សាងសង់ស្ថានីយបូមទឹកគីឡូម៉ែត្រលេខ៩ថ្មី មានសមត្ថភាពបូមរំដោះទឹកបាន ៨,៣៤ម៉ែត្រគូបក្នុង១វិនាទី បញ្ចៀសការជន់លិចលំនៅឋានពលរដ្ឋ
- ភ្នំពេញ
រាជធានីភ្នំពេញ ៖ ក្នុងផែនការរបស់រដ្ឋបាលរាជធានីភ្នំពេញ ត្រៀមរំដោះជំនន់ទឹកភ្លៀងបញ្ចៀសការជន់លិចផ្ទះសម្បែង និងហេដ្ឋារចនាសម្ព័ន្ធនានា ក្នុងភូមិសាស្ត្ររាជធានីភ្នំពេញ ឯកឧត្តម ឃួង ស្រេង អភិបាលរាជធានីភ្នំពេញ បានកសាងស្ថានីយបូមទឹកគីឡូម៉ែត្រលេខ៩ថ្មីមួយទៀត ស្ថិតក្នុងសង្កាត់ស្វាយប៉ាក ខណ្ឌឫស្សីកែវ ដែលមានសមត្ថភាពបូមរំដោះទឹកបាន៨,៣៤ម៉ែត្រគូបក្នុង១វិនាទី ។
ស្ថានីយបូមទឹកគីឡូម៉ែត្រលេខ៩ថ្មី បានចាប់ផ្តើមការសាងសង់ឡើងក្រោមគំនិតផ្តួចផ្តើមរបស់ឯកឧត្តមអភិបាលរាជធានីភ្នំពេញ ដោយការដ្ឋានសម្រេចបាន៩០%ហើយ គ្រោងភ្ជាប់ទុយោជាមួយស្ថានីយនៅមុនបុណ្យភ្ជុំបិណ្ឌ ដើម្បីបូមទឹកទម្លាក់ចូលទន្លេ និងគ្រោងបញ្ចប់ការដ្ឋានទាំងស្រុងនៅខែវិច្ឆិកា ឆ្នាំ២០២៦ខាងមុខនេះ ។
ស្ថានីយបូមទឹកនេះមាន ម៉ូទ័រ៤គ្រឿង ម៉ូទ័រ មុខកាត់១ម៉ែត្រ កម្លាំងបូម៩០០០ម៉ែត្រគូប/ម៉ោង មានចំនួន២គ្រឿង ។ ម៉ូទ័រមុខកាត់ ០,៨ម៉ែត្រ កម្លាំងបូម ៦០០០ម៉ែត្រគូប/ម៉ោង មានចំនួន២គ្រឿង សរុបកម្លាំងបូមទឹក ៣០ ០០០ម៉ែត្រគូប/ម៉ោង ឬ ៨,៣៤ ម៉ែត្រគូប/វិនាទី ។
លោក គន់ សោភា ប្រធានការិយាល័យសាធារណការនិងដឹកជញ្ជូនខណ្ឌឫស្សីកែវ បានឱ្យដឹងនៅព្រឹកថ្ងៃទី៣ ខែសីហា ឆ្នាំ២០២៦ថា ស្ថានីយបូមទឹកគីឡូម៉ែត្រលេខ៩ មានតួនាទីបូមរំដោះទឹកចេញពីប្រឡាយបាក់ទូក ប្រឡាយអូរវែង មកគីឡូម៉ែត្រលេខ៩ ។ ស្ថានីយបូមទឹកនេះ មិនត្រឹមតែរំដោះទឹកនៅក្នុងមូលដ្ឋានខណ្ឌឫស្សីកែវប៉ុណ្ណោះទេ គឺបានរំដោះទឹកចេញពីខណ្ឌដូនពេញ និងខណ្ឌទួលគោកថែមទៀត ។
