ខេត្តមណ្ឌលគិរី ៖ កម្លាំងជំនាញនៃដែនជម្រកសត្វព្រៃកែវសីមា សហការជាមួយអាជ្ញាធរពាក់ព័ន្ធ និងសហគមន៍មូលដ្ឋាន បានចុះល្បាតស្រាវជ្រាវ និងទប់ស្កាត់បទល្មើសធនធានធម្មជាតិ ដោយប្រមូលបានវត្ថុតាងជាឈើប្រណីត ម៉ូតូកែច្នៃ និងរណារយន្តជាច្រើនគ្រឿង កាលពីថ្ងៃទី៣១ ខែកក្កដា ឆ្នាំ២០២៦ កន្លងទៅនេះ។
យោងតាមរបាយការណ៍ផ្លូវការបានឱ្យដឹងថា ប្រតិបត្តិការនេះ បានធ្វើឡើងជាពីរទិសដៅផ្សេងគ្នា ក្នុងស្រុកកែវសីមា ខេត្តមណ្ឌលគិរី ។ ១-កម្លាំងស្នាក់ការរងស្រែផ្លែង បានសហការជាមួយស្នាក់ការរងទួលពង្រ និងភ្នាក់ងារល្បាត បានធ្វើការចុះល្បាត និងស្ទាក់ចាប់បាននៅចំណុចកែងជញ្ជីងពូចារ (និយាមកា ៧០១០៥២, ១៣៥០៩២០) ស្ថិតក្នុងភូមិពូចារ ឃុំស្រែព្រះ ស្រុកកែវសីមា ។ ជាលទ្ធផល ក្រុមការងារបានធ្វើការដកហូតម៉ូតូកែច្នៃចំនួន០២គ្រឿង (ប្រើសម្រាប់សកម្មភាពដឹកជញ្ជូន) ឈើប្រភេទលេខ១ (សុក្រំ) ចំនួន០៩ដុំ ស្មើនឹង០,១៥៥ ម៉ែត្រគូប។
២-នៅថ្ងៃដដែល កម្លាំងស្នាក់ការរងអូររាំង បានដឹកនាំប្រជាសហគមន៍អណ្តូងក្រឡឹង ចុះល្បាតនៅត្រង់ចំណុចផ្លូវទៅ ហ្គាទី ខ្មោចបារាំង (និយាមកា ៧១៥៩៣៣, ១៣៥៧០៥៤) ស្ថិតក្នុងភូមិហ្គាទី ឃុំស្រែព្រះ ស្រុកកែវសីមា ។ ក្នុងប្រតិបត្តិការនេះ នៅពេលឃើញវត្តមានក្រុមការងារ ជនល្មើសមិនស្គាល់អត្តសញ្ញាណ បានរត់គេចខ្លួនចូលទៅក្នុងព្រៃបាត់ ដោយបន្សល់ទុកនូវវត្ថុតាងរួមមាន រណារយន្ត (អារឈើ) ចំនួន០១គ្រឿង (ម៉ាក០៣៨) ម៉ូតូកែច្នៃចំនួន០៤គ្រឿង ។
ពាក់ព័ន្ធនឹងករណីខាងលើនេះ លោក ហាស់ វិបុល ប្រធានមន្ទីរបរិស្ថានខេត្តមណ្ឌលគិរី បានបញ្ជាក់ឱ្យដឹងថា កម្លាំងមន្ត្រីឧទ្យានុរក្សនៃមន្ទីរបរិស្ថានខេត្ត នឹងបន្តសហការយ៉ាងជិតស្និទ្ធ ជាមួយអាជ្ញាធរដែនដី និងសហគមន៍មូលដ្ឋាន ដើម្បីបង្កើនការល្បាតស្ទាក់ និងស្រាវជ្រាវរកមុខសញ្ញាជនល្មើសមកផ្តន្ទាទោសតាមផ្លូវច្បាប់ជាដាច់ខាត ។
លោកប្រធានមន្ទីរ ក៏បានអំពាវនាវដល់បងប្អូនប្រជាពលរដ្ឋទាំងអស់ ឱ្យចូលរួមរាយការណ៍ និងសហការការពារធនធានធម្មជាតិ និងព្រៃឈើក្នុងតំបន់ការពារឱ្យបានគង់វង្សផងដែរ ។ បច្ចុប្បន្ន វត្ថុតាងទាំងអស់នៃករណីទាំងពីរខាងលើ ត្រូវបានកម្លាំងជំនាញប្រមូល និងនាំយកទៅរក្សាទុកជាបណ្តោះអាសន្ននៅស្នាក់ការរងស្រែផ្លែង និងស្នាក់ការរងអូររាំង ដើម្បីកសាងសំណុំរឿងចាត់ការបន្តតាមនីតិវិធីច្បាប់ជាធរមាន ៕
ចែករំលែកព័តមាននេះ