ខេត្តប៉ៃលិន ៖ មកដល់ខែកក្កដា ឆ្នាំ២០២៦នេះ ប្រជាកសិករបានលើកឡើងថា ទំពាំងបារាំង ជាដំណាំបន្លែមួយប្រភេទ ដែលមានអាយុកាលដាំដុះក្នុងរយៈពេលប្រមូលផលយូរអង្វែង អាចចាប់ផ្តើមប្រមូលផលក្រោយពីការដាំដុះបាន ៥ទៅ៦ខែ និងអាចបន្តប្រមូលផលបានច្រើនឆ្នាំថែមទៀតផង។ រហូតមកដល់បច្ចុប្បន្ននេះ បន្លែទំពាំងបារាំង ភាគច្រើន ត្រូវបានគេដាំដុះនៅក្នុងខេត្តមួយចំនួនដូចជា ខេត្តប៉ៃលិន ខេត្តបាត់ដំបង ខេត្តត្បូងឃ្មុំ ខេត្តកំពង់ឆ្នាំង និងខេត្តតាកែវជាដើម ។
បើតាមប្រភពព័ត៌មានពីបុរសម្នាក់ ឈ្មោះ ណៃ រិទ្ធី រស់នៅក្នុងភូមិក្រចាប់ សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន បានរៀបរាប់ឱ្យភ្នាក់ងារយើងដឹងនៅថ្ងៃទី៣១ ខែកក្កដា ឆ្នាំ២០២៦នេះថា គាត់បានចំណាយពេលដាំដុះ បន្លែទំពាំងបារាំងនៅលើផ្ទៃដីរបស់ខ្លួន ចំនួនកន្លះហិកតា ដោយចំណាយដើមទុនប្រហែល ១,៥០០,០០០រៀល ទៅលើការរៀបចំប្រព័ន្ធទឹក ដើម្បីស្រោចស្រពដំណាំ និងសម្ភារមួយចំនួន រួមទាំងកម្លាំងពលកម្ម និងការប្រើជីធម្មជាតិជាដើម ។
លោកបានបន្តទៀតថា កាលពីមុន នៅពេលដែលគេមិនទាន់ស្គាល់ទីតាំងដាំដំណាំរបស់ខ្លួន គឺវាមានការពិបាកលក់បន្តិច តែរហូតមកដល់ពេលបច្ចុប្បន្ននេះ បន្លែទំពាំងបារាំងរបស់គាត់មានទីផ្សារល្អបន្តិចម្តងៗ ហើយក៏ងាយស្រួលក្នុងការលក់ដូរឱ្យម៉ូយ ទិញយកទៅទទួលទាន និងយកទៅលក់ដូរបន្ត លោកក៏លក់ដូរបានតម្លៃថ្លៃ ដោយ១គីឡូក្រាម អាចលក់បានក្នុងតម្លៃចាប់ពី ១ម៉ឺនទៅ ១ម៉ឺនបួនពាន់រៀល។ លោកស្ទើរតែប្រមូលលក់ឱ្យម៉ូយមិនទាន់នោះឡើយ ព្រោះមានអ្នកខ្លះធ្វើដំណើរទៅដល់ចំការ ហើយអ្នកខ្លះទៀតគេមានលេខទូរស័ព្ទ ក៏កម្មង់ទិញឱ្យដឹកទៅដល់ផ្ទះថែមទៀត ។
