ប្រទេសថៃ ៖ ដោយសារតែចំនួនអ្នកឆ្លងជំងឺអេដស៍មានការកើនឡើងគួរកត់សម្គាល់នោះ វត្តមួយនៅក្នុងប្រទេសថៃ បានប្រកាសឈប់ទទួលយកអ្នកជំងឺថ្មី ព្រោះតែត្រូវរ៉ាប់រងលើបណ្តាអ្នកជំងឺចាស់ និងបុគ្គលិកជាង ២០០ នាក់ ខណៈការចំណាយប្រចាំខែមានចំនួនខ្ពស់ រីឯប្រាក់ឧបត្ថម្ភ និងការបរិច្ចាគបានធ្លាក់ចុះយ៉ាងខ្លាំង។
តាមការចេញផ្សាយពីសារព័ត៌មាន Khaosod កាលពីថ្ងៃទី៦ ខែសីហា ឆ្នាំ២០២៦ បានឱ្យដឹងថា ប្រទេសថៃកំពុងតែជួបប្រទះការកើនឡើងវិញនូវករណីជំងឺអេដស៍ (AIDS) និងមេរោគហ៊ីវ (HIV) ដោយមានករណីឆ្លងថ្មីប្រមាណ ៧ ០០០ ទៅ ៩ ០០០ នាក់ក្នុង១ឆ្នាំ ដែលធ្វើឱ្យចំនួនអ្នកឆ្លងសរុបកើនឡើងលើសពី ៥០ ម៉ឺននាក់ហើយ កាលពីថ្មីៗនេះ។
ជាមួយនឹងការកើនឡើងនេះ វត្តព្រះបាទណាំភូ ស្ថិតនៅក្នុងខេត្តលពបុរី (Lopburi) បានប្រកាសមិនទាន់មានលទ្ធភាពទទួលអ្នកជំងឺថ្មីបន្ថែមទៀតឡើយ មូលហេតុដោយសារតែបច្ចុប្បន្ន វត្តកំពុងជាប់បន្ទុកយ៉ាងធ្ងន់ធ្ងរក្នុងការមើលថែបណ្តាអ្នកជំងឺមានស្រាប់ រួមទាំងត្រូវរ៉ាប់រងលើបុគ្គលិកបម្រើការងារជាង ២០០ នាក់ឯណោះ។
បើតាម ព្រះគ្រូ សុវត្ថិ កិត្តិសន (Suwat Kittisarn) ព្រះចៅអធិការស្តីទីវត្តព្រះបាទណាំភូ មានសង្ឃដីកាថា វត្តនៅតែបន្តរែកពន់បន្ទុកថែទាំអ្នកជំងឺ បើទោះបីជាប្រាក់ចំណូលមានកម្រិត និងកំពុងធ្លាក់ចុះក៏ដោយ។ ការចំណាយទាំងនោះរួមមាន ការថែទាំអ្នកជំងឺអេដស៍ និងបុគ្គលិកជាង ២០០នាក់ ព្រមទាំងថ្លៃទឹក-ភ្លើង ប្រេងឥន្ធនៈ អាហារ និងការចំណាយផ្សេងៗទៀត ដែលសរុបប្រហែល ២០ ម៉ឺនបាត ឬប្រហែល ៦ ០០០ ដុល្លារអាមេរិកក្នុង១ខែ។ ខណៈពេលដែលចំនួនអ្នកជំងឺអេដស៍កាន់តែច្រើន កំពុងតែទាក់ទងមកវត្តដើម្បីស្វែងរកការព្យាបាលនោះ គណៈកម្មការវត្តបានហាមឃាត់មិនឱ្យទទួលអ្នកជំងឺថ្មីបន្ថែមទៀតឡើយ ដោយសារការចំណាយដ៏ច្រើនដែលមានស្រាប់បច្ចុប្បន្ន។ ទោះយ៉ាងណាក៏ដោយ គណៈកម្មការវត្តក៏បានដាស់តឿនប្រជាជនថៃគ្រប់រូបឱ្យមានការប្រុងប្រយ័ត្ន និងចេះគ្រប់គ្រងខ្លួនឯង ដើម្បីចៀសវាងការខុសឆ្គង ព្រោះការឆ្លងជំងឺអេដស៍អាចផ្តល់ផលវិបាកយ៉ាងធ្ងន់ធ្ងរដល់ជីវិត។
ជាមួយគ្នានោះ គណៈកម្មការវត្តក៏ចង់នាំយកបញ្ហានេះទៅជម្រាបជូនអាជ្ញាធរទទួលខុសត្រូវផងដែរ ជុំវិញបញ្ហាបណ្តាអ្នកជំងឺមិនអាចទទួលបានការព្យាបាលដែលផ្តល់ដោយរដ្ឋាភិបាលឡើយ ដោយសារការលំបាកក្នុងការធ្វើដំណើរ និងការចំណាយពាក់ព័ន្ធផ្សេងៗ។ បញ្ហានេះអាចបណ្តាលឱ្យអ្នកជំងឺមួយចំនួនអស់ថ្នាំលេប និងធ្វើឱ្យស្ថានភាពជំងឺរបស់ពួកគេកាន់តែធ្ងន់ធ្ងរឡើង។ បន្ថែមពីលើនេះ ស្ថានភាពបច្ចុប្បន្នក្នុងវត្ត បន្ទាប់ពីបញ្ហានេះកើតឡើង បានបណ្តាលឱ្យមានការធ្លាក់ចុះការបរិច្ចាគ ដែលធ្វើឱ្យខ្វះខាតថវិកាលើការរ៉ាប់រងដែលមានស្រាប់ ហើយប្រសិនបើអាចធ្វើទៅបាន គណៈកម្មការវត្តនេះចង់ស្នើរដ្ឋាភិបាលស្វែងរកវិធីដោះស្រាយបញ្ហានេះ និងផ្តល់ការថែទាំបន្ថែមទៀតដល់អ្នកជំងឺ៕
ចែករំលែកព័តមាននេះ