អ្នកភូមិ ១៩គ្រួសារនៅស្ទឹងត្រែង ស្ម័គ្រចិត្តប្រគល់ដីរដ្ឋជាង ៧៥ហិកតា មកវិញ ដើម្បីដាំព្រៃស្តារធម្មជាតិ
- មណ្ឌលគិរី
ខេត្តស្ទឹងត្រែង៖ ប្រជាពលរដ្ឋ ១៩ គ្រួសាររស់នៅក្នុងឃុំព្រះរំកិល ក្នុងស្រុកបុរីអូរស្វាយសែនជ័យបានសម្រេចចិត្តរួមគ្នាប្រគល់ដីព្រៃរបស់រដ្ឋសរុបជាង ៧៥ ហិកតា ជូនមន្ត្រីជំនាញវិញដោយឥតលក្ខខណ្ឌ។នេះមិនមែនជាការបង្ខំប៉ុន្តែជាការភ្ញាក់រលឹក និងជាគំរូនៃ ស្មារតីម្ចាស់ការ ក្នុងការការពារបរិស្ថានដើម្បីកូនចៅជំនាន់ក្រោយ។
ក្រុមមន្ត្រីជំនាញបានបង្ហាញថា៖ ចេញពីការកាន់កាប់ខុសច្បាប់ មកប្រែក្លាយជាតំបន់បៃតងក្នុងសហគមន៍ ការប្រគល់ដីរដ្ឋជូនវិញនាពេលនេះ បានស្តែងឱ្យឃើញពីប្រសិទ្ធភាពនៃការអប់រំផ្សព្វផ្សាយច្បាប់។ បន្ទាប់ពីមន្ត្រីជំនាញនិងអាជ្ញាធរមូលដ្ឋាន បានចុះពន្យល់ណែនាំអំពីទិដ្ឋភាពច្បាប់ និងផលប៉ះពាល់ធ្ងន់ធ្ងរនៃការកាប់ឆ្ការព្រៃ ប្រជាពលរដ្ឋបានយល់ឃើញថា «ការអភិរក្ស គឺសំខាន់ជាងការកាន់កាប់ផ្ទាល់ខ្លួន»។ ពួកយើងបានយល់ច្បាស់ហើយថា ការកាន់កាប់ដីរដ្ឋដោយគ្មានការអនុញ្ញាត មិនត្រឹមតែខុសច្បាប់ប៉ុណ្ណោះទេ ប៉ុន្តែថែមទាំងបំផ្លាញសម្បត្តិធម្មជាតិទៀតផង»។
លោក ស៊ុន ជឿន អាយុ ៦២ ឆ្នាំ តំណាងប្រជាពលរដ្ឋទាំង ១៩ គ្រួសារ បានបញ្ជាក់ដោយក្តីរីករាយថា ពួកគាត់ស្ម័គ្រចិត្តប្រគល់ដីជូនរដ្ឋវិញ ដើម្បីរួមគ្នាដាំដើមឈើឡើងវិញ និងការពារជម្រកសត្វព្រៃទុកជាមរតកសម្រាប់កូនចៅ។
លោក ហ៊ុន សំអឿន នាយសង្កាត់រដ្ឋបាលព្រៃឈើស្ទឹងត្រែង បានឱ្យដឹងថា ភ្លាមៗបន្ទាប់ពីទទួលបានដីមកវិញ មន្ត្រីជំនាញបានត្រៀមកូនឈើប្រណិតចំនួន ១៣,៥០០ ដើមរួចជាស្រេច ក្នុងការដាំលើផ្ទៃដីទាំង ៧៥ ហិកតានោះវិញ ដើម្បីរួមគ្នារក្សាព្រៃឈើឱ្យបៃតង និងជំរុញ «គម្រោងរេដបូកមេគង្គ (REDD+) ជំហានទី១» ឱ្យសម្រេចបានជោគជ័យ។ទន្ទឹមនឹងការដាំដើម
ឈើឡើងវិញ វិធានការក្តៅលើបទល្មើសព្រៃឈើក៏នៅតែបន្តធ្វើឡើងយ៉ាងម៉ឺងម៉ាត់។
លោកនាយសង្កាត់រដ្ឋបាលព្រៃឈើស្ទឹងត្រែងបានលើកឡើងថា៖ក្នុងរយៈពេល ៦ ខែដើមឆ្នាំ ២០២៦នេះ មន្ត្រីជំនាញបាន បង្ក្រាបបទល្មើស១៤ លើកនិងបញ្ជូនសំណុំរឿងទៅតុលាការ ១១ ករណីបំផ្លាញឡធ្យូងខុសច្បាប់បាន ៨១ ឡ. ដកហូតអន្ទាក់សត្វ ៣១ អន្ទាក់, កាំភ្លើងកែច្នៃ ២ ដើម និងត្រាក់ទ័រ ១ គ្រឿង ។
បច្ចុប្បន្ន ខេត្តស្ទឹងត្រែងមានសហគមន៍ព្រៃឈើចំនួន ៦ កន្លែងដែលកំពុងការពារយ៉ាងសកម្ម។ការលះបង់ដីស្រែចំការដែលធ្លាប់អាស្រ័យផលមកឱ្យរដ្ឋវិញពីសំណាក់អ្នកភូមិ ១៩ គ្រួសារនេះ ត្រូវគេមើលឃើញថាជា «ជំហានដ៏ធំមួយ» នៃផ្លាស់ប្ដូរការគិតរបស់ប្រជាសហគមន៍ ចេញពីការទាញយកផលប្រយោជន៍បណ្តោះអាសន្ន មកជាការចូលរួមបង្កើតនិរន្តរភាពបរិស្ថានសម្រាប់អនាគត៕
ចែករំលែកព័តមាននេះ