សហរដ្ឋអាមេរិក ៖ ប្រធានាធិបតីអាមេរិក លោក ដូណាល់ ត្រាំ (Donald Trump) នៅថ្ងៃទី៦ ខែសីហា ឆ្នាំ២០២៦ បានបដិសេធរបាយការណ៍ដែលថា សហរដ្ឋអាមេរិកកំពុងប្រឈមមុខនឹងការខ្វះខាតគ្រាប់រំសេវសំខាន់ៗ ដោយលោកសង្កត់ធ្ងន់ថា ប្រទេសនេះមានស្តុកទុកគ្រាប់ដ៏ច្រើនសន្ធឹកសន្ធាប់ ហើយលោកព្រមទាំងបានព្រមានដែរថា អ្នកដែលទទួលខុសត្រូវចំពោះការលេចចេញព័ត៌មានបែបនេះ នឹងត្រូវប្រឈមមុខការកាត់ទោស។ នេះបើយោងតាមទីភ្នាក់ងារសារព័ត៌មាន Anadolu របស់ប្រទេសតួកគីយ៉េ និង Euronews បានចេញផ្សាយ។
លោក ត្រាំ បានសរសេរនៅក្នុងការបង្ហោះលើបណ្តាញទំនាក់ទំនងសង្គម Truth Social ដូច្នេះថា «សហរដ្ឋអាមេរិកមានគ្រាប់រំសេវក្នុងចំនួនដ៏ច្រើនលើសលប់ ជាពិសេសគ្រាប់ប្រភេទជាក់លាក់មួយចំនួន។ លើសពីនេះ ចំនួនដ៏ច្រើនកំពុងត្រូវបានផលិត និងដឹកជញ្ជូនមកសហរដ្ឋអាមេរិកតាមតម្រូវការ។ បណ្តាក្រុមហ៊ុនការពារជាតិកំពុងសាងសង់រោងចក្រផលិតក្នុងចំនួនដ៏ច្រើនបំផុតក្នុងប្រវត្តិសាស្ត្រប្រទេសរបស់យើង»។
ទន្ទឹមជាមួយគ្នានោះ លោកបានបន្ថែមទៀតថា «អ្នកដែលទម្លាយព័ត៌មាននៃសេចក្តីថ្លែងការណ៍ក្បត់ជាតិទាំងនេះ កំពុងត្រូវបានតាមរក។ ទោសដាក់ពន្ធនាគាររយៈពេលវែងនឹងត្រូវលើកឡើងដើម្បីដាក់បន្ទុក!»។
សេចក្តីថ្លែងការណ៍នេះបានធ្វើឡើង បន្ទាប់ពីប្រព័ន្ធផ្សព្វផ្សាយអាមេរិកជាច្រើនបានរាយការណ៍ថា ការខ្វះខាតស្តុកគ្រាប់មីស៊ីលស្ទាក់ចាប់ គឺជាកត្តាមួយដែលធ្វើឱ្យរដ្ឋបាលរបស់លោក សម្រេចចិត្តផ្អាកការវាយប្រហារបន្ថែមទៀតលើប្រទេសអ៊ីរ៉ង់។ តួយ៉ាង CNN ក៏បានរាយការណ៍ដែរថា កង្វះខាតមីស៊ីលរយៈចម្ងាយឆ្ងាយ និងមីស៊ីលស្ទាក់ចាប់សម្រាប់ការការពារដែនអាកាស បានជះឥទ្ធិពលដល់យុទ្ធសាស្ត្ររបស់លោក ត្រាំ នៅក្នុងជម្លោះជាមួយអ៊ីរ៉ង់ ដោយសារកងទ័ពអាមេរិកបានប្រើប្រាស់អស់ជិត ៨០% នៃស្តុកមីស៊ីលស្ទាក់ចាប់ប្រភេទ THAAD របស់ខ្លួន៕
ចែករំលែកព័តមាននេះ