បង្ក្រាបក្រុមអ្នកជីករ៉ែមាសខុសច្បាប់នៅតំបន់អូរព្រំដែន ឃាត់ខ្លួនមនុស្ស០៧នាក់នៅស្រុកភ្នំព្រឹក
- បាត់ដំបង
ខេត្តបាត់ដំបង ៖ មនុស្សយ៉ាងហោចណាស់ចំនួន០៧នាក់ ត្រូវបានកម្លាំងចម្រុះនៃគណៈបញ្ជាការកងឯកភាពស្រុកភ្នំព្រឹកឃាត់ខ្លួន កាលពីរសៀលថ្ងៃទី០៦ សីហា ពេលដែលពួកគេកំពុងប្រើប្រាស់ឧបករណ៏ជីកកកាយរុករករ៉ែមាសដោយគ្មានច្បាប់អនុញ្ញាតកៀកនឹងដងអូរបន្ទាត់ព្រំដែនកម្ពុជា-ថៃ ក្នុងភូមិសាស្ត្រឃុំបារាំងធ្លាក់ ។ តាមរយៈរបាយការណ៍សមត្ថកិច្ច កិច្ចប្រតិបត្តិការនេះ ដឹកនាំដោយលោក វ៉ាត់ វិសាល អភិបាលរងស្រុក ដែលគេអះអាងថា តំណាងជួសមុខឲ្យលោក សុង សុភ័ក្រ អភិបាលស្រុកភ្នំព្រឹក ។
ប្រជាពលរដ្ឋចំនួន០៧នាក់ ត្រូវកម្លាំងសមត្ថកិច្ចចុះបង្ក្រាប និងឃាត់ខ្លួនដល់ទីតាំងផ្ទាល់ ខណៈពេលពួកគេកំពុងជីកគាស់កកាយរុករករ៉ែមាសនៅក្បែរមាត់អូរព្រំដែន ត្រង់ចំណុចភូមិដំណាក់អំពិល និងភូមិហុងទឹក ឃុំបារាំងធ្លាក់ ។ ក្រុមនេះបានធ្វើអាជីវកម្មរ៉ែមាស ដោយគ្មានច្បាប់អនុញ្ញាត ។ ពួកគេធ្វើរបៀបលួចលាក់តាមជួរអូរព្រំដែនកម្ពុជា-ថៃ នៅក្នុងភូមិសាស្ត្រនានានៅស្រុកភ្នំព្រឹក ដែលគេស្គាល់ថា ជាស្រុកមួយនៅភាគខាងលិចនៃអាណាចក្រទឹកដីខេត្តបាត់ដំបង ដែលសំបូរធនធានរ៉ែក្រោមដី ។ ច្រើនឆ្នាំមកហើយ នៅតំបន់ភ្នំព្រឹកនេះ គេឃើញមានក្រុមហ៊ុនចិនមួយឈ្មោះ «ភូយ៉ាង» បានបង្កើតទីតាំងទ្រង់ទ្រាយធំធ្វើអាជីវកម្មរ៉ែមាសនេះយ៉ាងគគ្រឹកគគ្រេង ។ ប៉ុន្តែក្រោយៗមក ក្រុមហ៊ុននេះក៏ស្រាប់តែស្ងាត់បាត់ដំណឹងឈឹងបន្តិចម្ដងៗរហូតមកទល់នឹងថ្ងៃនេះ ។
ប៉ុន្តែ ទន្ទឹមនឹងដំណើរការរបស់ក្រុមហ៊ុន «ភូយ៉ាង» គេក៏ឃើញប្រជាកសិករនៅក្នុងមូលដ្ឋានដែលមានដីនៅតំបន់នោះក៏បាននាំគ្នាជីករុករករ៉ែបែបអាជីវកម្មខ្នាតតូចយ៉ាងភ្លូកទឹកភ្លូកដីដែរ តែក្រោយៗមក សកម្មភាពនេះ ហាក់បានថមថយវិញ រហូតមកទល់ពេលនេះ នៅសេសសល់បន្តិចបន្តួច ដែលដើរជីកកកាយតាមដងអូរ ។