លោកបានបញ្ជាក់ថា បន្លែទំពាំងបារាំងអាចដាំបានទាំងការប្រើគ្រាប់ និងការប្រើឫសដើមដាំឡើងវិញក៏បានដែរ។ ដំណាំប្រភេទនេះចូលចិត្តពន្លឺថ្ងៃគ្រប់គ្រាន់ និងដីដែលមានប្រព័ន្ធបង្ហូរទឹកល្អ(មិនដក់ទឹកឡើយ)។ ចំណែកឯការរៀបចំដី ដោយប្រើជីធម្មជាតិ ឬជីកំប៉ុស្ត ដើម្បីឱ្យដីធូរ និងមានជីវជាតិល្អ ។ ចំណែកឯការប្រមូលផលបើសិនជាដាំគ្រាប់អាចប្រើពេលចាប់ពី២ទៅ៦ខែ ទើបអាចប្រមូលផលបាន ហើយវាអាំចផ្តល់ផលបានច្រើនឆ្នាំ ពោលគឺចាប់ពី៥ទៅ១០ឆ្នាំ បើសិនជាថែទាំដើមបានល្អ ។ បច្ចុប្បន្នលោកក៏ប្រមូលផលលក់នៅក្នុងខេត្តប៉ៃលិន រហូតដល់ខេត្តសៀមរាប បាត់ដំបង និងដល់រាជធានីភ្នំពេញផងដែរ ។
ចំណែកឯលោក ជួន ទី ជាមន្ត្រីកសិកម្មសង្កាត់អូរតាវ៉ៅ នៃមន្ទីរកសិកម្ម រុក្ខាប្រមាញ់ និងនេសាទខេត្តប៉ៃលិន បានបញ្ជាក់ដែរថា ៖ ដីដែលល្អសម្រាប់ការដាំដុះដំណាំនេះ ត្រូវតែជាដីដែលមិនជាំទឹក ដោយសារវាមិនត្រូវការសារធាតុចិញ្ចឹមច្រើនដូចដំណាំផ្សេងៗ ទៀតឡើយ ។ ហើយដំណាំនេះធន់នឹងអាកាសធាតុរាំងស្ងួត ។ ប៉ុន្តែវាទាមទារការយកចិត្តទុកដាក់ថែទាំខ្ពស់ ដោយប្រើប្រាស់កម្លាំងពលកម្មច្រើនសម្រាប់សម្អាតស្មៅនៅលើគល់ជាប្រចាំ ការបូមទឹកស្រោចស្រព និងការប្រមូលផលពន្លករៀងរាល់ថ្ងៃ មិនអាចទុកពន្លកទំពាំងឱ្យចាស់បានទេ ត្រូវដកចេញពីគុម្ព។ លោកបន្តទៀតថា បន្លែទំពាំងបារាំអអាចយកទៅធ្វើម្ហូបបានច្រើនយ៉ាងដូចជាំ ឆាជាមួយសាច់គោ ឆាគ្រឿងសមុទ្រ ឬបង្គា អាំងញ៉ាំជាមួយសាច់ជ្រូក៣ជាន់ ឬអាចស្ងោរស៊ុប ឬធ្វើជាបន្លែញ៉ាំជាមួយនឹងទឹកគ្រឿងក៏បានដែរ ។
លោកបានបន្តទៀតថា ៖សម្រាប់ការដាំដុះជាលក្ខណៈអាជីវកម្ម ដំណាំនេះត្រូវការផ្ទៃដីដាំដុះធំជាងដំណាំបន្លែទូទៅ ព្រោះហេតុផលថា ក្នុងមួយគុម្ពអាចប្រមូលផលបានត្រឹម ១-៥ដើម ក្នុងមួយដង ហើយត្រូវចំណាយដើមទុនច្រើនសម្រាប់ការដាំដុះលើកដំបូង។
សូមបញ្ជាក់ផងដែរថា តាមការស្រាវជ្រាវ គឺបន្លែទំពាំងបារាំងជាប្រភពដ៏អស្ចារ្យនៃវីតាមីន ជាតិរ៉ែ និងប្រូតេអ៊ីនសំខាន់ៗ ហើយទំពាំងបារាំងមានបរិមាណកាឡូរីទាបបំផុត ដែលមិនមានកូលេស្តេរ៉ុលហើយមានជាតិសូដ្យូមទាបផងដែរ ។ វាក៏ជាប្រភព ដ៏សំបូរទៅដោយជាតិសរសៃចំណីដែលចាំបាច់សម្រាប់រាងកាយរបស់មនុស្សយើង ៕
ចែករំលែកព័តមាននេះ