គោលដៅនៃការនាំចេញអង្ករឲ្យបាន១លានតោន ដែលកម្ពុជាបានដាក់ជាច្រើនឆ្នាំ ប៉ុន្តែមិនទាន់សម្រេចបាននោះ អាចនឹងឃើញលទ្ធផលវិជ្ជមាន នៅឆ្នាំ២០២៦នេះ ។
សហព័ន្ធស្រូវអង្ករកម្ពុជា នៅថ្ងៃទី៥ ខែសីហា បានអះអាងថា ៧ខែនៃ ឆ្នាំ២០២៦ កម្ពុជាបាននាំចេញអង្ករចំនួន៧០៧.០០០ តោន ដោយរកបាន៤១៥,១២លានដុល្លារ ។
តួលេខទាំងនេះ តំណាងឱ្យការកើនឡើងយ៉ាងខ្លាំងនៃបរិមាណនាំចេញពោល ដល់ទៅ៦៨ភាគរយ ហើយបើនិយាយអំពីប្រាក់ចំណូលវិញ គឺកើនឡើង៣៤,៣ភាគរយ បើប្រៀបធៀបទៅនឹងរយៈពេលដូចគ្នាកាលពីឆ្នាំមុន ។
តាមរយ:តួលេខនេះ គេរំពឹងថា កម្ពុជាទំនងជានឹងអាចសម្រេចបានការនាំចេញអង្ករ១លានតោន នៅឆ្នាំ២០២៦នេះ ។
របាយការណ៍នេះបានបញ្ជាក់ថា សហភាពអឺរ៉ុប នៅតែជាទីផ្សារធំបំផុតរបស់កម្ពុជា ពោល គឺប្រមាណជា២០៧.១៥៧ តោន ។ ក្រៅពីនោះចិន និងតំបន់ស្វយ័តរបស់ខ្លួនជាទីផ្សារអង្ករកម្ពុជា ១៧៤.៩៣០ តោន ដែលមានតម្លៃ១០៣,៣១ លានដុល្លារ ខណៈដែលរដ្ឋសមាជិកអាស៊ានចំនួនប្រាំបានទិញអង្ករ២៦៦.៣០០ តោន ក្នុងតម្លៃ ១០២,៨៤ លានដុល្លារ ។
ក្រៅពីអង្ករ កម្ពុជាក៏បាននាំចេញស្រូវជាង៣ លានតោន ក្នុងរយៈពេល៧ខែដដែលដោយរកប្រាក់ ចំណូលប្រមាណជា ៦៦៥,៧០ លានដុល្លារ ៕
ចែករំលែកព័តមាននេះ