ទីក្រុងព្យុងយ៉ាង៖ ឧបទ្វីបកូរ៉េកំពុងទទួលរងការឡើងកម្ដៅដ៏ខ្លាំងក្លា មិនថាតែកូរ៉េខាងជើង ឬខាងត្បូងនោះទេ។ បើសម្រាប់កូរ៉េខាងត្បូង ការឡើងកម្ដៅប៉ុន្មានថ្ងៃចុងក្រោយនេះបានសម្លាប់មនុស្សជាងម្ភៃនាក់។ ចំណែកនៅកូរ៉េខាងជើង ប្រព័ន្ធផ្សព្វផ្សាយរបស់រដ្ឋបានលើកទឹកចិត្តឱ្យប្រជាជនបរិភោគអ្វីៗគ្រប់យ៉ាងដើម្បីអាចទប់ទល់នឹងការឡើងកម្ដៅ។ ពួកគេអាចបរិភោគសម្លសាច់សុនខ និងស៊ុបមាន់។ ប្រព័ន្ធផ្សព្វផ្សាយកូរ៉េខាងជើងបាននិយាយកោតសរសើរប្រមុខដឹកនាំកូរ៉េខាងជើង លោកគីមជុងអ៊ុន និងចាត់ទុកថាលោកជាបុរសខ្លាំងដែលអាចទប់ទល់នឹងអាកាសធាតុគ្រប់ប្រភេទ។ ទូរទស្សន៍ជាតិកូរ៉េខាងជើងផ្សាយថានៅទីក្រុងព្យុងយ៉ាង សីតុណ្ហភាពអតិបរមាកើនឡើងដល់៣៦,៧អង្សា។
នៅក្នុងចំណោមចំណីអាហារដែលទូរទស្សន៍ជាតិកូរ៉េខាងជើងផ្ដល់ជាអនុសាសន៍ឱ្យប្រជាជនបរិភោគនៅក្នុងអាកាសធាតុក្ដៅនេះគឺសម្លសាច់សុនខ។ នេះជាជំនឿតាំងពីដូនតាមកដែលថាការបរិភោគអាហារនេះនឹងជួយឱ្យមនុស្សទប់ទល់នឹងកម្ដៅ។ នៅក្នុងកម្មវិធីអប់រំសុខភាពដែលចេញផ្សាយកាលពីពេលថ្មីៗនេះ កាសែតរបស់បក្សពលករកូរ៉េ រ៉ូដុង ស៊ីនមុន (Rodong Sinmun) បានដកស្រង់ប្រសាសន៍របស់វេជ្ជបណ្ឌិតប្រចាំមន្ទីរពេទ្យធំនៃទីក្រុងព្យុងយ៉ាងដែលនិយាយថាអាហារត្រជាក់ៗដូចជាឪឡឹក ត្រសក់ស្រូវ សណ្ដែកបាយ និងអាហារដែលមានឱជារសដទៃទៀតដូចជាសម្លសាច់សុនខ បបរត្រី និងបបរសណ្ដែកក្រហមជាដើមសុទ្ធតែជួយទប់ទល់នឹងកម្ដៅ។ កាសែតខាងលើនេះបានបម្រុងទុកទំព័ររបស់ខ្លួនដើម្បីពិពណ៌នាពិស្ដារអំពីសម្លសាច់សុនខដោយចាត់ទុកថាវាជាអាហារជាប្រពៃណីរបស់ជនជាតិកូរ៉េប្រចាំរដូវក្ដៅ។
កាសែតថែមទាំងបានរំលឹកនូវពាក្យទំនឹមទំនៀមដែលនិយាយថាសូម្បីតែសម្លសាច់សុនខកំពប់ពីចានទៅលើជើងក៏វាជាថ្នាំកែរោគផងដែរ។ កាសែតដដែលនេះសរសេររៀបរាប់បន្តទៀតថាពិធីប្រកួតប្រជែងការចម្អិនសាច់សុនខថ្នាក់ជាតិទើបតែរៀបចំកាលពីដើមឆ្នាំនេះ។ ដោយឡែក ទូរទស្សន៍ជាតិកូរ៉េខាងជើង ខេស៊ីអឹនអេ (KCNA) បានចុះផ្សាយកោតសរសើរអំពីសម្លសាច់មាន់ម៉្យាងឈ្មោះសាំយេតាង (samyetang) ដែលគេញាត់មើមយឹនស៊ិន បាយដំណើប និងផ្លែពុទ្រាចូលទៅក្នុងមាន់។ ភោជនីយដ្ឋាននៅទីក្រុងព្យុងយ៉ាងមានភ្ញៀវចូលច្រើនៗដោយសារពួកគេព្យាយាមរកអាហារដែលជួយឱ្យត្រជាក់ខ្លួន។ ទូរទស្សន៍មជ្ឈិមរបស់កូរ៉េខាងជើងនៅសប្ដាហ៍នេះក៏បានចាក់ផ្សាយនូវកម្មវិធីស្ដីពីការថែទាំសុខភាពរដូវក្ដៅផងដែរ។
