រូបភាពដ៏គួរឱ្យសង្វេគ! កាមេរ៉ាបង្កប់ទម្លាយរូបភាពសត្វព្រៃរងគ្រោះថ្នា.ក់ដា.ច់ជើងដោយសារអន្ទា.ក់ នៅស្ទឹងត្រែង
- ស្ទឹងត្រែង
ខេត្តស្ទឹងត្រែង៖ រូបភាពដ៏គួរឱ្យសង្វេគចិត្តមួយត្រូវបានលាតត្រដាង តាមរយៈកាមេរ៉ាសុវត្ថិភាព/កាមេរ៉ាបង្កប់ (Camera Trap) របស់ក្រុមការងារស្រាវជ្រាវ កាលពីថ្ងៃទី១៨ ខែកក្កដា ឆ្នាំ២០២៦ កន្លងទៅ នៅក្នុងដែនជម្រកសហគមន៍ព្រៃឈើជាំពេជ្រ និងសហគមន៍ភ្នំព្រជុំមិត្ត នៃខេត្តស្ទឹងត្រែង។
រូបភាពនោះបានបង្ហាញពីវត្តមានសត្វព្រៃចំនួន ០២ក្បាល ដែលក្នុងនោះមានសត្វព្រៃមួយក្បាលបានរបួសស្ទើដាច់ជើងម្ខាង ដែលគេសង្ស័យយ៉ាងមុតមាំថារងគ្រោះដោយសារតែ «អន្ទាក់»។
វិបត្តិអន្ទាក់ស្ងាត់ បាននិងកំពុងក្លាយជា «ជញ្ជីងសេចក្តីស្លាប់» ដ៏គួរឱ្យភ័យខ្លាចបំផុតសម្រាប់សត្វព្រៃ។ នៅពេលសត្វដើររាំងចំអន្ទាក់លួស ឬខ្សែកាបទោះបីជាកម្លាំងបោលរបស់វាអាចទាញដាច់ខ្សែចេញពីគល់ឈើក៏ដោយ ប៉ុន្តែ «ក្បាលអន្ទាក់» នៅតែរឹតជាប់ជើង ឬករបស់វាយ៉ាងតឹង។ នៅពេលសត្វផ្លាស់ទី ឬរត់ ក្បាលអន្ទាក់កាន់តែរឹតត្បៀតជម្រៅសាច់ កាត់ផ្តាច់ចរន្តឈា
ម រហូតដល់រលួយសាច់ ចូលដល់ឆ្អឹង និងបង្កើតជាមុខរបួសឆ្លងរោគយ៉ាងធ្ងន់ធ្ងរ។ សត្វខ្លះត្រូវស៊ូទ្រាំនឹងការឈឺចាប់យ៉ាងទារុណរាប់ខែ រហូតដល់ដាច់ជើងខ្លួនឯង ឬស្លាប់ដោយសារភាពអត់ឃ្លាន និងឆ្លងរោគ មុនពេលមានអ្នកជួយសង្គ្រោះទាន់។
នាយសង្កាត់រដ្ឋបាលព្រៃឈើស្ទឹងត្រែង លោក ហ៊ុន សំអឿន បានមានប្រសាសន៍សម្តែងការព្រួយបារម្ភយ៉ាងខ្លាំងថា៖ បច្ចុប្បន្ននេះ សត្វព្រៃកំពុងរងគ្រោះថ្នាក់យ៉ាងខ្លាំងដោយសារអន្ទាក់។ កន្លងមក យើងដោះបានអន្ទាក់ជាច្រើននៅក្នុងព្រៃ រួមទាំងកាំភ្លើងកែច្នៃផងដែរ ដែលកាលពីពេលថ្មីៗនេះ នៅពេលចុះល្បាតយើងបានប្រទះឃើញកាំភ្លើងកែច្នៃសម្រាប់បាញ់សត្វចំនួន ០៣
ដើម ត្រូវគេលាក់ទុកនៅក្នុងព្រៃ។
លោកនាយសង្កាត់បានបន្តអំពាវនាវដល់សាធារណជនថា៖ ក្នុងនាមខ្ញុំជាជំនាញរដ្ឋបាលព្រៃឈើសូមអំពាវនាវដល់សាធារណជនទាំងអស់ ឱ្យចូលរួមថែរក្សា និងការពារធនធានព្រៃឈើ ជាពិសេសសត្វព្រៃនៅក្នុងព្រៃសហគមន៍របស់យើងទាំងអស់គ្នា ព្រោះសត្វព្រៃ ទាំងនេះងាយរងគ្រោះនិងជិតផុតពូជទៅហើយនៅក្នុងខេត្តយើង។ ការការពារ និងអភិរក្សសត្វព្រៃបានល្អ មិនត្រឹមតែថែរក្សាប្រព័ន្ធអេកូឡូស៊ីប៉ុណ្ណោះទេ ប៉ុន្តែថែមទាំងផ្តល់ផលប្រយោជន៍ច្រើន តាមរយៈការទាក់ទាញភ្ញៀវទេសចរជាតិ និងអន្តរជាតិឱ្យមកទស្សនាកម្សាន្តផងដែរ។
យោងតាមប្រភពពីក្រុមការងារអភិរក្សបានឱ្យដឹងថា សហគមន៍នៅក្នុងខេត្តស្ទឹងត្រែងដែលមានសក្តានុពល និងមានវត្តមានសត្វព្រៃរស់នៅច្រើន រួមមាន៖ សហគមន៍ព្រៃឈើ ព្រៃអូរធម្ម (ឃុំតាឡាត់ ស្រុកសេសាន) សហគមន៍ បុរីអូរស្វាយ (ឃុំអូរស្វាយ ស្រុកបុរីអូរស្វាយសែនជ័យ) សហគមន៍ព្រៃឈើ ជាំពេជ្រ (ឃុំកោះស្នែង ស្រុកបុរីអូរស្វាយសែនជ័យ) សហគមន៍ព្រៃឈើ ភ្នំប្រជុំមិត្ត (ឃុំសំអាង ស្រុកថឡាបរិវ៉ាត់) ។
ថ្វីត្បិតតែបច្ចុប្បន្នដោយមានការគាំទ្រថវិកាពីអង្គការគាំពារសត្វព្រៃ ការបំពាក់កាមេរ៉ាតាមដានសត្វត្រូវបានធ្វើឡើងបានតែនៅក្នុងសហគមន៍ចំនួន២ក៏ដោយប៉ុន្តែតាមរយៈការចុះល្បាតជាក់ស្តែង មន្ត្រីជំនាញ និងសហគមន៍នៅតែប្រទះឃើញដានជើងសត្វព្រៃជាច្រើនប្រភេទនៅក្នុងសហគមន៍ដទៃទៀតដែលទាមទារឱ្យមានការយកចិត្តទុកដាក់ និងពង្រីកកិច្ចការពារបន្ថែម។
ដើម្បីសង្គ្រោះជីវិតសត្វព្រៃដែលនៅសេសសល់ ការបន្តរុញច្រាន «យុទ្ធនាការអន្ទាក់សូន្យ»(Zero-Snare Campaign) ការរឹតបន្តឹងច្បាប់លើអ្នកបរបាញ់ និងការផ្លាស់ប្តូរឥរិយាបថសង្គមដោយឈប់បរិភោគសាច់សត្វព្រៃ គឺជាកាតព្វកិច្ចចំបាច់បំផុត ព្រោះ «គ្មានអ្នកទិញ គឺគ្មានអ្នកបរបាញ់ ឬដាក់អន្ទាក់ឡើយ»៕
ចែករំលែកព័តមាននេះ