សព្វថ្ងៃ មានពលរដ្ឋតិចតួចដែលមានដីនៅតំបន់នោះ នៅតែបន្តធ្វើដោយលួចលាក់តាមដងអូរព្រំដែន ឬតាមដីចម្ការ ឬនៅតាមចង្កេះភ្នំ ដើម្បីបានកំរៃបន្តិចបន្តួចចិញ្ចឹមក្រពះ ។ បើតាមការកត់សម្គាល់ជាក់ស្ដែង នាបច្ចុប្បន្ននេះ គេឃើញមានស្រុកចំនួន០៣ ដែលពួកឈ្មួញទុច្ចរិត ដែលភាគច្រើនជាមន្ត្រីមានអំណាច បានឃុបឃិតជាមួយមន្ត្រីខិលខូច លួចធ្វើអាជីកម្មរ៉ែ និងធនធានធម្មជាតិក្រោមដីយ៉ាងផុសផុល ដោយគ្មានច្បាប់អនុញាត ។ តាមបណ្ដាស្រុកទាំង០៣នោះ រួមមាន៖ ស្រុកភ្នំព្រឹក ស្រុកសំឡូត និងស្រុកគាស់ក្រឡ ។
បើតាមប្រភពព័ត៌មាន សព្វថ្ងៃនេះ ក្រុមឈ្មួញទុច្ចរិតហាក់ បាននិងកំពុងសម្រុកជីករុករករ៉ែច្រើនជាងគេនៅក្នុងភូមិសាស្ត្រ ស្រុកសំឡូត ។ ពួកឈ្មួញកាយយកថ្មរ៉ែ នៅស្រុកសំឡូតលក់បន្តទៅឲ្យឈ្មួញទី២ ដើម្បីដឹកយកទៅចម្រាញ់យកមាស នៅទីតាំងស្រុកគាស់ក្រឡ ។ ប៉ុន្តែកន្លងទៅថ្មីៗនេះ គេឃើញមន្ត្រីជំនាញបានចុះបង្ក្រាបដល់ទីតាំងចម្រាញ់មាសនៅស្រុកគាស់ក្រឡម្ដងហើយ ។ ប៉ុន្តែប៉ុន្មានថ្ងៃកន្លងមកនេះ ស្រាប់តែលេចឮព័ត៌មានថ្មីៗមកថា មានមេឈ្មួញស្ត្រីជើងខ្លាំងរកបទល្មើសព្រៃឈើប្រចាំស្រុកសំឡូតម្នាក់ ត្រូវគេសង្ស័យថា បាននិងកំពុងសំងំបង្កើតទីតាំងធ្វើអាជីវកម្មរ៉ែនេះដែរ គួបផ្សំជាមួយនឹងមុខរបរចាស់«បទល្មើសព្រៃឈើ» ។
យ៉ាងណា នេះជាព័ត៌មានបឋមដែលកោះសន្តិភាព ទើបទទួលបានកាលពីសប្ដាហ៍មុននេះ ។ យើងងាកមកតាមដានក្រុមអ្នកជីកកកាយរ៉ែមាសចំនួន០៧នាក់ ដែលត្រូវអាជ្ញាស្រុកភ្នំព្រឹកឃាត់ខ្លួនឯណោះវិញ ។ អធិការស្រុកភ្នំព្រឹក លោក សំ វីរៈ បានប្រាប់ថា ក្រុមជនសង្ស័យដែលធ្វើអាជីវកម្មរ៉ែ ធ្លាប់ត្រូវអាជ្ញាធរ ឬមន្ត្រីជំំនាញចុះហាមឃាត់ច្រើនលើកហើយ តែពួកគាត់នៅតែបន្តធ្វើសកម្មភាពដដែល នៅតាមដងអូរជាប់ព្រំដែន ។ លោកថា បើតាមការសួរនាំប្រជាពលរដ្ឋទាំងនេះមួយចំនួន ជាអ្នកធ្វើចំណាកស្រុក ។ ពួកគាត់តែងយកភាពក្រីក្រ គ្មានអង្ករច្រកឆ្នាំងមកធ្វើជាលេស ដើម្បីដោះបន្ទុកជាមួយសមត្ថកិច្ច ។
ប៉ុន្តែយ៉ាងណា លោកអធិការបានបញ្ជាក់ថា ពេលនេះ មន្ត្រីរបស់លោកបានសួរនាំ និងកសាងសំណុំរឿងបញ្ជូនពួកគេទៅកាន់ស្នងការខេត្តហើយ ដើម្បីចាត់ការបន្តតាមនីតិវិធី ៕
ចែករំលែកព័តមាននេះ