ខេត្តស្ទឹងត្រែង ៖ បុរសម្នាក់ បានស្លាប់នៅក្នុងឧបទ្ទវហេតុឆ្លងចរន្តអគ្គិសនីពីឧបករណ៍ឆក់ត្រីរបស់ខ្លួនឯង។ សពត្រូវបានក្រុមគ្រួសាររកឃើញ និងរាយការណ៍ជូនសមត្ថកិច្ចចុះពិនិត្យកាលពីវេលាម៉ោង០៩និង១៦នាទីព្រឹកថ្ងៃទី០៥ ខែសីហា ឆ្នាំ២០
២៦ នៅចំណុចថ្មដា ស្ថិតក្នុងភូមិស្ដៅ១ ឃុំស្ដៅ ស្រុកសេសាន ខេត្តស្ទឹងត្រែង ។
យោងតាមរបាយការណ៍របស់សមត្ថកិច្ច ឱ្យដឹងថា ដោយមានការអនុញ្ញាតពីលោក ស៊ិន សុហឹង ព្រះរាជអាជ្ញារង នៃអយ្យការអមសាលាដំបូងខេត្តស្ទឹងត្រែង កម្លាំងជំនាញ នៃអធិការដ្ឋាននគរបាលស្រុកសេសាន បានសហការជាមួយការិយាល័យនគរបាលបច្ចេកទេស និងវិទ្យាសាស្ត្រ អាជ្ញាធរដែនដី និងគ្រូពេទ្យជំនាញ ដឹកនាំដោយលោក ស៊ើម ឌីណា អភិបាលរងស្រុកសេសាន និងលោក មី សុគន្ធ ប្រធានក្រុមការងារចំពោះកិច្ច បានចុះបង្កើតគណៈកម្មការត្រួតពិនិត្យ និងកោសល្យវិច័យលើសាកសព។ សពជនរងគ្រោះ មានឈ្មោះ ស្រួច សានាង ភេទប្រុស អាយុ ២៨ឆ្នាំ មុខរបរកសិករ មានទីលំនៅកន្លែងកើតហេតុខាងលើ ។
តាមការឆ្លើយបំភ្លឺពីបងប្រុសបង្កើតរបស់ជនរងគ្រោះ បានឱ្យដឹងថា កាលពីថ្ងៃទី០៤ ខែសីហា ដោយសារមិនឃើញប្អូនប្រុសត្រឡប់មកផ្ទះវិញ លោកក៏បានដើរស្វែងរក ហើយបានប្រទះឃើញសពប្អូនប្រុសនៅក្នុងទឹកអូរសេវ ដោយមានបំពាក់កូមនៅក្បាល និងមានទូកផ្ទុកឧបករណ៍ឆក់ត្រី (ក្បាលឆក់ និងអាគុយ ៧០ អំពែរ ចំនួន ០២ គ្រឿង) ព្រមទាំងត្រីមួយចំនួន។
ផ្អែកលើការពិនិត្យកោសល្យវិច័យរបស់សមត្ថកិច្ចជំនាញ និងការបញ្ជាក់ពីលោកគ្រូពេទ្យ ពៅ ភិរម្យ នៃមណ្ឌលសុខភាពស្ដៅ បានសន្និដ្ឋានថា ជនរងគ្រោះពិតជាបានស្លាប់ដោយសារឆ្លងចរន្តអគ្គិសនីពីឧបករណ៍ឆក់ត្រី ដែលខ្លួនបានប្រព្រឹត្តពិតប្រាកដមែន ។
បច្ចុប្បន្ន សពត្រូវបានសមត្ថកិច្ចប្រគល់ជូនគ្រួសារ ដើម្បីយកទៅធ្វើបុណ្យតាមប្រពៃណី ។
អាជ្ញាធរ និងសមត្ថកិច្ចជំនាញ សូមឲ្យចូលរួម លុបបំបាត់ឧបករណ៍ឆក់ត្រីខុសច្បាប់ ដើម្បីការពារជីវិត និងធនធានមច្ឆាជាតិព្រឹត្តិការណ៍ដ៏រន្ធត់នេះ គឺជាសារដាស់តឿន និងជាមេរៀនដ៏ជូរចត់មួយទៀតចំពោះអ្នក ដែលនៅតែបន្តប្រើប្រាស់ «ឧបករណ៍ឆក់ត្រី» ដែលជាឧបករណ៍ល្មើសច្បាប់ និងមានគ្រោះថ្នាក់បំផុត ។
ឧបករណ៍ឆក់ ដែលមានចរន្តអគ្គិសនីកម្លាំងខ្លាំង បានសម្លាប់ និងបំផ្លាញពូជត្រី តូច ធំ ស៊ុតត្រី និងកូនត្រីតូចៗ រួមទាំងកម្ទេចប្រព័ន្ធអេកូឡូស៊ីក្នុងប្រភពទឹកធម្មជាតិយ៉ាងធ្ងន់ធ្ងរ ដែលធ្វើឱ្យបាត់បង់ផលនេសាទទៅថ្ងៃអនាគត ។
ពាក់ព័ន្ធករណីជាក់ស្ដែងនេះ អាជ្ញាធរ និងសមត្ថកិច្ចជំនាញសូមអំពាវនាវយ៉ាងទទូចដល់បងប្អូនប្រជាពលរដ្ឋទាំងអស់ សូមបញ្ឈប់រាល់សកម្មភាពប្រើប្រាស់ឧបករណ៍ឆក់ត្រី និងឧបករណ៍នេសាទខុសច្បាប់គ្រប់ប្រភេទជាបន្ទាន់ ដើម្បីការពារសុវត្ថិភាពជីវិតផ្ទាល់ខ្លួន និងចូលរួមថែរក្សាការពារធនធានមច្ឆាជាតិ ឱ្យបានគង់វង្ស សម្រាប់កូនចៅជំនាន់ក្រោយ ៕
ចែករំលែកព័តមាននេះ