ទីក្រុងបាកដាដ ៖ ក្រសួងការពារជាតិអ៊ីរ៉ាក់កាលពីថ្ងៃទី២ ខែសីហា ឆ្នាំ២០២៦ បានថ្លែងថា ដោយសារសីតុណ្ហភាពកើនឡើងខ្លាំងបានបង្កឱ្យមានអគ្គិភ័យឆាបឆេះនៅឃ្លាំងអាវុធ មួយកន្លែងនៅមូលដ្ឋានទ័ពដ៏ធំមួយ ស្ថិតនៅភាគខាងជើងទីក្រុងបាកដាដ (Baghdad)។ នេះបើតាមប្រភពពី AFP និង Al Arabiya English បានចេញផ្សាយ។
លោក Yehia Rasool អ្នកនាំពាក្យក្រសួងការពារជាតិអ៊ីរ៉ាក់ បានថ្លែងថា អគ្គិភ័យបានឆាបឆេះក្នុងឃ្លាំងអាវុធមួយនៅឯតំបន់ Taji ដោយសារសីតុណ្ហភាពក្តៅខ្លាំង។ លោកបានបញ្ជាក់ថា ឃ្លាំងនោះមានផ្ទុកគ្រាប់រំសេវជារបស់កងពលតូចពាសដែកទី៩។
ជាមួយគ្នាដែរ អង្គភាពប្រព័ន្ធផ្សព្វផ្សាយសន្តិសុខរបស់រដ្ឋាភិបាលអ៊ីរ៉ាក់ក៏បានឱ្យដឹងដែរថា ការផ្ទុះមួយបានកើតឡើងក្នុងតំបន់ Taji ហើយគ្រាប់រំសេវមួយចំនួនបានផ្ទុះឡើងដោយសារតែសីតុណ្ហភាពក្តៅខ្លាំង។ ប្រភពដដែលបន្តថា ក្រុមពន្លត់អគ្គិភ័យកំពុងតែខិតខំបំពេញភារកិច្ចរបស់ពួកគេ។
តំបន់ Camp Taji គឺជាមូលដ្ឋានទ័ពអ៊ីរ៉ាក់ដ៏ធំមួយ ដែលកាលពីមុនធ្លាប់ជាកន្លែងស្នាក់នៅរបស់កងទ័ពមកពីសម្ព័ន្ធមិត្តប្រឆាំងក្រុមជ្រុលនិយម ដឹកនាំដោយសហរដ្ឋអាមេរិក មុនពេលពួកគេចាកចេញពីមូលដ្ឋាននេះ ព្រមទាំងមូលដ្ឋានផ្សេងៗទៀត។
ការផ្ទុះនៅឯមូលដ្ឋានទ័ព និងឃ្លាំងផ្ទុកគ្រាប់រំសេវ គឺកើតឡើងញឹកញាប់គួរសមនៅក្នុងប្រទេសអ៊ីរ៉ាក់។ ដ្បិតវិធានការសុវត្ថិភាព ជារឿយៗត្រូវបានមើលរំលង ហើយអគ្គិភ័យតែងតែកើនឡើង អំឡុងខែរដូវក្តៅដែលមានកម្តៅខ្លាំង គឺនៅពេលដែលសីតុណ្ហភាពហក់ឡើងជិតដល់ ៥០អង្សាសេ៕
ចែករំលែកព័តមាននេះ