គ្រោះថ្នាក់ចរាចរណ៍រវាងម៉ូតូបុ.កម៉ូតូនៅស្រុកសេសាន រងរបួស ៣នាក់ និងខូចខាតម៉ូតូ២គ្រឿង
- ស្ទឹងត្រែង
ខេត្តស្ទឹងត្រែង៖ មនុស្សចំនួន ៣នាក់បានរងរបួស ធ្ងន់ និងស្រាល ក្នុងករណីគ្រោះថ្នាក់ចរាចរណ៍ រវាងម៉ូតូនិងម៉ូតូនៅលើផ្លូវជាតិលេខ ៧៨Aស្ថិតក្នុងភូមិសាស្ត្រស្រុកសេសាន ខេត្តស្ទឹងត្រែង កាលពីរសៀលថ្ងៃទី០១សីហា ២០២៦។
ប្រភពព័ត៌មានពីសមត្ថកិច្ចបានឱ្យដឹងថា ហេតុការណ៍នេះបានកើតឡើងនៅវេលាម៉ោង២និង៥៧នាទី រសៀល ត្រង់ចំណុចគីឡូម៉ែត្រលេខ៧ លើផ្លូវជាតិលេខ ៧៨A ស្ថិតក្នុងភូមិកាតូត ឃុំកំភុន ស្រុកសេសាន ខេត្តស្ទឹងត្រែង។ប្រភពន្តថា មុនពេលកើតហេតុ គេបានឃើញម៉ូតូ ១គ្រឿង ម៉ាក Honda Dream C125 ពណ៌ខ្មៅ ពាក់ផ្លាកលេខ ស្ទឹងត្រែង 1G-2472 បើកបរ ដោយឈ្មោះ អាត រុសាក់ ភេទប្រុស អាយុ ២៤ឆ្នាំ មុខរបរកសិករ រស់នៅភូមិក្បាលរមាស ឃុំក្បាលរមាស ស្រុកសេសាន បានធ្វើដំណើរក្នុងទិសដៅពីលិចទៅកើត។ លុះមកដល់ចំណុចកើតហេតុ ក៏បានជ្រុលទៅបុកចំពីក្រោយម៉ូតូ ១គ្រឿងទៀត ម៉ាក Wave Alpha ពណ៌ក្រហម គ្មានផ្លាកលេខ ដែលកំពុងបើកបរស្របទិសគ្នា (ពីលិចទៅកើត) បើកបរដោយឈ្មោះ ក្ដាន់ ខាំលឺ ភេទប្រុស អាយុ ៥៧ឆ្នាំ មុខរបរកសិករ រស់នៅភូមិកាតូត ឃុំកំភុន ស្រុកសេសាន។
សមត្ថកិច្ចបានគូសបញ្ជាក់ថា កត្តាដែលនាំឱ្យកើតមានគ្រោះថ្នាក់ចរាចរណ៍នេះ គឺបណ្តាលមកពីអ្នកបើកបរម៉ូតូ Honda Dream បើកបរក្នុងល្បឿនលឿន រួមផ្សំនឹងអ្នកបើកបរម៉ូតូ Wave ខ្វះការប្រុងប្រយ័ត្ន។
គ្រោះថ្នាក់នេះបានបណ្តាលឱ្យអ្នករួមដំណើរនិងអ្នកបើកបររងរបួសធ្ងន់ ២នាក់ និងរបួសស្រាល ១នាក់ ព្រមទាំងបង្កឱ្យខូចខាតម៉ូតូទាំង២គ្រឿងកម្រិស្រាល។
ភ្លាមៗក្រោយកើតហេតុ ជនរងគ្រោះទាំងអស់ត្រូវបានរថយន្តសង្គ្រោះបន្ទាន់នៃមណ្ឌលសុខភាពកំភុន ដឹកបញ្ជូនទៅសង្គ្រោះ និងព្យាបាលនៅមន្ទីរពេទ្យបង្អែកខេត្តស្ទឹងត្រែង។ ចំណែកឯវត្ថុតាងម៉ូតូទាំង ២គ្រឿង ត្រូវបានកម្លាំងប៉ុស្តិ៍នគរបាលរដ្ឋបាលកំភុនធ្វើកំណត់ហេតុដកហូត និងនាំយកទៅរក្សាទុកនៅប៉ុស្តិ៍នគរបាល ដើម្បីចាត់ការតាមនីតិវិធីច្បាប់៕
ចែករំលែកព័តមាននេះ