សិស្សនិទ្ទេសA មួយរូប នៅខេត្តមណ្ឌលគិរី ជីវភាពខ្វះខាតខ្លាំងពុំមានលទ្ធភាពបន្តការសិក្សានៅមហាវិទ្យាល័យ ត្រូវបានសម្តេចតេជោជួយទំនុកបម្រុង
- មណ្ឌលគិរី
ខេត្តមណ្ឌលគិរី ៖ អាជ្ញាធរខេត្តមណ្ឌលគិរី បានចុះជួបសិស្សនិទ្ទេសAសម័យប្រឡងឆ្នាំ២០២៥ ដល់លំនៅឋាន នៅភូមិឡាប៉ាខេ ឃុំស្រែខ្ទុម ស្រុកកែវសីមា នារសៀលថ្ងៃទី៩ ខែសីហា ឆ្នាំ២០២៦ ក្រោយទទួលបានដំណឹងពីការខ្វះខាតជីវភាពខ្លាំង ដែលតម្រូវឲ្យនាងត្រូវខកខានការសិក្សាបន្តទៅមហាវិទ្យាល័យ ហើយមានបន្ទុកជួយធ្វើការរកប្រាក់ចិញ្ចឹមគ្រួសារជាមួយម្តាយ និងប្អូនប្រុសស្រីពីរនាក់ទៀតក្នុងបន្ទុក ខណៈឪពុកបានទៅរស់ធ្វើការឆ្ងាយពីផ្ទះ ។
ឯកឧត្តម គង់ គឹមនី អភិបាលខេត្តមណ្ឌលគិរី មានប្រសាសន៍ថា ក្រោយទទួលដំណឹងអំពីយុវតីឈ្មោះ វ៉ាន ឈុនលាង សិស្សនិទេស្ទAសម័យប្រឡងកាលពីឆ្នាំ២០២៥ ដែលកំពុងរស់នៅក្នុងជីវភាពលំបាក និងដោយមានការណែនាំដ៏ខ្ពង់ខ្ពស់ពីសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ឋសភានៃព្រះរាជាណាចក្រកម្ពុជា ឲ្យអាជ្ញាធរត្រូវអន្តរាគមន៍បន្ទាន់ ជួយសម្របសម្រួលដល់យុវតី ឈុនលាង បានរៀបចប់នូវជំនាញដែលក្មួយស្រីចង់រៀន ដោយទទួលបានការទំនុបបម្រុងទាំងស្រុងពីសម្តេច ដើម្បីឱ្យក្មួយស្រីអាចសម្រេចបានអនាគតល្អ និងក្លាយជាសសរទ្រូងរបស់ប្រទេសជាតិ។
ឯកឧត្តមមានប្រសាសន៍បន្តថា នេះគឺជាសក្ខីភាពមួយយ៉ាងច្បាស់ក្រឡែត ដែលស្តែងឱ្យឃើញពីស្តង់ដារនៃការយកចិត្តទុកដាក់ និងគុណបំណាច់ដ៏ធំធេងស្តែងចេញពីបេះដូងរបស់ថ្នាក់ដឹកនាំរាជរដ្ឋាភិបាល និងអាជ្ញាធរគ្រប់លំដាប់ថ្នាក់ ដែលជានិច្ចកាលតែងតែគិតគូពីសុខទុក្ខ និងជីវភាពរស់នៅរបស់បងប្អូនប្រជាពលរដ្ឋ ជាពិសេសគឺការផ្តល់ឱកាសស្មើៗគ្នាដល់ក្មួយៗសិស្សានុសិស្ស ដែលជាយុវជនបន្តវេន។ រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ព្រមទាំងមាគ៌ាចង្អុលបង្ហាញដ៏ខ្ពង់ខ្ពស់ពី សម្តេចតេជោ ហ៊ុន សែន មិនដែលបោះបង់ចោលក្មួយៗសិស្សពូកែ ដែលមានឆន្ទៈខ្ពស់ក្នុងការរៀនសូត្រ តែត្រូវជួបឧបសគ្គជីវភាពគ្រួសារខ្វះខាតនោះឡើយ។
