ឆ្លងចរន្តអគ្គិសនី ឆេះបន្ទប់ផ្ទះល្វែងជាន់ទី២ អស់ស្ទើរទាំងស្រុងនៅសង្កាត់ផ្សារដើមថ្កូវ ផ្អើលកាលពីថ្ងៃត្រង់
- ភ្នំពេញ
រាជធានីភ្នំពេញ ៖ ឆេះបន្ទប់ជាន់ទី២ រួមសម្ភារៈមួយចំនួនស្ទើរទាំងស្រុង ក្នុងមូលដ្ឋានសង្កាត់ផ្សារដើមថ្កូវ បង្កភ្ញាក់ផ្អើលកាលពីវេលាម៉ោង ១២ថ្ងៃត្រង់ថ្ងៃទី៣០ ខែកក្កដា ឆ្នាំ២០២៦ ចំណុចផ្ទះលេខ១០អា ផ្លូវលេខ៥១៤ ភូមិ១ សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ ។
តាមសមត្ថកិច្ចបញ្ជាក់បានអោយដឹងថា ពលរដ្ឋបានទាក់ទងមកកាន់សមត្ថកិច្ចថា មានករណីអគ្គិភ័យ បានកំពុងឆាបឆេះផ្ទះប្រជាពលរដ្ឋ នៅជាន់ទី២ នៃផ្ទះល្វែងមួយកន្លែង ក្នុងមូលដ្ឋានសង្កាត់ផ្សារដើមថ្កូវ ។ ភ្លាមៗ លោកវរសេនីយ៍ឯក ព្រហ្ម យ៉ន នាយការិយាល័យបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បញ្ជាអោយចេញរថយន្តជួយអន្តរាគមន៍ ឆ្ពោះទៅកាន់ទីតាំងកើតហេតុតែម្តង ដើម្បីការពាររាលដាលកាន់តែខ្លាំង ។
អគ្គិភ័យនេះបានបង្កខូចខាតឆេះបន្ទប់ជាន់ទី២ ចំនួន ១បន្ទប់ រួមមានទូរទឹកកក ១គ្រឿង កង្ហារ ១គ្រឿង គ្រែពូក ១ឈុត ម៉ាស៊ីនត្រជាក់ ១គ្រឿង ទូដាក់ខោអាវ ១ កុំព្យូទ័រ ១គ្រឿង ព្រមទាំងសំបុត្រកំណើត សៀវភៅស្នាក់នៅ សៀវភៅគ្រួសារ និងឯកសារសំខាន់ៗមួយចំនួនទៀត តែមិនមានបណ្តាលអោយមនុស្សរងរបួសនោះឡើយ ។ ក្នុងនោះរថយន្តការិយាល័យបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ មកដល់ទីតាំងចំនួន ៤គ្រឿង បានប្រើប្រាស់ទឹកអស់ ចំនួន២គ្រឿង បាញ់អោយរលត់ជាស្ថាពរ ។ ចំពោះមូលហេតុ សមត្ថកិច្ចជំនាញបានស្រាវជ្រាវរកឃើញថា បណ្តាលមកពីឆ្លងចរន្តអគ្គិសនី ៕
ចែករំលែកព័តមាននេះ