លោក គន់ សោភា បានបន្តថា ក្រៅពីកសាងស្ថានីយបូមទឹកគីឡូលេខ៩ ជាផែនការរបស់រដ្ឋបាលរាជធានីភ្នំពេញនិងអនុវត្តតាមការចង្អុលបង្ហាញជាប់ជាប្រចាំរបស់ឯកឧត្តម ឃួង ស្រេង អភិបាលរាជធានីភ្នំពេញ អាជ្ញាធរខណ្ឌឫស្សីកែវនិងមន្ទីរសាធារណការនិងដឹកជញ្ជូនរាជធានីភ្នំពេញ បានស្តារប្រឡាយបាក់ទូក និងប្រឡាយអូរវែងថែមទៀត ដើម្បីឱ្យទឹកបានហូរលឿនឆ្ពោះមកស្ថានីយបូមទឹកគីឡូម៉ែត្រលេខ៩ ។
លោក ជិន ប៊ុនធឿន អភិបាលខណ្ឌឫស្សីកែវ បានឱ្យដឹងដែរថា ការស្តារប្រឡាយបាក់ទូក និងប្រឡាយអូរវែង ក្នុងមូលដ្ឋានខណ្ឌឫស្សីកែវ បានអនុវត្តរយៈពេល១២២ថ្ងៃមកហើយ ចាប់ពីថ្ងៃទី៩ ខែមីនា ឆ្នាំ២០២៦ ដល់ថ្ងៃទី១២ ខែកក្កដា ឆ្នាំ២០២៦ ។ ជាលទ្ធផល ប្រឡាយបាក់ទូកស្តារបានប្រវែង ៣ ៥២០ម៉ែត្រ និងប្រឡាយអូរវែងស្តារបានប្រវែង ៣ ៤៨០ម៉ែត្រសរុបប្រវែង ៧ ០០០ម៉ែត្រ ។ ប្រើប្រាស់គ្រឿង
ចក្រ និងមធ្យោបាយ១១គ្រឿង គឺរថយន្តបូមដឹកសំណល់ចេញ៥គ្រឿង អេស្កាវ៉ាទ័រដៃវែង៣គ្រឿង អេស្កាវ៉ាទ័រដៃខ្លី១គ្រឿង សាឡង់១គ្រឿង ។ ប្រឡាយទាំង២នេះ ជួយរំដោះទឹកភ្លៀងពេលមានភ្លៀងធ្លាក់ខ្លាំង ការពារពីការលិចលង់ និងជាទីតាំងយុទ្ធសាស្ត្រទទួលទឹកហូរធ្លាក់ពីស្ថានីយបូមទឹកទួលគោក ។
លោក ម៉ៅ វណ្ណា ចៅសង្កាត់គីឡូម៉ែត្រលេខ៦ នៅពេលចុះពិនិត្យមើលប្រឡាយខាងលើនាព្រឹកថ្ងៃទី៣ ខែសីហា មានប្រសាសន៍ថា ខណៈនេះ ឯកឧត្ដមអភិបាលរាជធានីភ្នំពេញឱ្យកសាងស្ថានីយបូមទឹកគីឡូម៉ែត្រលេខ៩ ថែមទៀត វានឹងធ្វើឱ្យសង្កាត់គីឡូម៉ែត្រលេខ៦ លែងប្រឈមមុខនឹងការលិចលង់ដោយជំនន់ទឹកភ្លៀងទៀតហើយ ។
លោកចៅសង្កាត់គីឡូម៉ែត្រលេខ៦ ក្នុងនាមប្រជាពលរដ្ឋ បានថ្លែងនូវការអរគុណយ៉ាងជ្រាលជ្រៅបំផុត ឯកឧត្ដម ឃួង ស្រេង អភិបាលរាជធានីភ្នំពេញ ដែលបានកសាងស្ថានីយបូមទឹកមួយនេះឡើង ធ្វើឱ្យប្រជាពលរដ្ឋលែងភ័យព្រួយពីការលិចលង់ដោយជំនន់ទឹកភ្លៀងទៀត។ជាមួយគ្នានេះ លោកចៅសង្កាត់ក៏បានអំពាវនាវឱ្យបងប្អូនប្រជាពលររដ្ឋដែលរស់នៅជាប់ប្រឡាយ សូមចូលរួមថែរក្សាប្រឡាយដែលបានស្តាររួច និងសូមវេចខ្ចប់ទុកដាក់សំរាមឱ្យបានត្រឹមត្រូវ ដើម្បីអនាម័យបរិស្ថាន និងបញ្ចៀសការលិចលង់ ៕
ចែករំលែកព័តមាននេះ