ទីក្រុងតេអេរ៉ង់៖ អ៊ីរ៉ង់ព្រមានបណ្ដាប្រទេសនៅឈូងសមុទ្រពែក្សថាប្រសិនបើអាមេរិកបើកការវាយប្រហារជាថ្មី ខ្លួននឹងវាយប្រហារទីតាំងផលិតថាមពលសំខាន់ៗនៅទូទាំងតំបន់នេះ។ នេះបើយោងតាមប្រភពចំនួន៥ដែលបង្ហើបប្រាប់អ្នកសារព័ត៌មាន។ ការព្រមាននេះកើតឡើងចំពេលដែលអ៊ីរ៉ង់ព្យាយាមធ្វើឱ្យចំណាត់ការយោធាមកលើខ្លួនរងការខាតបង់កាន់តែធ្ងន់ធ្ងរព្រោះខ្លួននឹងវាយប្រហារសម្ព័ន្ធមិត្តដ៏ជិតស្និទ្ធរបស់អាមេរិកកាន់តែខ្លាំង។ ការព្រមាននេះត្រូវបានបញ្ជូនបន្តតាមរយៈបណ្ដាញទំនាក់ទំនងការទូតជាន់ខ្ពស់បន្ទាប់ពីលោកដូណាល់ត្រាំគំរាមកាលពីថ្ងៃទី២៨ ខែកក្កដាថានឹងវាយប្រហារទីតាំងផលិតថាមពល និងហេដ្ឋារចនាសម្ព័ន្ធរបស់អ៊ីរ៉ង់ បើអ៊ីរ៉ង់មិនព្រមចរចាគ្នាឱ្យមានកិច្ចព្រមព្រៀងនោះទេ។
មន្ត្រីជាន់ខ្ពស់រដ្ឋាភិបាលអ៊ីរ៉ង់២នាក់ រួមទាំងប្រភព២នាក់នៅឈូងសមុទ្រ និងអ្នកការទូតជាន់ខ្ពស់ម្នាក់ប្រចាំតំបន់អះអាងថារដ្ឋមន្ត្រីការបរទេសអ៊ីរ៉ង់ លោកអាបាស់ អារ៉ាក់ឈី និយាយទៅកាន់សមភាគីអារ៉ាប៊ីសាអូឌីត តួកគី កាតា និងអគ្គបញ្ជាការកងទ័ពប៉ាគីស្ថាន។ លោកសូមជំរុញឱ្យក្រុមប្រទេសសម្ព័ន្ធមិត្តអាមេរិកនៅឈូងសមុទ្រប្រើប្រាស់ទំនាក់ទំនងជាមួយលោកត្រាំដើម្បីនិយាយបញ្ចុះបញ្ចូលគាត់កុំឱ្យវាយប្រហារអ៊ីរ៉ង់សាជាថ្មី។ លោកព្រមានថាប្រសិនបើអាមេរិកនៅតែជម្នះចិត្តវាយអ៊ីរ៉ង់ ពេលនោះ អ៊ីរ៉ង់នឹងវាយសងសឹកវិញទៅលើទ្រព្យសម្បត្តិរបស់អាមេរិក និងរោងចក្រផលិតថាមពលទូទាំងតំបន់ឈូងសមុទ្រជាមិនខាន។
អ្នកការទូតរូបនោះថ្លែងបន្តទៀតថាសាររបស់លោកអារ៉ាក់ឈីនៅរក្សាដដែលគឺថាឱ្យតែអាមេរិកហ៊ានវាយអ៊ីរ៉ង់ អ៊ីរ៉ង់ត្រូវតែវាយបកវិញ។ ប៉ុន្តែលោកយល់ថាមធ្យោបាយល្អប្រសើរបំផុតគឺដោះស្រាយបញ្ហាតាមការទូតដើម្បីជៀសវាងការពង្រីកសង្គ្រាមកាន់តែខ្លាំងដែលនាំឱ្យមានការខូចខាតកាន់តែធំធេង។ ប្រភពម្នាក់ប្រាប់ថាការព្រមានរបស់អ៊ីរ៉ង់លើកនេះមានលក្ខណៈខ្លាំងក្លាជាងពេលណាទាំងអស់។ បើអាមេរិកហ៊ានវាយប្រហារហេដ្ឋារចនាសម្ព័ន្ធរបស់អ៊ីរ៉ង់ អ៊ីរ៉ង់នឹងវាយសងសឹកវិញទៅលើទីតាំងផលិតថាមពលនៅទូទាំងតំបន់មជ្ឈិមបូព៌ា និងគោលដៅដទៃទៀត។ នេះជាការបង្ហាញថាអ៊ីរ៉ង់ព្យាយាមប្រើប្រាស់ការគំរាមកំហែងវាយបំផ្លិចបំផ្លាញទ្រព្យសម្បត្តិនៅក្នុងតំបន់ទុកជាលក្ខខណ្ឌដោះដូរមិនឱ្យអាមេរិកវាយប្រហារមកលើខ្លួន។ ហេតុនេះ វាជាការដាក់សម្ពាធទៅលើបណ្ដាប្រទេសនៅឈូងសមុទ្រពែក្សដែលមានមូលដ្ឋានយោធាអាមេរិកតាំងនៅ និងដែលពឹងផ្អែកទៅលើការនាំប្រេងចេញ។ ពួកគេត្រូវរារែកចិត្តនៅក្នុងបញ្ហានេះ។
រាជទាយាទអារ៉ាប៊ីសាអូឌីត ព្រះអង្គម្ចាស់ប៊ីនសាល់ម៉ាន់ មានព្រះរាជបន្ទូលជាមួយលោកត្រាំ និងជំរុញឱ្យលោកពន្យារពេលបើកប្រតិបត្តិការសឹកជាបណ្ដោះសិនដើម្បីយកពេលនេះចរចាគ្នា ធ្វើយ៉ាងណាឱ្យមានបទឈប់បាញ់ និងឈានទៅរកដំណោះស្រាយផ្នែកការទូត។ នេះបើយោងតាមអ្នកការទូតជាន់ខ្ពស់ម្នាក់ និងប្រភពជាច្រើនទៀតនៅឈូងសមុទ្រ។ ប្រភពដទៃទៀតអះអាងការព្រមានរបស់អ៊ីរ៉ង់លើកនេះមានចេតនាដាស់តឿនទៅដល់បណ្ដាប្រទេសនៅឈូងសមុទ្រទាំងអស់។ ប្រទេសកាតា អូម៉ង់ និងអារ៉ាប៊ីសាអូឌីតសុទ្ធតែបានជំរុញឱ្យទីក្រុងវ៉ាស៊ីនតោនចាប់ផ្ដើមចរចាគ្នាឡើងវិញជាមួយអ៊ីរ៉ង់ដើម្បីមិនឱ្យមានសង្គ្រាមសាជាថ្មី។ កាលពីថ្ងៃទី២ ខែសីហា លោកត្រាំប្រកាសថាលោកសម្រេចចិត្តមិនវាយប្រហារអ៊ីរ៉ង់ទេ។ ប៉ុន្តែអ៊ីរ៉ង់ត្រូវតែចរចាគ្នាឱ្យមានកិច្ចព្រមព្រៀងជាប្រញាប់៕ ប្រភព៖ Reuters
ចែករំលែកព័តមាននេះ