អាសូរ! នាយ តាក់ ស៊ី ត្រូវកាត់សាច់លើដងខ្លួនបន្ថែមទៀត ដោយសារការញាំញីនៃជំងឺទឹកនោមផ្អែម
- ភ្នំពេញ
រាជធានីភ្នំពេញ ៖ ខណៈពេលជំងឺទឹកនោមផ្អែមបានបន្តញាំញីខ្លាំងឡើងថែមទៀតនោះ តារាកំប្លែងនាយ តាក់ ស៊ី ត្រូវបង្ខំចិត្តកាត់សាច់នៅលើដងខ្លួនបន្ថែមទៀត ដើម្បីបន្ថយភាពឈឺចាប់ ។ នាយ តាក់ ស៊ី ត្រូវបានក្រុមគ្រូពេទ្យវះកាត់សាច់កំភួនជើង ដែលជាកាត់កន្លែងថ្មីមួយទៀត បន្ទាប់ពីលោកបានកាត់ម្រាមដៃ និងម្រាមជើងមួយចំនួនកាលពីពេលកន្លងទៅ ។
ភរិយានាយ តាក់ ស៊ី បានអះអាងប្រាប់កោះសន្តិភាពថា ស្វាមីអ្នកស្រីបានចូលមន្ទីរពេទ្យវះកាត់សាច់កំភួនជើង កាលពីយប់ថ្ងៃទី៣១ ខែកក្កដា ឆ្នាំ២០២៦ ខណៈពេលបច្ចុប្បន្ន លោកកំពុងស្នាក់នៅបន្ទប់ ICU នៅឡើយ ។ អ្នកស្រីបន្តថា ការសម្រេចវះកាត់សាច់កំភួនជើងរបស់នាយ តាក់ ស៊ី នាពេលនេះ គឺដោយសារមេរោគដំបៅឆ្លងលឿន បន្ទាប់ពីពេលនៅផ្ទះនោះស្វាមីអ្នកស្រីធ្វើការដើរច្រើនពេក ។
អ្នកស្រីថា ដំបូងឡើយ ពេទ្យចង់កាត់ត្រង់ប្រអប់ជើងទេ ដោយចៃដន្យយើងមិនអាចទុកបានទេ ដោយសារកន្លែងដំបៅវាបានឆ្លងរាលដាលធ្វើអោយសាច់ឡើងហើម ហេតុនេះពេទ្យក៏បានពិភាក្សាជមួយក្រុមគ្រួសារ និងអ្នកជំងឺផ្ទាល់ថា តើត្រូវកាត់ត្រឹមណា ។
អំឡុងពេលនោះនាយ តាក់ ស៊ី ផ្ទាល់ ក៏បានសម្រេចអោយវះពេទ្យវះកាត់ចេញ ដើម្បីអោយគាត់បានឈឺចុកចាប់ ។ យ៉ាងណាបើតាមភរិយានាយ តាក់ ស៊ី តាមការបញ្ជាក់ពីក្រុមគ្រូពេទ្យ ក្រោយការវះកាត់សាច់នេះ គឺ៧០% អាចជា ប៉ុន្តែ៣០% ទៀតគឺអាចមិនជោគជ័យ ដោយសារប្រសិនបើមេរោគនៅតែឆ្លងនោះនឹងអាចកាត់បន្តទៀត ។
បច្ចុប្បន្ន នាយ តាក់ ស៊ី កំពុងសម្រាកព្យាបាលនៅក្នុងមន្ទីរពេទ្យលោកសង្ឃ អគារថ្មី ខណៈពេលថ្លៃព្យាបាលគឺក្រុមគ្រួសារប្រើប្រាស់បណ្ណ ប.ស.ស និងការជួយពីសប្បុរសជននានាផងដែរ ។ ជាកាត់សម្គាល់ ដោយសារមេរោគឆ្លងពីជំងឺទឹកនោមផ្អែមនោះ រហូតមកទល់នាពេលនេះ តារាកំប្លែងនាយ តាក់ ស៊ី បានវះកាត់អស់ម្រាមដៃ ម្រាមជើងទាំងសងខាង ខណៈពេលម្រាមដៃកណ្តាលអស់២ ដែលបច្ចុប្បន្នម្រាមដៃលោកនៅសល់តែ៤ប៉ុណ្ណោះ ។
គួរបញ្ជាក់ថា ក្នុងវ័យ៤៨ឆ្នាំ តារាកំប្លែងនាយ តាក់ ស៊ី បានពើបប្រទះជំងឺទឹកនោមផ្អែមនេះប្រមាណជិត២០ឆ្នាំមកហើយ ។
ក្នុងជីវភាពបច្ចុប្បន្ននាយ តាក់ ស៊ី និងភរិយាបានដើរលក់ និងឡាយលក់សំប៊ូតាមអនឡាញ ក្នុងពេលអាជីពសិល្បៈកំប្លែងរបស់លោកបានបាត់បង់ស្ទើទាំងស្រុង ដោយសារការញាំញីនៃជំងឺទឹកផ្អែមនាពេលនេះ ៕
ចែករំលែកព័តមាននេះ