រាជធានីភ្នំពេញ ៖ ជនមិនស្គាល់មុខ បានច្រកសពទារិកាម្នាក់ ដែលទើបតែកើតថ្មីៗ នៅក្នុងថង់ រួចយកទៅបោះចោលនៅក្នុងធុងសំរាម១ ហើយត្រូវបានបុរសអ្នករើសអេតចាយម្នាក់ ប្រទះឃើញ ក៏ប្រាប់លោកតាអាចារ្យ ឲ្យរាយការណ៍ជូននគរបាលចុះទៅពិនិត្យមើល ។
ហេតុការណ៍នោះបានកើតឡើងបង្កឲ្យមានការភ្ញាក់ផ្អើល កាលពីវេលាម៉ោង១០និង៣០នាទីព្រឹកថ្ងៃទី០៥ ខែសីហា ឆ្នាំ២០២៦ នៅក្បែរចេតិយ៍ក្នុងវត្តតាំងកសាងខាងត្បូង ស្ថិតនៅក្នុងភូមិចំការឪឡឹក២ សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ ។
ទារិកាខាងលើនៅមានផ្ចិតពុំទាន់ត្រូវបានពេទ្យ ឬឆ្មបកាត់ចេញទេ ហើយក៏មានឈាមប្រឡាក់ខ្លួនប្រាណនៅស្រស់ៗនៅឡើយ ដែលអាចបញ្ជាក់បានថា ទើបតែកើតមកថ្មីៗ ក៏ត្រូវគេយកទៅបោះ ដោយពុំដឹងថា បោះចោលទាំងរស់ក្រោយមកទើបស្លាប់ ឬក្រោយកើតមកស្លាប់ទើបយកសពបោះចោលនោះទេ។ នៅពេលភ្លាមៗនោះពុំមាននរណាបានដឹងថា តើឪពុកម្ដាយរបស់ទារិកានេះ ជានរណាឡើយ មិនតែប៉ុណ្ណោះក៏ពុំដឹងថា តើមូលហេតុអ្វី ទើបបានជាកូនស្លាប់ហើយ ឪពុកម្ដាយមិនយកទៅបញ្ចុះ ឬបូជាឲ្យបានត្រឹមត្រូវ បែរជាច្រកថង់ រួចយកមកបោះចោលក្នុងធុងសំរាម បែបនេះទៅវិញ ។
បុរសម្នាក់ឈ្មោះ ឡោ ផាច់ អាយុ៦២ឆ្នាំ មុខរបររើសអេតចាយស្នាក់នៅទីស្នាក់ការភូមិក្បាលដំរី១ សង្កាត់កាកាបទី១ ខណ្ឌពោធិ៍សែនជ័យ បាននិយាយថា រាល់ថ្ងៃគាត់តែងតែបានដើរចូលទៅក្នុងវត្តតាំងកសាងខាងត្បូងនោះ ដើម្បីរង់ចាំហូបបាយ ក្រោយព្រះសង្ឃឆាន់រួច។ ដោយឡែនៅវេលាម៉ោង១០និង៣០នាទីព្រឹកថ្ងៃកើតហេតុខាងលើ គាត់ក៏ដើរចូលទៅក្នុងវត្ត ដើម្បីហូបបាយថ្ងៃត្រង់ដូចរាល់ដងដែរ ហើយពេលទៅដល់ត្រង់ចំណុចកើតហេតុគាត់បានទៅបើកគម្របធុងសំរាម ដើម្បីរកសំបកដប ឬសំបកកំប៉ុងភេសជ្ជៈផ្សេងលក់អេតចាយ ។
អ្នករើសអេតចាយរូបនោះ បាននិយាយបន្តថា នៅពេលបើកគម្របធុងសំរាមនោះ បានប្រទះឃើញថង់បារីអាឡាំងដឺឡុង ១នៅក្នុងនោះ ហើយគាត់ក៏ទាញលើកយកមករលាក់មើល ស្រាប់តែឃើញសពទារិកាម្នាក់ នៅក្នុងថង់បារីនោះតែម្ដង។ បន្ទាប់មកគាត់ក៏បានរត់ទៅប្រាប់លោកតាអាចារ្យវត្តខាងលើបានដឹង និងទៅជួយមើល បង្កឲ្យមានការភ្ញាក់ផ្អើល ហើយលោកតាអាចារ្យ ក៏បានរាយការណ៍ជូននគរបាលប៉ុស្តិ៍កាកាបទី២ ដែលនៅជិតនោះដែរឲ្យចុះទៅពិនិត្យជាក់ស្ដែង ។
នគរបាលបានប្រាប់ថា ក្រោយពេលទទួលបានដំណឹងខាងលើភ្លាម កម្លាំងនគរបាលប៉ុស្តិ៍កាកាបទី២ បានចេញទៅកាន់ទីនោះ ហើយចាត់ចែងតម្កល់សពនៅឈាបនដ្ឋានវត្តតាំងកសាងខាងត្បូងនោះ ដោយរង់ចាំក្រែងឪពុកម្ដាយ ឬក្រុមគ្រួសារទៅយកធ្វើបុណ្យ ហើយបើគ្មានទេ នគរបាល នឹងបូជាសពនៅវេលាល្ងាចថ្ងៃដដែលនោះហើយ ៕
ចែករំលែកព័តមាននេះ