ទូរទស្សន៍នេះបានផ្ដល់អនុសាសន៍ឱ្យផឹកទឹកឱ្យច្រើន និងឧស្សាហ៍ចុះហែលទឹក ឬហាត់ប្រាណនៅទីចំហ។ រហូតមកដល់ពេលនេះ កូរ៉េខាងជើងពុំដែលបានប្រកាសជាផ្លូវការនូវតួលេខអ្នកស្លាប់ដោយសារការឡើងកម្ដៅនេះទេ។ ក្រៅពីការផ្ដល់ដំបូន្មានស្ដីពីការថែទាំសុខភាពដូចខាងលើនេះ ប្រព័ន្ធផ្សព្វផ្សាយរបស់រដ្ឋក៏មិនភ្លេចចាក់ផ្សាយអំពីប្រធានបទបែបឃោសនាលើកតម្កើងមេដឹកនាំរបស់ខ្លួននោះឡើយ។ ទូរទស្សន៍កូរ៉េខាងជើងផ្សាយថាលោកគីមជុងអ៊ុនក៏មិនខុសពីប្រជាជនសាមញ្ញនោះទេ លោកក៏ទទួលរងការឡើងកម្ដៅដូចគ្នា។ កាសែតរ៉ុដុង ស៊ីនមុន នៅសប្ដាហ៍នេះបានចាក់ផ្សាយខ្សែអាត់វីឌីអូចាស់ៗតាំងពីឆ្នាំ២០១៣ដែលបង្ហាញរូបលោកគីមជុងអ៊ុនចុះពិនិត្យមើលការដ្ឋានសំណង់បែកញើសជោគពេញខ្លួន។
ទោះបីអាវសើមជោគដោយញើស និងទោះបីមន្ត្រីក្រោមឱវាទរបស់លោកជូនយោបល់ទៅលោកដើម្បីជៀសវាងការចុះហាលក្ដៅបែបនេះក្ដី ប៉ុន្តែលោកគីមមិនរាថយឡើយ។ លោកឆ្លើយតបទៅមន្ត្រីនោះថាទោះបីអាកាសធាតុក្ដៅរហូតដល់ទ្រាំមិនបានយ៉ាងណាក្ដី អ្វីដែលយើងត្រូវធ្វើចំពោះប្រជាជនយើងត្រូវតែធ្វើ។ កាសែតដដែលនេះក៏បានសរសេររៀបរាប់ផងដែរថាលោកគីមសុខចិត្តធ្វើដំណើរឆ្លងកាត់ជួរភ្នំដែលមានសណ្ឋានដីឡើងចុះ និងក្រោមការធ្លាក់ភ្លៀងយ៉ាងជោគជាំកាលពីឆ្នាំ២០១៨ដើម្បីស្វែងរកទីតាំងដែលល្អសម្រាប់ការសាងសង់តំបន់រមណីយដ្ឋានលំហែកាយរដូវក្ដៅ។ អត្ថបទខ្លះទៀតចុះផ្សាយរំលឹកអំពីលោកគីមចុះទៅពិនិត្យមើលរោងចក្រផលិតផ្អកគ្រឿងសមុទ្រនៅពេលសីតុណ្ហភាពហក់ឡើងដល់៣៩អង្សា។ លោកចុះពិនិត្យមើលកន្លែងផ្អាប់អាហារទាំងនោះ និងណែនាំឱ្យគិតគូរជាសំខាន់ទៅលើគុណភាព និងអនាម័យ។ សម្រាប់ការឡើងកម្ដៅនៅពេលនេះ គេមិនទាន់ដឹងលម្អិតថាតើលោកគីមបាន ឬក៏គ្រោងធ្វើអ្វីខ្លះនោះទេ៕ ប្រភព៖ Reuters
ចែករំលែកព័តមាននេះ