ទីក្រុងព្យុងយ៉ាង៖ កូរ៉េខាងជើងទើបតែបាញ់មីស៊ីលផ្លោងយ៉ាងតិចមួយគ្រាប់ធ្លាក់ចូលទៅក្នុងសមុទ្រជប៉ុននៅថ្ងៃនេះ។ នេះបើយោងតាមសេចក្ដីជូនដំណឹងពីយោធាកូរ៉េខាងត្បូង។ ការបាញ់មីស៊ីលលើកនេះធ្វើឡើងបន្ទាប់ពីរដ្ឋាភិបាលទីក្រុងព្យុងយ៉ាងនិយាយវាយប្រហារយ៉ាងចាស់ដៃចំពោះប្រទេសជប៉ុនព្រោះជប៉ុនចាប់ផ្ដើមពង្រីកកម្លាំងយោធារបស់ខ្លួនកាន់តែខ្លាំងឡើងៗពីមួយថ្ងៃទៅមួយថ្ងៃនៅមហាសមុទ្រប៉ាស៊ីហ្វិច។ អគ្គសេនាធិការដ្ឋានចម្រុះកងទ័ពកូរ៉េខាងត្បូងថ្លែងថាយោធារបស់យើងចាប់បានសញ្ញាថាមានមីស៊ីលផ្លោងមួយគ្រាប់បាញ់ចេញពីតំបន់វុនសាន (Wonsan) នៃប្រទេសកូរ៉េខាងជើងនៅវេលាម៉ោង៥ល្ងាច។ ក្រសួងការពារជាតិជប៉ុនបង្ហោះសារនៅលើបណ្ដាញអ៊ិចថាមានវត្ថុអ្វីម៉្យាងដូចជាគ្រាប់មីស៊ីលត្រូវបានបាញ់ចេញពីទឹកដីកូរ៉េខាងជើង។
ក្រោយមក ក្រសួងដដែលបង្ហោះសារមួយទៀតបញ្ជាក់ថាមីស៊ីលនោះមិនបានបង្កផលប៉ះពាល់អ្វីចំពោះប្រទេសជប៉ុនទេ។ អគ្គសេនាធិការចម្រុះកូរ៉េខាងត្បូងថ្លែងថារដ្ឋាភិបាលរបស់ខ្លួនចាប់ផ្ដើមពង្រឹងការឃ្លាំមើល និងត្រៀមជើងព្រួលទុកជាមុន ក្រែងលោកូរ៉េខាងជើងបាញ់មីស៊ីលបន្ថែមទៀត។ ទន្ទឹមនឹងនោះ កូរ៉េខាងត្បូងបន្តចែករំលែកព័ត៌មានសម្ងាត់ជាមួយសម្ព័ន្ធមិត្តរបស់ខ្លួនគឺអាមេរិក និងជប៉ុន។ កូរ៉េខាងជើងនៅតែអះអាងម្ដងហើយម្ដងទៀតថាខ្លួនឥឡូវនេះជារដ្ឋនុយក្លេអ៊ែរបាត់ទៅហើយ ហើយឋានៈនេះមិនអាចប្រែក្រឡាស់វិញជាដាច់ខាត។ រដ្ឋមន្ត្រីការពារជាតិជប៉ុនមានប្រសាសន៍កាលពីដើមសប្ដាហ៍នេះថាយោធាជប៉ុនចាំបាច់ត្រូវតែពង្រីកសមត្ថភាពរបស់ខ្លួនបន្ថែមទៀតនៅក្នុងអ្វីដែលលោកហៅថាការប្រញឹកដៃនៅក្នុងគ្រាអាសន្ន។ រដ្ឋាភិបាលជប៉ុនក៏ទើបតែចេញសៀវភៅសវាយតម្លៃអំពីការគំរាមកំហែងពីសំណាក់ប្រទេសរុស្ស៊ី ចិន និងកូរ៉េខាងជើង។
