កម្មការិនីម្នាក់ប្តឹងថា ត្រូវស្ត្រីប្លែកមុខទះស្មាដាក់ថ្នាំ យកលុយនិងគ្រឿងអលង្ការអស់ជាង៣ពាន់ដុល្លារ ដែលខំសន្សំទុកធ្វើផ្ទះ
- ភ្នំពេញ
រាជធានីភ្នំពេញ៖ នាងកម្មការិនីរោងចក្រកាត់ដេរម្នាក់ និងប្ដីបាននាំគ្នាជិះម៉ូតូកង់បីទៅដាក់ពាក្យបណ្ដឹង នៅប៉ុស្តិ៍នគរបាលរដ្ឋបាលចោមចៅទី៣ ខណ្ឌពោធិ៍សែនជ័យ ដោយនាងបានអះអាងថាមានស្ត្រីម្នាក់ទៀតទះស្មាដាក់ថ្នាំ ធ្វើឲ្យនាងភាំងស្មារតី ។ បន្ទាប់មកស្ត្រីជាជនសង្ស័យរូបនោះហៅនាងឡើងជិះម៉ូតូជាមួយបក្ខពួកម្នាក់ទៀតដែលជាបុរស លុះទៅដល់កន្លែងស្ងាត់ បានយកលុយនិងគ្រឿងអលង្ការពីក្នុងកាបូបរបស់នាងសរុបចំនួនជាង៣.០០០ដុល្លារ រួចជនសង្ស័យក៏បានគេចខ្លួនបាត់ដោយសុវត្ថិភាព ។ ប៉ុន្តែនគរបាលប៉ុស្តិ៍ចោមចៅទី៣ បានប្រាប់ឲ្យនាងទៅដាក់បណ្ដឹងនៅឯប៉ុស្តិ៍នគរបាលរដ្ឋបាលកំបូល ខណ្ឌកំបូលវិញ ព្រោះទីតាំងកើតហេតុស្ថិតនៅក្នុងភូមិសាស្ត្រសង្កាត់កំបូលឯណោះទេ ។
ហេតុការណ៍ខាងលើបានកើតឡើងកាលពីវេលាម៉ោងជាង១១ព្រឹក ថ្ងៃទី០៥ ខែសីហា ឆ្នាំ២០២៦ ស្ថិតនៅតាមផ្លូវលេខ៤២(ផ្លូវបែកចាន-ភ្នំបាសិទ្ធ) ត្រង់ចំណុចមុខវត្តអង្គបឹងចក ក្នុងភូមិអង្គបឹងចក សង្កាត់កំបូល ខណ្ឌកំបូល រាជធានីភ្នំពេញ ។
នារីរូបនោះឈ្មោះរ៉ែម ចាន់រ៉ា អាយុ៣២ឆ្នាំ មុខរបរកម្មការិនីរោងចក្រកាត់ដេរ បច្ចុប្បន្នស្នាក់នៅផ្ទះជួលក្នុងភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ។ នាងបានអះអាងថាបានបាត់បង់ប្រាក់ចំនួន១.០០០ដុល្លារ ដែលទើបតែដកចេញពីធនាគារថ្មីៗ រួមទាំងចិញ្ចៀនមាស៣វង់ និងកងដៃ១វង់ ដែលមានតម្លៃសរុបជាង២.០០០ដុល្លារទៀតផងដែរ ហើយទ្រព្យសម្បត្តិទាំងនេះនាងនិងប្ដីទុកសម្រាប់សាងសង់ផ្ទះរស់នៅផងឥឡូវត្រូវបាត់បង់អស់ទៅវិញ ។
នាងបាននិយាយប្រាប់នគរបាលបន្តទៀតថា នៅវេលាព្រឹកថ្ងៃកើតហេតុ ពេលនាងដើរចេញពីរោងចក្រ ដើម្បីហូបបាយថ្ងៃត្រង់ ក៏ជួបស្ត្រីជាជនសង្ស័យម្នាក់នៅចំណុចមុខរោងចក្រដែលនាងធ្វើការ ។ ស្ថិតនៅជិតផ្លូវរថភ្លើងខ្សែរាជធានីភ្នំពេញ-ខេត្តកំពត ក្នុងភូមិអង្គ សង្កាត់ចោមចៅទី៣ ខណ្ឌពោធិ៍សែនជ័យ ខណៈនោះជនសង្ស័យខាងលើបានសួរនាំនាងពីនេះពីនោះ ។ បន្ទាប់មកជនសង្ស័យបានទះស្មាដាក់ថ្នាំនាងធ្វើឲ្យនាងបាត់បង់ស្មារតី ហើយបន្ទាប់មកទៀតស្ត្រីជាជនសង្ស័យខាងលើ បាននាំនាងឡើងជិះម៉ូតូ១គ្រឿងរបស់បក្ខពួកដែលជាបុរសម្នាក់ទៀត ។
