ថ្នាក់ដឹកនាំណែនាំប្រធានមន្ទីររៀបចំដែនដីខេត្តមណ្ឌលគិរីថ្មី ឱ្យបន្តចុះបញ្ជីដីធ្លី និងដោះស្រាយទំនាស់ជូនប្រជាពលរដ្ឋឱ្យមានប្រសិទ្ធភាព
- មណ្ឌលគិរី
ខេត្តមណ្ឌលគិរី ៖ នាព្រឹកថ្ងៃទី០៣ ខែសីហា ឆ្នាំ២០២៦ ឯកឧត្តម ទេព ធន រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ ឯកឧត្តម ម៉ែន ង៉ុយ ប្រធានក្រុមប្រឹក្សាខេត្ត និង ឯកឧត្តម គង់ គឹមនី អភិបាល នៃគណៈអភិបាលខេត្តមណ្ឌលគិរី បានអញ្ជើញជាគណៈអធិបតីក្នុងពិធីប្រកាសចូលកាន់មុខតំណែងប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តមណ្ឌលគិរី ជូនលោក ទឹម មុនីរតន៍ ជំនួសលោក លឹម ចាន់សុភី ដែលត្រូវចូលនិវត្តន៍។
ថ្លែងក្នុងពិធីនោះ ឯកឧត្តម ទេព ធន រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ បាននាំនូវការសាកសួរសុខទុក្ខ និងការផ្តាំផ្ញើពី ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ព្រមទាំងបានកោតសរសើរដល់មន្ត្រីរាជការនៃមន្ទីររៀបចំដែនដីខេត្តមណ្ឌលគិរី ទាំងអស់ដែលបានខិតខំបំពេញភារកិច្ចនាពេលកន្លងមក។
ឯកឧត្តម ទេព ធន បានមានប្រសាសន៍ផ្តាំផ្ញើ និងដាក់ចេញនូវទិសដៅការងារសំខាន់ៗជូនប្រធានមន្ទីរថ្មី និងមន្ត្រីជំនាញ រួមមានត្រូវបន្តខិតខំជំរុញការងារចុះបញ្ជីដីធ្លីមានលក្ខណៈជាប្រព័ន្ធ និងដាច់ដោយដុំ ជូនប្រជាពលរដ្ឋឱ្យបានឆាប់រហ័ស ដើម្បីធានាសុវត្ថិភាពនៃការកាន់កាប់ដីធ្លី និងកាត់បន្ថយទំនាស់។ត្រូវយកចិត្តទុកដាក់ដោះស្រាយទំនាស់ដីធ្លីជូនប្រជាពលរដ្ឋដោយផ្អែកលើតម្លាភាព យុត្តិធម៌ និងសម្របសម្រួលឱ្យបានឈ្នះ-ឈ្នះ ដើម្បីបញ្ចប់ទំនាស់នៅត្រឹមរដ្ឋបាលថ្នាក់ក្រោមជាតិ។ត្រូវពង្រឹងការគ្រប់គ្រងការសាងសង់ឱ្យត្រឹមត្រូវតាមបទដ្ឋានបច្ចេកទេស ច្បាប់ និងលិខិតបទដ្ឋានគតិយុត្ត ដើម្បីធានាសុវត្ថិភាព សោភណភាព និងការអភិវឌ្ឍដោយចីរភាពក្នុងខេត្ត។ត្រូវរក្សាសាមគ្គីភាពផ្ទៃក្នុងឱ្យបានល្អ និងបង្កើនកិច្ចសហការជិតស្និទ្ធជាមួយរដ្ឋបាលខេត្ត អាជ្ញាធរដែនដី និងស្ថាប័នពាក់ព័ន្ធទាំងអស់។
ឯកឧត្តម គង់ គឹមនី អភិបាលខេត្តមណ្ឌលគិរី ប្រសាសន៍ផ្តាំផ្ញើដល់ប្រធានមន្ទីរថ្មី ត្រូវបន្តពង្រឹងការផ្តល់សេវាសាធារណៈជូនប្រជាពលរដ្ឋតាមច្រកចេញចូលតែមួយឱ្យបានល្អប្រសើរ ចូលរួមទប់ស្កាត់ការរានដីព្រៃខុសច្បាប់ និងត្រូវប្រកាន់ខ្ជាប់នូវអភិក្រមទាំង៥ កញ្ចក់ ងូតទឹក ដុសក្អែល ព្យាបាល និងវះកាត់ ក្នុងការបំពេញភារកិច្ច។
លោក ទឹម មុនីរតន៍ ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តមណ្ឌលគិរី ដែលទើបទទួលបានការតែងតាំង បានប្តេជ្ញាចិត្តយ៉ាងមុតមាំក្នុងការខិតខំបំពេញភារកិច្ច ដឹកនាំអង្គភាពប្រកបដោយស្មារតីទទួលខុសត្រូវខ្ពស់ គោរពតាមការណែនាំរបស់ក្រសួង និងរដ្ឋបាលខេត្ត ដើម្បីបម្រើប្រជាពលរដ្ឋឱ្យបានល្អបំផុត៕
ចែករំលែកព័តមាននេះ