អាជ្ញាធរខេត្តប៉ៃលិន នឹងផ្តល់កន្លែងស្នាក់នៅ ផ្តល់អាហារ ៣ពេល ព្រមទាំងកន្លែងផ្ញើកង់ ម៉ូតូ ឥតគិតថ្លៃ ដល់បេក្ខជនប្រឡងបាក់ឌុបឆ្នាំ២០២៦នេះ
- ប៉ៃលិន
ខេត្តប៉ៃលិន ៖ ដោយយោងតាមសេចក្តីជូនដំណឹង របស់សហភាពសហព័ន្ធយុវជនកម្ពុជាខេត្តប៉ៃលិន ជម្រាបជូនដល់មាតា បិតា និងអាណាព្យាបាល ព្រមទាំងបេក្ខជនតៀមប្រឡងសញ្ញាបត្រមធ្យមសិក្សាទុតិយភូមិ ទូទាំងខេត្តប៉ៃលិន នាសម័យប្រឡង នៅថ្ងៃទី១០-១១ ខែសីហា ឆ្នាំ២០២៦ ឆាប់ៗខាងមុខនេះ ស្ថិតនៅក្នុងវិទ្យាល័យ ហ៊ុន សែន ក្រុងទេពនិម្មិតប៉ៃលិន ដោយមានការឧបត្ថម្ភគាំទ្រទាំង ស្រុងពីឯកឧត្តមទេសរដ្ឋមន្ត្រី អ៊ី ឈាន ប្រធានក្រុមការងាររាជរដ្ឋាភិបាលចុះមូលដ្ឋានខេត្តប៉ៃលិន និងលោកជំទាវបណ្ឌិត បាន ស្រីមុំ អភិបាល នៃគណៈអភិបាលខេត្តប៉ៃលិន ។
ប្រភពព័ត៌មានបានឱ្យដឹងថា ដោយបានសហការជាមួយនឹងសហភាពសហព័ន្ធយុវជនកម្ពុជាខេត្ត មន្ទីរអប់រំយុវជន និងកីឡាខេត្តប៉ៃលិន និងកងកម្លាំងមានសមត្ថកិច្ច បានរៀបចំកន្លែងស្នាក់នៅ អាហារ០៣ពេល និងរថយន្តដឹកជញ្ជូនទៅមណ្ឌលប្រឡង សម្រាប់បេក្ខជន ដែលមានទីលំនៅឆ្ងាយពីមណ្ឌលប្រឡង ព្រមទាំងកន្លែងផ្ញើយានជំនិះ កង់-ម៉ូតូ.ដោយឥតគិតថ្លៃ ។
ចំណែកក្មួយៗ ជាបេក្ខជនប្រឡងសញ្ញាបត្រមធ្យមសិក្សាទុតិយភូមិបន្ទាប់ពីបានទទួលដំណឹងបែបនេះ ក៏បានសម្តែងនូវអារម្មណ៍រំភើបសប្បាយរីករាយ និងថ្លែងអំណរគុណយ៉ាងជ្រាលជ្រៅ ចំពោះ ឯកឧត្តម អ៊ី ឈាន និងលោកជំទាវបណ្ឌិត បាន ស្រីមុំ ដែលបានយកចិត្តទុក្ខដាក់ខ្ពស់ចំពោះពួកគាត់ ដូចជាការរៀនបំប៉នត្រៀមប្រឡង ឧបត្ថម្ភកន្លែងស្នាក់នៅ និងអាហារ ០៣ពេល ក្នុង១ថ្ងៃ ព្រមទាំងការផ្ញើកង់-ម៉ូតូ ដោយឥតគិតថ្លៃ ។ ដូច្នេះដើម្បីឆ្លើយតបទៅនឹងទឹកចិត្តដ៏ប្រពៃថ្លៃថ្លារបស់លោកទាំង២ ក្មួយៗ ចៅៗប្តេជ្ញានឹងខិតខំប្រឹងប្រែងរៀនសូត្រ ធ្វើយ៉ាងណា ត្រូវតែប្រឡងឱ្យទទួលបានលទ្ធផលជោគជ័យទាំងអស់គ្នា។
សូមបញ្ជាក់ថា ៖ ការប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០២៦នេះ ខេត្តប៉ៃលិន មានបេក្ខជនប្រឡងចំនួន១២១នាក់ ស្រី ៦៤នាក់ ស្វ័យរិន ចំនួន៤៣នាក់ ស្រី២៧នាក់ មាន២៧បន្ទប់ ដោយចែកចេញជា ២មណ្ឌល ក្នុងនោះផ្នែកវិទ្យាសាស្ត្រ មាន៥បន្ទប់ ចំនួន១២១នាក់ ស្រី៦៤នាក់ និងផ្នែកវិទ្យាសាសស្ត្រសង្គម មាន២២បន្ទប់ ចំនួន៥៤១នាក់ ស្រី៣២២នាក់ ៕
ចែករំលែកព័តមាននេះ