ឯកឧត្តមបានគូសបញ្ជាក់បន្ថែមថា គោលនយោបាយអាទិភាពរបស់រាជរដ្ឋាភិបាល គឺការកសាង និងអភិវឌ្ឍន៍ធនធានមនុស្ស។ ដូច្នេះ រាល់សិស្សានុសិស្សទាំងអស់ដែលខិតខំប្រឹងប្រែងរៀនសូត្ររហូតទទួលបានលទ្ធផលល្អប្រសើរ តែងតែទទួលបាននូវការលើកទឹកចិត្ត និងការគាំទ្រផ្នែកអាហារូបករណ៍ ថវិកា ព្រមទាំងការសម្របសម្រួលគ្រប់បែបយ៉ាង ដើម្បីធានាថាគ្មានសិស្សពូកែណាម្នាក់ត្រូវបោះបង់ចោលការសិក្សាពាក់កណ្តាលទី ដោយសារតែបញ្ហាក្រក្សត់នោះឡើយ។ ការជួយជ្រោមជ្រែងនាពេលនេះ មិនត្រឹមតែជាការផ្លាស់ប្តូរវាសនារបស់យុវតី វ៉ាន ឈុនលាង និងគ្រួសារប៉ុណ្ណោះទេ ប៉ុន្តែថែមទាំងជាការបង្កើតនូវសង្ឃឹមថ្មី និងជាគំរូដ៏ល្អសម្រាប់យុវជនជំនាន់ក្រោយនៅក្នុងខេត្តមណ្ឌលគិរី ឱ្យខិតខំប្រឹងប្រែងសិក្សារៀនសូត្រដើម្បីអនាគតខ្លួនឯង គ្រួសារ និងសង្គមជាតិ។
នៅក្នុងឱកាសនោះដែរ យុវតី វ៉ាន ឈុនលាង ព្រមទាំងអាណាព្យាបាល និងក្រុមគ្រួសារ បានសម្តែងនូវក្តីរំភើបឥតឧបមា រហូតស្រក់ទឹកភ្នែក និងបានលំឱនកាយគោរពថ្លែងអំណរគុណយ៉ាងជ្រាលជ្រៅបំផុត ចំពោះក្តីមេត្តាករុណាប្រកបដោយព្រហ្មវិហារធម៌របស់ សម្តេចតេជោ ហ៊ុន សែន និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ព្រមទាំង សម្តេចធិបតី ហ៊ុន ម៉ាណែត និងលោកជំទាវបណ្ឌិត ដែលបានលូកដៃជួយសង្គ្រោះក្តីស្រមៃសិក្សារបស់នាងឱ្យរស់ឡើងវិញ ព្រមទាំងបានថ្លែងអំណរគុណដល់ ឯកឧត្តម គង់ គឹមនី និងក្រុមការងារអាជ្ញាធរខេត្តមណ្ឌលគិរីទាំងអស់ ដែលបានចុះអន្តរាគមន៍ និងយកចិត្តទុកដាក់ដល់ផ្ទះបែបនេះ។
យុវតី វ៉ាន ឈុនលាង បានប្តេជ្ញាចិត្តយ៉ាងមុតមាំថានឹងខិតខំប្រឹងប្រែងរៀនសូត្រឱ្យអស់ពីសមត្ថភាពនៅថ្នាក់មហាវិទ្យាល័យ ដើម្បីយកចំណេះដឹងមកអភិវឌ្ឍន៍ស្រុកកំណើត និងឆ្លើយតបទៅនឹងគុណបំណាច់ដ៏ថ្លៃថ្លារបស់ប្រមុខថ្នាក់ដឹកនាំជាតិ៕
ចែករំលែកព័តមាននេះ