញាអមសាលាដំបូងខេត្តព្រះវិហារ បានចុះបង្ក្រាបទីតាំងសិប្បកម្មកែច្នៃឈើខុសច្បាប់ចំនួន ៤ កន្លែង ស្ថិតក្នុងឃុំពោធិ៍ ស្រុកត្បែងមានជ័យ កាលពីរសៀលថ្ងៃទី៨ ខែសីហា ឆ្នាំ២០២៦។
លទ្ធផលនៃប្រតិបត្តិការបង្ក្រាបមន្ត្រីជំនាញបានឱ្យដឹងថា ក្នុងចំណោមទីតាំងទាំង ៤ កន្លែង មានទីតាំងចំនួន ០១ កន្លែងកំពុងដំណើរការសកម្មភាពល្មើសយ៉ាងសកម្ម ខណៈ ០៣ ទីតាំងទៀតបានផ្អាកសកម្មភាព។ ជារួម កម្លាំងសមត្ថកិច្ចបានដកហូតវត្ថុតាងរួមមាន ឈើអារចម្រុះ (ជ្រៀករួច)៖ ចំនួន1,464ម៉ែត្រគូបត្រីគុណ .ឈើដើមច្រម៉ាសមូល (ប្រវែង ២ម, មុខកាត់ ១០-១៥សម) ចំនួន ២៤ ដុំ.គោយន្តកន្ត្រៃ ចំនួន ០២ គ្រឿង.ម៉ាស៊ីនជ្រៀកឈើ ចំនួន ០១ គ្រឿង .កង់យោងអូសផ្លែជ្រៀក និងជើងម៉ែត្រតាប ចំនួន ០១ កញ្ចប់។
បច្ចុប្បន្ន វត្ថុតាងទាំងអស់ត្រូវបានប្រមូល និងដឹកជញ្ជូនយកទៅរក្សាទុកជាបណ្តោះអាសន្ននៅ ស្នាក់ការអូរកក់» ដើម្បីរៀបចំសំណុំរឿងតាមនីតិវិធីច្បាប់ បញ្ជូនទៅកាន់តុលាការចាត់ការបន្ត។
ពាក់ព័ន្ធករណីខាងលើអាជ្ញាធរមានសមត្ថកិច្ចបានដាស់តឿន និងក្រើនរំលឹកយ៉ាងម៉ឺងម៉ាត់ដល់ជនខិលខូចទាំងឡាយ ដែលកំពុងប្រព្រឹត្ត ឬមានបំណងប្រព្រឹត្តបទល្មើសព្រៃឈើ ត្រូវបញ្ឈប់សកម្មភាពជាបន្ទាន់។
មន្ត្រី ជំបាញបានលើកឡើងថា៖ផ្អែកតាម ច្បាប់ស្តីពីព្រៃឈើ និង ច្បាប់ស្តីពីតំបន់ការពារធម្មជាតិ៖ការកាប់បំផ្លាញ ឬបង្កើតសិប្បកម្មកែច្នៃឈើដោយគ្មានការអនុញ្ញាត ត្រូវប្រឈមមុខនឹងទោសពន្ធនាគារពី ១ ឆ្នាំ ដល់ ៥ ឆ្នាំ (ឬរហូតដល់ ៥ ឆ្នាំ ដល់ ១០ ឆ្នាំ ចំពោះបទល្មើសធ្ងន់ធ្ងរ)។
ប្រឈមនឹងការពិន័យជាប្រាក់យ៉ាងធ្ងន់ធ្ងរ រួមទាំងការរឹបអូសរាល់សម្ភារ មធ្យោបាយធ្វើសកម្មភាព និងផល-ផលិតផលព្រៃឈើទាំងអស់ជាសម្បត្តិរដ្ឋ ដោយគ្មានការលើកលែង។
សមត្ថកិច្ច និងមន្ត្រីឧទ្យានុរក្សបានអះអាងថា នឹងបន្តចុះល្បាត ស្រាវជ្រាវ និងបង្ក្រាបរាល់បទល្មើសធនធានធម្មជាតិដោយស្មារតីទទួលខុសត្រូវខ្ពស់ និងគ្មានការយោគយល់ ដើម្បីការពារ និងអភិរក្សសម្បត្តិធម្មជាតិរបស់ជាតិឱ្យបានគង់វង្ស៕
ចែករំលែកព័តមាននេះ