ទំនា.ស់រឿងបាត់ខោខូវប៊យ! នារី២ក្រុមបើកឆាកប្រយុ.ទ្ធគ្នា ២ថ្ងៃក្រោយ ត្រូវនគរបាលឃាត់ខ្លួនភាគីទាំងសងខាង
- ភ្នំពេញ
រាជធានីភ្នំពេញ៖ នារី២ក្រុមដែលបម្រើការងារនៅក្នុងភោជនីយដ្ឋាន«ដៃអូន»ជាមួយគ្នា ដោយម្ខាងមានគ្នា៥នាក់និងម្ខាងទៀតមានគ្នា៤នាក់ បានមានទំនាស់គ្នារឿងភាគីម្ខាងបាត់ខោខូវប៊យ ហើយស្រាប់តែឃើញភាគីម្ខាងទៀតកំពុងស្លៀកខោរបស់ខ្លួន ។ បន្ទាប់ពីការទាស់ពាក្យសម្ដីមួយប្រាវ រួចក៏បើកឆាកប្រយុទ្ធគ្នា ពេលនោះសន្តិសុខឃាត់បំបែក ក៏ស្ងប់ស្ងាត់ទៅវិញ ហើយភ្លាមៗនោះពុំមានភាគីណាមួយប្ដឹងនគរបានទេ ប៉ុន្តែក្រោយមកមានអ្នកយករូបភាពនិងរឿងនោះទៅបង្ហោះក្នុងហ្វេសប៊ុក ធ្វើឲ្យនគរបាលប៉ុស្តិ៍សង្កាត់ព្រៃស ខណ្ឌដង្កោឃើញ ក៏ចុះធ្វើការស្រាវជ្រាវឃាត់ខ្លួនទាំងសងខាងបាន៩នាក់ចាត់ការតាមច្បាប់តែម្ដង ។
អំពើហិង្សាដោយចេតនាវាយតប់គ្នាទៅវិញទៅមកនោះបានកើតឡើង កាលពីថ្ងៃទី៣០ ខែកក្កដា ឆ្នាំ២០២៦ វេលាម៉ោង០១និង៣០នាទីយប់រំលងអធ្រាត្រ នៅត្រង់ចំណុចមុខភោជនីយដ្ឋាន«ដៃអូន» ស្ថិតនៅតាមផ្លូវបេតុង ភូមិប្រការសង្កាត់ព្រៃស ខណ្ឌដង្កោ រាជធានីភ្នំពេញ ។
នារីៗដែលត្រូវនគរបាលរឃាត់ខ្លួននោះភាគីទី១មានគ្នា៥នាក់
១.ឈ្មោះ អ៊ឹង ហ្គេចលីន អាយុ២១ឆ្នាំ ជនជាតិខ្មែរ ស្នាក់នៅផ្ទះជួល ភូមិប្រការ សង្កាត់ព្រៃស ខណ្ឌដង្កោ ។ ២.ឈ្មោះ ម៉ី លីណា អាយុ២១ឆ្នាំ ជនជាតិខ្មែរ ស្នាក់នៅផ្ទះជួល ភូមិអន្លង់គង សង្កាត់ព្រៃស ខណ្ឌដង្កោ ។ ៣.ឈ្មោះ សុត គឹមយ៉ាន អាយុ២០ឆ្នាំ ជនជាតិខ្មែរ ស្នាក់នៅផ្ទះជួល ភូមិអន្លង់គង សង្កាត់ព្រៃស ខណ្ឌដង្កោ ។ ៤.ឈ្មោះ អ៊ា សាណា អាយុ២៣ឆ្នាំ ជនជាតិខ្មែរ ស្នាក់នៅផ្ទះជួលភូមិប្រការ សង្កាត់ព្រៃស ខណ្ឌដង្កោ ។ ៥.ឈ្មោះ វណ្ណី ច័ន្ទស្រីពេជ្រ អាយុ២១ឆ្នាំ ជនជាតិខ្មែរ ស្នាក់នៅផ្ទះជួល ភូមិគោកបញ្ជាន់ សង្កាត់ចោមចៅទី២ ខណ្ឌពោធី៍សែនជ័យ ។
ដោយឡែកភាគីទី២មានគ្នា៤នាក់រួមមាន១.ឈ្មោះ ឈឹម រក្សា អាយុ១៨ឆ្នាំ ជនជាតិខ្មែរ
២.ឈ្មោះ លី ណាលីន អាយុ១៩ឆ្នាំ ជនជាតិខ្មែរ
៣.ឈ្មោះ សុខ ពិសី អាយុ២១ឆ្នាំ ជនជាតិខ្មែរ