នាងកម្មការិនីបាននិយាយបន្តថា ជនសង្ស័យទាំង២នាក់បាននាំនាងរហូតទៅដល់ផ្លូវលេខ៤២ (ផ្លូវបែកចាន-ភ្នំបាសិទ្ធ )ត្រង់ចំណុចមុខវត្តអង្គបឹងចក ភូមិអង្គបឹងចក សង្កាត់កំបូល ខណ្ឌកំបូល ជនសង្ស័យក៏បានយកប្រាក់១ពាន់ដុល្លារ និងគ្រឿងអលង្ការដែលមានតម្លៃសរុបជាង២ពាន់ដុល្លារទៀតពីក្នុងកាបូបរបស់នាង រួចនាំគ្នាជិះម៉ូតូគេចខ្លួនបាត់អស់ ។ មុនពេលចញទៅនោះ ជនសង្ស័យបានយកទូរស័ព្ទនាងបិទសញ្ញាយន្តហោះមិនអាចឲ្យនាងខលទៅណា ឬខលរកប្ដីបានទេ សូម្បីតែមិត្តភក្ដិរបស់នាងដែលមិនបានឃើញគាត់ទៅធ្វើការ ពេលថ្ងៃ និងបានខលរកនាង ក៏ខលមិនចូលដែរ ។
នាងបានបញ្ជាក់បន្ថែមទៀតថា រហូតក្រោយពេលជនសង្ស័យទៅបាត់អស់ នាងបានយកទូរស័ព្ទមកបើកសញ្ញាយន្តហោះវិញ ទើបអាចខលហៅប្ដីឲ្យជិះម៉ូតូកង់បីទៅយកនាងពីកន្លែងកើតហេតុ រួចបានទៅដាក់ពាក្យប្ដឹងនៅប៉ុស្តិ៍ចោមចៅទី៣ ខណ្ឌពោធិ៍សែនជ័យ ។ ប៉ុន្តែក្រោយពីការសាកសួរនាងមួយជំហានរួចមក នគរបាលប៉ុស្តិ៍ខាងលើ ក៏បានប្រាប់ឲ្យទៅប្ដឹងនៅប៉ុស្តិ៍នគរបាលរដ្ឋបាកំបូលវិញ ព្រោះទីតាំងកើតហេតុស្ថិតនៅក្នុងភូមិសាស្ត្រសង្កាត់កំបូល ខណ្ឌកំបូល។
ទាក់ទិនទៅនិងករណីនេះនគរបាលពុំទាន់អាចសន្មត់ថាជាករណីអ្វីឲ្យប្រាកដនៅឡើយទេ នាងថាត្រូវជនសង្ស័យទះស្មាដាក់ថ្នាំ ប៉ុន្តែមិនមានថ្នាំឯណាត្រឹមតែទះស្មាធ្វើឲ្យមនុស្សវង្វេងបាននោះទេ ទាល់តែយកថ្នាំនោះមកឲ្យហិតនិងច្រមុះ ឬដាក់នៅក្នុងទឹក និងភេសជ្ជៈឲ្យផឹក ទើបអាចទៅរួច ។ បើថានាងចាញ់បោកក្រុមចោរទម្លាក់យោងវិញ ក៏ពុំទាន់ប្រាកដនោះដែរ ព្រោះភាគច្រើនបំផុតក្រុមចោរទម្លាក់យោងតែងតែមានបន្សល់ទុកនូវគ្រឿងអលង្ការកាឡៃ ឬ គ្រាប់និងវត្ថុផ្សេងៗជាថ្នូរឲ្យជនរងគ្រោះក្រោយធ្វើសកម្មភាពរួច ប៉ុន្តែករណីខាងលើអត់មានបន្សល់វត្ថុតាងអ្វីសោះ ។ ដូច្នេះករណីនេះក៏សង្ស័យថាអាចជារឿងផ្សេងទៀតផងដែរ តែថានាងមិនហ៊ាននិយាយការពិតតែប៉ុណ្ណោះ ប៉ុន្តែទោះបីជាបែបណាពេលនេះកម្លាំងប៉ុស្តិ៍នគរបាលរដ្ឋបាលកំបូល ខណ្ឌកំបូល កំពុងធ្វើការស្រាវជ្រាវលើករណីនេះយ៉ាងដុតដៃដុតជើងហើយ មិនបានព្រងើយកន្តើយនោះទេ ៕
ចែករំលែកព័តមាននេះ