ត្រៀមខ្លួនឱ្យហើយ ! ច្បាប់ចរាចរណ៍នឹងត្រូវរឹតបន្តឹងឡើងវិញក្នុងរាជធានី-ខេត្តទាំង៥នេះចាប់ពីថ្ងៃទី១ កញ្ញាខាងមុខ
- ភ្នំពេញ
រាជធានីភ្នំពេញ ៖ ក្រសួងមហាផ្ទៃ បានដាក់សំណើជូនសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដើម្បីស្នើសុំការអនុវត្តរឹតបន្តឹងច្បាប់ចរាចរណ៍ផ្លូវគោកឡើងវិញ ចាប់ពីថ្ងៃទី១ ខែកញ្ញា ឆ្នាំ២០២៦តទៅ ។ ការស្នើនេះធ្វើឡើងបន្ទាប់ពីការអនុវត្តច្បាប់ត្រូវ បានផ្អាកមួយរយៈ ដោយសារស្ថានការណ៍សង្គ្រាមតាមព្រំដែន និងវិបត្តិសេដ្ឋកិច្ចសកលដែលបង្កដោយសង្គ្រាមនៅមជ្ឈិមបូព៌ា។
លោកឧបនាយករដ្ឋមន្ត្រី ស សុខា រដ្ឋមន្ត្រីក្រសួងមហាផ្ទៃ បានបញ្ជាក់ថា មូលហេតុចម្បងនៃការស្នើសុំរឹតបន្តឹងច្បាប់ចរាចរណ៍ឡើងវិញនេះ គឺដោយសារតែតួលេខនៃគ្រោះថ្នាក់ចរាចរណ៍មានការកើនឡើងយ៉ាងខ្លាំង ក្នុងអំឡុងពេលដែលអាជ្ញាធរផ្អាកការរឹតបន្តឹង ។
ទោះជាយ៉ាងណា ការអនុវត្តរឹតបន្តឹងច្បាប់ចរាចរណ៍ជាថ្មីនេះ ដោយផ្តោតតែលើភូមិសាស្ត្រដែលប្រឈមនឹងគ្រោះថ្នាក់ច្រើនជាងគេចំនួន ៥ រួមមាន ៖ រាជធានីភ្នំពេញ ខេត្តព្រះសីហនុ ខេត្តកណ្តាល ខេត្តកំពង់ស្ពឺ និងខេត្តស្វាយរៀង ។
ជាមួយគ្នានេះ អាជ្ញាធរមានសមត្ថកិច្ចនឹងផ្តោតសំខាន់លើបទល្មើសចរាចរណ៍ដែលជាប្រភពដើមបង្កឱ្យមានគ្រោះថ្នាក់ធ្ងន់ធ្ងរ រួមមាន៖ ការបើកបរលើសល្បឿនកំណត់, ការបើកបរក្នុងស្ថានភាពស្រវឹង, ការមិនគោរពសញ្ញាសិទ្ធិអាទិភាព និងភ្លើងសញ្ញាចរាចរណ៍ (ភ្លើងស្តុប), និងការដឹកជញ្ជូនទំនិញសំពីងសំពោងខុសបច្ចេកទេស ៕
ចែករំលែកព័តមាននេះ