ពិធីសែនព្រេនតាមទំនៀមទម្លាប់ជនជាតិដើមភាគតិច មុនដំណើរការសាងសង់បង្គោលកង្ហារខ្យល់អគ្គិសនី នៅមណ្ឌលគិរី
- មណ្ឌលគិរី
ខេត្តមណ្ឌលគិរី ៖ ដើម្បីឱ្យការសាងសង់បង្គោលកង្ហារអគ្គិសនីដំណើរការរលូន និងស្របតាមបែបបទប្រពៃណីរបស់បងប្អូនរស់នៅក្នុងមូលដ្ឋាន នាព្រឹកថ្ងៃទី០៦ ខែសីហា ឆ្នាំ២០២៦ លោក ចាន់ រតនា អភិបាលរងខេត្តមណ្ឌលគិរី បានអញ្ជើញចូលរួម ក្នុងពិធីសែនព្រេនលើដីសាងសង់បង្គោលកង្ហារខ្យល់ ជូនសហគមន៍ជនជាតិដើមភាគតិចស្រែអ៊ី និងសហគមន៍ការពារធនធានធម្មជាតិណំភុំ(ស្រែអ៊ី) ដោយមានការចូលរួមពីអាជ្ញាធរ តំណាងសហគមន៍ និងបងប្អូនប្រជាពលរដ្ឋជាជនជាតិដើមភាគតិចជាច្រើននាក់ ស្ថិតនៅក្នុងភូមិស្រែអ៉ី សង្កាត់រមនា ក្រុងសែនមនោរម្យ ខេត្តមណ្ឌលគិរី។
លោក ចាន់ រតនា បានឱ្យដឹងថា គម្រោងសាងសង់បង្គោលកង្ហារខ្យល់អគ្គិសនីនេះ នឹងនាំមកនូវអត្ថប្រយោជន៍ជាច្រើនសម្រាប់សហគមន៍ទាំងមូល។លោកបានលើកឡើងថា ជាធម្មតា រាល់ការងារអភិវឌ្ឍន៍ទាំងអស់ តែងតែចៀសមិនផុតពីការមានផលប៉ះពាល់តិចឬច្រើននោះឡើយ។ ដូចនេះ សូមបងប្អូនប្រជាពលរដ្ឋ មេត្តាមានការយោគយល់ អធ្យាស្រ័យ និងអត់ធ្មត់ខ្ពស់ ចំពោះផលប៉ះពាល់ជាអវិជ្ជមាន ឬការរំខានផ្សេងៗដែលកើតមានឡើងជាបណ្តោះអាសន្ន ក្នុងអំឡុងពេលដំណើរការសាងសង់នេះ ដើម្បីឱ្យគម្រោងដ៏មានសារសំខាន់នេះសម្រេចបានជោគជ័យ បម្រើដល់ផលប្រយោជន៍រួមនាពេលអនាគត។
ជាមួយគ្នានេះ លោកអភិបាលរងខេត្ត ក៏បានអំពាវនាវដល់បងប្អូនសហគមន៍ទាំងអស់ សូមចូលរួមសហការឱ្យបានជិតស្និទ្ធជាមួយអាជ្ញាធរ និងក្រុមការងារបច្ចេកទេស ព្រោះសមិទ្ធផលបង្គោលកង្ហារខ្យល់អគ្គិសនីនេះ គឺជាផ្នែកមួយនៃការអភិវឌ្ឍថាមពលបៃតង ដែលមិនត្រឹមតែជួយផ្គត់ផ្គង់អគ្គិសនីប្រកបដោយនិរន្តរភាពប៉ុណ្ណោះទេ ប៉ុន្តែវាក៏នឹងចូលរួមចំណែកយ៉ាងសំខាន់ក្នុងការលើកកម្ពស់ជីវភាពរស់នៅ និងទាក់ទាញសក្តានុពលទេសចរណ៍មកកាន់សហគមន៍យើងនៅថ្ងៃអនាគតផងដែរ។
លោក ម្ហេះ កែក មេភូមិស្រែអ៊ី បានឱ្យដឹងថា គោលបំណងនៃការរៀបចំពិធីសែនព្រេនទៅតាមក្បួនខ្នាត និងទំនៀមទម្លាប់ប្រពៃណីរបស់បងប្អូនជនជាតិដើមភាគតិចនាឱកាសនេះ គឺធ្វើឡើងដើម្បីគោរពអញ្ជើញអារក្សអ្នកតា និងម្ចាស់ទឹកម្ចាស់ដីដែលថែរក្សាដីធ្លីតំបន់នោះ មកទទួលដឹងឮ ព្រមទាំងបួងសួងសុំសេចក្តីសុខ សេចក្តីសប្បាយ ចៀសផុតពីគ្រោះថ្នាក់ផ្សេងៗ និងសុំឱ្យដំណើរការកសាងបង្គោលកង្ហារខ្យល់អគ្គិសនីនេះ ប្រព្រឹត្តទៅដោយរលូន ទទួលបានជោគជ័យ និងមានសុវត្ថិភាពទាំងស្រុង។
គួរបញ្ជាក់ថា រាជរដ្ឋាភិបាលកម្ពុជាបានអនុម័តគម្រោងវិនិយោគអភិវឌ្ឍន៍ស្ថានីយផលិតអគ្គិសនីដើរដោយថាមពលខ្យល់ អានុភាព១៥០មេហ្គាវ៉ាត់ នៅក្នុងខេត្តមណ្ឌលគិរី។ គម្រោងនេះមានទំហំវិនិយោគប្រមាណ ២០០លានដុល្លារ ហើយត្រូវបានអនុម័តដោយគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា ក្នុងខែមករា ឆ្នាំ២០២៦។
ទីតាំងនៃគម្រោងនេះគឺស្ថិតនៅក្រុងសែនមនោរម្យ ។ការអភិវឌ្ឍន៍នេះនឹងរួមចំណែកដល់ការផ្គត់ផ្គង់ថាមពលអគ្គិសនីនៅក្នុងប្រទេស ក៏ដូចជាការប្រើប្រាស់ថាមពលកកើតឡើងវិញ។ បន្ថែមពីនេះ ខេត្តមណ្ឌលគិរីក៏បានទទួលសមិទ្ធផលហេដ្ឋារចនាសម្ព័ន្ធជាតិថ្មីមួយទៀត គឺខ្សែបញ្ជូនអគ្គិសនីតង់ស្យុងខ្ពស់ ២៣០គីឡូវ៉ុល ភ្ជាប់ពីខេត្តក្រចេះមកខេត្តមណ្ឌលគិរី ចម្ងាយ ១៣៣គីឡូម៉ែត្រ ព្រមទាំងអនុស្ថានីយអគ្គិសនីតង់ស្យុងខ្ពស់ ២៣០គីឡូវ៉ុល ចំនួន ២ ផងដែរ៕
ចែករំលែកព័តមាននេះ