ជនសង្ស័យ២នាក់ ឆក់ទូរស័ព្ទពីបុគ្គលិករោងចក្របានសម្រេចតែរត់មិនរួច
- ភ្នំពេញ
រាជធានីភ្នំពេញ ៖ ចោរស្ទាវ២នាក់បានជិះម៉ូតូ១គ្រឿងចេញធ្វើសកម្មភាពឆក់នៅតាមផ្លូវ ហើយបានប្រទះឃើញបុរសជាបុគ្គលិករោងចក្រម្នាក់ កំពុងជិះម៉ូតូបណ្ដើរ កាន់ទូរស័ព្ទម៉ាកIphone17promax ១គ្រឿងនិយាយឆាតបណ្ដើរ ក៏បានឆក់យកបានសម្រេច ។ បន្ទាប់មកបានព្យាយាមជិះម៉ូតូរត់គេចខ្លួន ពេលនោះម្ចាស់ទូរស័ព្ទក៏បានជិះម៉ូតូដេញតាមនិងស្រែកថាចោរៗ បង្កឲ្យមានការភ្ញាក់ផ្អើលតាមផ្លូវ ។ ស្របពេលនោះមានបុរសម្នាក់កំពុងបើកម៉ូតូកង់បីតាមផ្លូវនោះដែរ ក៏ជួយដេញតាមបំបុកម៉ូតូចោរបណ្ដាលឲ្យទើបចាប់បានម្នាក់ ហើយម្នាក់ទៀតរត់ឡើងលើដំបូលផ្ទះអ្នកភូមិ ក៏ត្រូវនគរបាលនិងប្រជាពលរដ្ឋចាប់បានទៀត ។
ហេតុការណ៍ខាងលើនោះបានកើតឡើងកាលពីវេលាម៉ោង៣និង២០នាទីរសៀល ថ្ងៃទី០៨ ខែសីហា ឆ្នាំ២០២៦ ស្ថិតនៅតាមផ្លូវបេតុ កែងមហាវិថីសហព័ន្ធរុស្ស៊ី ត្រង់ចំណុចមុខអតីតអាកាសយានដ្ឋានអន្តរជាតិភ្នំពេញ(ព្រលានយន្ហោះចាស់) ភូមិក្បាលដំរី២ សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ ។
ជនសង្ស័យទី១.ឈ្មោះសុត បញ្ញា ហៅអាញ៉ា ភេទប្រុស អាយុ១៦ឆ្នាំ មានស្រុកកំណើតនៅភូមិស្វាយចេក ឃុំស្វាយចេក ស្រុករំដួល ខេត្តស្វាយរៀង និងបច្ចុប្បន្នស្នាក់នៅភូមិត្រពាំងទួល សង្កាត់កំបូល ខណ្ឌកំបូល រាជធានីភ្នំពេញ ។ ទី២.ឈ្មោះចាន់ សត្យា ហៅអាក្យា ភេទប្រុស អាយុ១៦ឆ្នាំ មានស្រុកកំណើតនៅភូមិត្រគៀត ឃុំរការ ស្រុកពារាំង ខេត្តព្រៃវែង ។ បច្ចុប្បន្នស្នាក់នៅផ្ទះលេខ71B ផ្លូវលេខ110Z ភូមិចុងថ្នល់ខាងលិច សង្កាត់ទឹកថ្លា ខណ្ឌសែនសុខ រាជធានីភ្នំពេញ ។
ចំណែកជនរងគ្រោះឈ្មោះយិន ប៊ុនឡែន ភេទប្រុស អាយុ៣៣ឆ្នាំ មុខរបរបុគ្គលិករោងចក្រមានទីលំនៅផ្ទះលេខ៦៩៤AI ផ្លូវលេខ៧១ ភូមិ៧ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ។
សមត្ថកិច្ចបានប្រាប់ឲ្យដឹងថា នៅមុនពេលកើតហេតុ បុរសជាបុគ្គលិករោងចក្រខាងលើនោះ បានជិះម៉ូតូ ១គ្រឿងម៉ាកហុងដាឃ្លីក ពាក់ស្លាកលេខភ្នំពេញ 1GR-3815 ចេញពីរោងចក្រមួយកន្លែង ដោយជិះបណ្ដើរ និងកាន់ទូរស័ព្ទ១គ្រឿងម៉ាកIphone17promax និយាយឆាតបណ្ដើរ ។ ពេលនោះចោរស្ទាវទាំង២នាក់ខាងលើ បានជិះម៉ូតូ១គ្រឿងម៉ាកស៊ុយហ្ស៊ុយគីនិច ពណ៍ស លាយខៀវ ពាក់ស្លាកលេខភ្នំពេញ1MS-5794 ដេញតាមពីក្រោយ ។
សមត្ថកិច្ចបានប្រាប់ឲ្យដឹងបន្តទៀតថា លុះពេលទៅដល់ទន្ទឹម ក៏ធ្វើសកម្មភាពឆក់យកទូរស័ព្ទនោះពីដៃបុគ្គលិករោងចក្រខាងលើបានសម្រេច រួចនាំគ្នាជិះគេចខ្លួន ហើយជនរងគ្រោះក៏បានជិះដេញតាម និងស្រែកថាចោរៗ បង្កឲ្យមានការភ្ញាក់ផ្អើលពេញដងផ្លូវ ។ ស្របពេលនោះ ក៏មានបុរសម្នាក់កំពុងបើកបរម៉ូតូកង់បី១គ្រឿងនៅតាមផ្លូវនោះដែរ បានជួយដេញតាម ហើយបានចម្ងាយប្រមាណជាង២០០ម៉ែត្រ ដល់ត្រង់ចំណុខមុខអតីតអាកាសយានដ្ឋានអន្តរជាតិភ្នំពេញ ទើបដេញតាមទាន់ ។
សមត្ថកិច្ចបានបញ្ជាក់ប្រាប់ឲ្យដឹងបន្ថែមទៀតថា ភ្លាមៗនោះបុរសអ្នកបើកម៉ូតូកង់បីក៏សម្រេចចិត្តបើកបំបុកម៉ូតូលោកចោរស្ទាវ បណ្ដាលឲ្យដួល ហើយក៏ឃាត់ខ្លួនបានម្នាក់ភ្លាមៗ នៅនឹងកន្លែង រីឯបក្ខពួកម្នាក់ទៀតបានរត់គេចខ្លួនឡើងទៅលើដំបូលផ្ទះអ្នកភូមិ ។ ខណៈនោះកម្លាំប៉ុស្តិ៍នគរបាលរដ្ឋបាលកាកាបទី២ រួមជាមួយប្រជាពលរដ្ឋបាននាំគ្នាដេញតាមឃាត់បាន ព្រមទាំងដកហូតយកបានទូរស័ព្ទនោះប្រគល់ជូនម្ចាស់ដើមវិញហើយ ។
បន្ទាប់មកនគរបាលបានបាំខ្លួនចោរទាំងនាក់ទៅសាកសួរនិងកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការតាមច្បាប់ ហើយចោរស្ទាវ២នាក់នោះ ក៏បានសារភាពថា ពួកខ្លួនពិតជាបានធ្វើសកម្មភាពឆក់ទូរស័ព្ទខាងលើនោះមែន ៕
ចែករំលែកព័តមាននេះ