៤.ឈ្មោះ ឈឹម កញ្ចនា អាយុ១៧ឆ្នាំ ជនជាតិខ្មែរ អ្នកទាំង៤នាក់នេះស្នាក់នៅផ្ទះជួល ភូមិប្រការ សង្កាត់ព្រៃស ខណ្ឌដង្កោ រាជធានីភ្នំពេញ ។
សមត្ថកិច្ចបានប្រាប់ឲ្យដឹងថា នៅវេលាយប់ថ្ងៃកើតហេតុខាងលើនារីម្នាក់ឈ្មោះ ម៉ី លីណា ដែលស្ថិតនៅក្នុងក្រុមភាគី១ បានបាត់ខោខូវប៊យចំនួន០២រកមិនឃើញសោះ ក្រោយមកក៏ស្រាប់តែប្រទះឃើញនារីម្នាក់ទៀតឈ្មោះ លី ណាលីន ស្ថិតនៅក្នុងក្រុមទី២កំពុងស្លៀករបស់ខ្លួន ហើយនាងក៏បានសួរនាំ ។ ពេលនោះឈ្មោះ លី ណាលីន បានប្រាប់ថា នាងបានទិញខោខូវប៊យនោះពីនារីម្នាក់ទៀតឈ្មោះ ឈឹម រក្សា បន្ទាប់មកឈ្មោះ ម៉ី លីណា ដែលជាម្ចាស់ខោក៏បានទៅសួរនាំឈ្មោះ ឈឹម រក្សា ដែលកំពុងនៅខាងមុខភោជនីយដ្ឋានដៃអូន ហើយបានចោទប្រកាន់ទៅលើនារីឈ្មោះ ឈឹម រក្សា ថាបានលួចខោខូវប៊យរបស់ខ្លួន (ម៉ី លីណា) ប៉ុន្តែឈ្មោះ ឈឹម រក្សា ប្រកែកថានាងមិនបានលួចទេ ។
សមត្ថកិច្ចបានប្រាប់ឲ្យដឹងបន្តថា បន្ទាប់មកទៀតអ្នកទាំង២គឺឈ្មោះ ម៉ី លីណា និងឈ្មោះ ឈឹម រក្សា ក៏បានទាស់ពាក្យសំដីគ្នាយ៉ាងខ្លាំង រហូតឈានដល់ការប្រើអំពើហិង្សាវាយតប់ចាប់បោចសក់វាយគ្នាទៅវិញទៅមក ហើយបក្ខពួកភាគីទាំងសងខាងក៏បានចូលទៅជួយគូកនរបស់ខ្លួន បើកឆាកប្រយុទ្អគ្នាបង្កភាពរញ៉េរញ៉ៃពេញមុខហាងនិងដងផ្លូវបណ្តាលឱ្យរងរបួសស្រាលទាំងសងខាង
។ ខណៈនោះសន្តិសុខយាមហាងបានឃាត់បំបែកអ្នកទាំងអស់គ្នាចេញ ទើបមានការស្ងប់ស្ងាត់ទៅវិញ ហើយភ្លាមៗនោះពុំមានភាគីណាមួយដាក់ពាក្យប្ដឹងសុំការអន្តរាគមន៍ពីនគរបាលឡើយ ប៉ុន្តែក្រោយមកមានអ្នកយករូបភាពនិងហេតុការណ៍នោះបង្ហោះតាមគណនីហ្វេសប៊ុក ។
សមត្ថកិច្ចបានប្រាប់បន្ថែមថា នៅពេលឃើញរឿងរ៉ាវខាងលើតាមហ្វេសប៊ុក កម្លាំងប៉ុស្តិ៍នគរបាលរដ្ឋបាលព្រៃស ខណ្ឌដង្កោ បានចុះធ្វើការស្រាវជ្រាវដល់កកន្លែងកើតហេតុ រហូតដល់ថ្ងៃទី០១ ខែសីហា ឆ្នាំ២០២៦ វេលាម៉ោង៤ល្ងាច។ កម្លាំងនគរបាលខាងលើ ក៏បានឃាត់ខ្លួនភាគីទំនាស់ទាំងសងខាងចំនួន៩នាក់នាំយកទៅសាកសួរ និងកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញចាត់ការតាមច្បាប់ ៕
ចែករំលែកព័តមាននេះ