ខេត្តស្ទឹងត្រែង ៖ បុរសវ័យ៣២ឆ្នាំម្នាក់ ត្រូវបានតុលាការខេត្តស្ទឹងត្រែង ចេញដីកាបង្គាប់ឱ្យឃុំខ្លួនក្នុងពន្ធនាគារជាបណ្តោះអាសន្ន កាលពីរសៀលថ្ងៃទី៦ ខែសីហា ឆ្នាំ២០២៦ ពាក់ព័ន្ធករណីដឹកជញ្ជូន និងរក្សាទុកឧបករណ៍ឆក់ត្រីខុសច្បាប់ ដែលប្រឈមមុខនឹងទោសទណ្ឌ ជាប់ពន្ធនាគារពី១ខែ ទៅ១ឆ្នាំ តាមច្បាប់ស្តីពីជលផល ។
ពាក់ព័ន្ធករណីនេះ បានធ្វើឡើងដំបូងដោយកម្លាំងបញ្ជាការដ្ឋានកងរាជអាវុធហត្ថខេត្តស្ទឹងត្រែង ដោយបានឃាត់ខ្លួនជនសង្ស័យឈ្មោះ ភួន ថុន នៅចំណុចមុខស្នាក់ការសន្តិសុខលេខ៧៤៨ ភូមិណាងអ៊ូង ឃុំអូរស្វាយ ស្រុកបុរីអូរស្វាយសែនជ័យ រួចបានប្រគល់ជូនខណ្ឌរដ្ឋបាលជលផលស្ទឹងត្រែង ដើម្បីបន្តនីតិវិធី ។
ក្នុងប្រតិបត្តិការនេះ សមត្ថកិច្ចដកហូតបានវត្ថុតាង រួមមាន ៖ ឧបករណ៍ឆក់ត្រី ប្រភេទក្តៅ-ត្រជាក់ ០១គ្រឿង ព្រមទាំងខ្សែភ្លើង ៥ម៉ែត្រ និងកាបូបស្ពាយ ម៉ូតូម៉ាក់សង់ ០៥ ពណ៌ក្រហម ០១គ្រឿង ទូរសព្ទដៃ ០១គ្រឿង និងប្រាក់រៀលចំនួន ៣៥៦,៥០០រៀល ។
តាមការស្រាវជ្រាវយ៉ាងល្អិតល្អន់របស់លោក យាម សាវុន នាយរងខណ្ឌរដ្ឋបាលជលផល និងតាមចម្លើយសារភាពរបស់ជនសង្ស័យ បានឱ្យដឹងថា ខ្លួនបានទិញឧបករណ៍ឆក់(ខូច)នេះ ពីបុរសម្នាក់ឈ្មោះ “លី” ។ ហើយម្ចាស់ដើមរូបនោះ មិនត្រឹមតែជាអ្នកលក់ឧបករណ៍ឱ្យប៉ុណ្ណោះទេ ថែមទាំងបានសន្យា បង្រៀន និងផ្តល់បច្ចេកទេសប្រើប្រាស់ បន្ទាប់ពីជួយជួសជុលរួច ។
ករណីនេះគឺជាសារព្រមានមួយដ៏ស្រួចស្រាវដល់សាធារណជន កុំចាញ់បោក ឬទទួលយកការអូសទាញ និងការបង្រៀនបច្ចេកទេសខុសច្បាប់ពីជនខិលខូច ។ ការប្រើប្រាស់ឧបករណ៍ឆក់ត្រី មិនត្រឹមតែជាអំពើបំផ្លាញពូជមច្ឆជាតិយ៉ាងធ្ងន់ធ្ងរប៉ុណ្ណោះទេ ប៉ុន្តែអ្នកប្រព្រឹត្តត្រូវប្រឈមមុខនឹងការបាត់បង់សេរីភាព ជាបគុកច្រវាក់ និងចំណាយថវិកាឥតប្រយោជន៍ ខណៈអ្នកបង្រៀន ឬអ្នកផ្តល់គំនិត ក៏មិនអាចគេចផុតពីសំណាញ់ច្បាប់បានឡើយ ៕
ចែករំលែកព័តមាននេះ