កាលពីម្សិលមិញ ប្អូនស្រីលោកគីមជុងអ៊ុន និងជាស្ត្រីដ៏មានឥទ្ធិពលបំផុតនៅកូរ៉េខាងជើង គឺលោកស្រីគីមយូជុង ប្រកាសតាមទូរទស្សន៍ជាតិថាថ្នាក់ដឹកនាំនៃរបបក្រុងព្យុងយ៉ាងនឹងដាក់ចេញនូវជម្រើសយោធាមួយចំនួននៅលើតុដើម្បីរត់ឱ្យទាន់សភាពការណ៍ដែលជប៉ុនកំពុងពង្រីកកម្លាំងយោធារបស់ខ្លួន។ នៅដំណាក់កាលចុងក្រោយនេះ កូរ៉េខាងជើងចាប់ផ្ដើមពង្រីកទំនាក់ទំនងសេដ្ឋកិច្ច និងយោធាកាន់តែស៊ីជម្រៅជាមួយប្រទេសរុស្ស៊ី។ កូរ៉េខាងជើងបានបញ្ជូនកងទ័ព និងគ្រាប់រំសេវយ៉ាងច្រើនសន្ធឹកសន្ធាប់ទៅជួយរុស្ស៊ីនៅក្នុងការធ្វើសង្គ្រាមទល់នឹងអ៊ុយក្រែន។ ជាថ្នូរត្រឡប់មកវិញ រុស្ស៊ីផ្ដល់ស្បៀងអាហារ ជំនួយហិរញ្ញវត្ថុ ថាមពល និងបច្ចេកវិទ្យាយោធា។ នេះបើយោងតាមការប្រមើលមើលរបស់អ្នកវិភាគ។ កូរ៉េខាងជើងក៏ឧស្សាហ៍និយាយរំលឹកផងដែរថាកូរ៉េខាងត្បូងជាសត្រូវធំទីមួយរបស់ខ្លួន។
ក្រសួងការពារជាតិជប៉ុនសូមមិនធ្វើអត្ថាធិប្បាយចំពោះពាក្យសម្ដីរបស់លោកស្រីគីមយូជុងទេ។ ក្រសួងគ្រាន់តែនិយាយដោយប្រយោលថាកម្លាំងយោធារបស់ខ្លួននៅទាបនៅឡើយទេ ហើយក៏មិនមមានគោលបំណងគំរាមកំហែងប្រទេសដទៃទៀតនោះដែរ។ កម្លាំងយោធារបស់យើងប៉ុណ្ណឹងគ្មានគោលដៅធ្វើសង្គ្រាមទេ យើងគ្រាន់តែចង់ទប់ស្កាត់មិនឱ្យកើតមានសង្គ្រាមនាពេលអនាគតតែប៉ុណ្ណោះ ចង់បង្កើនសមត្ថភាពការពារខ្លួនឱ្យបានរឹងមាំ និងស្របទៅតាមស្មារតីនៃរដ្ឋធម្មនុញ្ញបែបសន្តិភាពនិយមរបស់យើង និងស្របទៅតាមច្បាប់អន្តរជាតិ។
កាលពីឆ្នាំ២០២៥ ជប៉ុនបង្កើនខ្ទង់ថវិកាការពារជាតិលើសមុន៩,៧%។ មានន័យថាកើនឡើងដល់ចំនួន៦២,២ពាន់លានដុល្លារ ឬ១,៤%នៃជីឌីភីប្រចាំឆ្នាំរបស់ខ្លួន។ ការពង្រីកកម្លាំងយោធារបស់ជប៉ុនក៏ធ្វើឱ្យប្រទេសចិនភ្ញាក់ផ្អើលផងដែរ។ ចិនចាត់ទុកថានេះជាមាគ៌ាឆ្ពោះទៅរករបបដឹកនាំបែបយោធានិយមជាថ្មី។ នៅក្នុងបញ្ហានុយក្លេអ៊ែររបស់កូរ៉េខាងជើង ប្រធានាធិបតីកូរ៉េខាងត្បូង លោកលីជេម្យុង ហាក់ដូចជាប្រើភាសាទន់ភ្លន់។ លោកបោះដៃទៅរករបបកុ្រងព្យុងយ៉ាងដើម្បីស្នើសុំចរចាគ្នាដោយគ្មានបុរេលក្ខខណ្ឌ។ ប៉ុន្តែកូរ៉េខាងជើងរក្សាភាពស្ងប់ស្ងាត់មិនឆ្លើយតបនឹងសំណើនេះទេ៕ ប្រភព៖ Euro News
ចែករំលែកព័តមាននេះ