អន្តរជាតិ ៖ តម្លៃមាសអន្តរជាតិកើនឡើង នៅថ្ងៃទី៣ ខែសីហា ឆ្នាំ២០២៦ ចំពេលដែល តម្លៃប្រេងឆៅអន្តរជាតិបានធ្លាក់ចុះយ៉ាងគំហុក ក្រោយពេលដែលប្រធានាធិបតីអាមេរិក លោក ដូណាល់ ត្រាំ (Donald Trump) បានផ្អាកការវាយប្រហារថ្មីៗ លើប្រទេសអ៊ីរ៉ង់ ដើម្បីទទួលបានកិច្ចព្រមព្រៀងមួយដ៏ឆាប់រហ័ស។ ការណ៍នេះបានកាត់បន្ថយការព្រួយបារម្ភបន្តិចបន្តួចចំពោះបញ្ហាអតិផរណា និងការដំឡើងអត្រាការប្រាក់។ នេះបើតាមប្រភពពី Reuters បានចេញផ្សាយ។
តម្លៃមាសអន្តរជាតិបានកើនឡើង ០,៤% ដល់ ៤ ៨៩៧ ដុល្លារអាមេរិកក្នុង១តម្លឹង គិតត្រឹមម៉ោង ១០ ព្រឹក (ម៉ោងនៅកម្ពុជា)។ ស្របពេលដែលប្រាក់ដុល្លារអាមេរិកបានធ្លាក់ថ្លៃ បន្ទាប់ពីរដ្ឋាភិបាលបានលូកដៃចូលអន្តរាគមន៍ក្នុងទីផ្សារប្តូរប្រាក់បរទេស ដើម្បីគាំទ្រដល់តម្លៃប្រាក់យ៉េនជប៉ុន ដែលធ្លាក់ថ្លៃខ្លាំង កត្តានេះធ្វើឱ្យមាសដុំមានតម្លៃគិតជាប្រាក់ដុល្លារ ធូរថ្លៃជាងមុនសម្រាប់អ្នកទិញនៅបរទេស។
ក្រឡេកទៅទីផ្សារប្រេងឯណោះវិញ ប្រេងឆៅ Brent ដែលជាស្តង់ដាពិភពលោក បានធ្លាក់ចុះជាង ៦% មកនៅត្រឹម ៨២,៤១ ដុល្លារក្នុង១បារ៉ែល បន្ទាប់ពីលោកប្រធានាធិបតី ត្រាំ បានថ្លែងថា ការចរចាជាមួយអ៊ីរ៉ង់នឹងប្រព្រឹត្តទៅនៅថ្ងៃទី៣ ខែសីហា។ នៅមុននេះ បន្តិច លោកក៏បានប្រកាសផ្អាកការវាយប្រហារភ្លាមៗលើប្រទេសអ៊ីរ៉ង់ ដើម្បីឈានទៅរកកិច្ចព្រមព្រៀងមួយក្នុងការបើកច្រកសមុទ្រហ័រមូស (Hormuz) ឡើងវិញ និងដោះស្រាយភាពទាល់ច្រកជុំវិញកម្មវិធីនុយក្លេអ៊ែររបស់ទីក្រុងតេហេរ៉ង់៕
ចែករំលែកព័តមាននេះ