ប្រទេសថៃ ៖ យោងតាមការធ្វើបច្ចុប្បន្នភាពចុងក្រោយពីសារព័ត៌មាន Khaosod ចំនួនអ្នកស្លាប់បានកើនដល់៧នាក់ នៅក្នុងហេតុការណ៍បាញ់ប្រហារដ៏រន្ធត់នៅសាលារៀនមួយ ក្បែរទីក្រុងបាងកក នៅព្រឹកថ្ងៃសុក្រនេះ។
ការធ្វើបច្ចុប្បន្នភាពព័ត៌មាន អំពីហេតុការណ៍បាញ់ប្រហារដ៏រន្ធត់មួយ បង្កឡើងដោយសិស្សប្រុសម្នាក់នៅក្នុងសាលារៀន ទេពសិរិន នន់ថាបុរី (Thepsirin Nonthaburi) ស្ថិតក្នុងស្រុកបាងគ្រួយ (Bang Kruai) ខេត្តនន់ថាបុរី (Nonthaburi) បណ្តាលឱ្យមានអ្នករងរបួសចំនួន ១៥ នាក់ និងគ្រូបង្រៀន ២ នាក់បានស្លាប់ភ្លាមៗនៅនឹងកន្លែង។ ហេតុការណ៍នេះបង្កឱ្យមានការភ័យស្លន់ស្លោយ៉ាងខ្លាំងដល់បណ្តាគ្រូបង្រៀន សិស្សានុសិស្ស និងបុគ្គលិកសាលា ហើយអ្នកមិនពាក់ព័ន្ធត្រូវបានជម្លៀសចេញពីតំបន់នោះភ្លាមៗ ហើយទីភ្នាក់ងារពាក់ព័ន្ធត្រូវបានបញ្ជូនទៅកាន់កន្លែងកើតហេតុដើម្បីគ្រប់គ្រងស្ថានការណ៍។
របាយការណ៍ក្រោយៗមកបង្ហាញថា សិស្សដែលបង្កហេតុបានស្លាប់បាត់បង់ជីវិត ដោយ ព័ត៌មានបឋមបញ្ជាក់ថា ជនដៃដល់បានបាញ់សម្លាប់ខ្លួនឯង ហើយសាកសពត្រូវបានរកឃើញនៅក្នុងបន្ទប់រៀនមួយនៅក្នុងសាលានោះ។
ក្រោយស្ថានការណ៍ស្ថិតនៅក្រោមការគ្រប់គ្រង ការិយាល័យការពារ និងកាត់បន្ថយគ្រោះមហន្តរាយខេត្តនន់ថាបុរី បានបញ្ជាក់ជាផ្លូវការថា មនុស្ស ១៥ នាក់បានរងរបួស ដោយក្នុងនោះ ២ នាក់របួសធ្ងន់ និង ៧ នាក់បានស្លាប់ ដែលរួមមានគ្រូបង្រៀន ៣ នាក់ សិស្ស ៣ នាក់ និងជនដៃដល់ ១ នាក់។
ខណៈពេលជាមួយគ្នានេះដែរ លោក ត្រៃរ៉ុង ភីវផាន (Trairong Phiwphan) អគ្គអធិការរងនគរបាលជាតិភូមិន្ទថៃ និងជាអ្នកនាំពាក្យនគរបាលជាតិភូមិន្ទថៃ បានថ្លែងថា ប៉ូលិសនៅមិនទាន់អាចសន្និដ្ឋានពីមូលហេតុនៃបទល្មើសនេះបាននៅឡើយទេ ដោយសារត្រូវការស៊ើបអង្កេតយ៉ាងហ្មត់ចត់។ កិច្ចការនេះរួមបញ្ចូលទាំងការពិនិត្យកាលៈទេសៈដែលនាំឱ្យមានហេតុការណ៍នេះ កាលៈទេសៈជុំវិញ និងព័ត៌មានផ្ទាល់ខ្លួនរបស់ជនល្មើស។
អាជ្ញាធរបានទាក់ទងទៅអាណាព្យាបាលជនល្មើស ហើយជាបឋមបានដឹងថា រូបគេរស់នៅជាមួយសាច់ញាតិវ័យចំណាស់។ ទោះជាយ៉ាងណាក៏ដោយ ព័ត៌មានលម្អិតអំពីមូលហេតុ និងការជំរុញចិត្តជនល្មើសនៅតែស្ថិតក្រោមការស៊ើបអង្កេតនៅឡើយ។ បន្ថែមពីលើនេះ របាយការណ៍ចុងក្រោយក៏បានបង្ហាញថា ជីដូនជីតាជនល្មើសត្រូវបានរកឃើញថាបានស្លាប់ក្នុងផ្ទះនៅក្នុងតំបន់ Soi Wat Lat Pladuk ដែលនាំឱ្យប៉ូលិសជឿថា ហេតុការណ៍នេះអាចនឹងកើតឡើងនៅផ្ទះជីដូនជីតាជនល្មើស មុនពេលមានការបាញ់ប្រហារនៅឯសាលារៀន៕
ចែករំលែកព័តមាននេះ