ខេត្តក្រចេះ ៖ កម្លាំងនគរបាលការិយាល័យប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តក្រចេះ សហការជាមួយប៉ុស្តិ៍នគរបាលរដ្ឋបាលឃុំស្វាយជ្រះ ប្រជាការពារ និងអាជ្ញាធរមូលដ្ឋាន បានចុះប្រតិបត្តិការផ្ទាល់ដល់ទីតាំងអាជីវកម្មរ៉ែមាសខុសច្បាប់ ក្នុងភូមិសាស្ត្រឃុំស្វាយជ្រះ ដើម្បីអប់រំណែនាំ និងតម្រូវឱ្យប្រជាពលរដ្ឋបញ្ឈប់សកម្មភាពជាបន្ទាន់ កាលពីរសៀលថ្ងៃទី២៧ ខែកក្កដា ឆ្នាំ២០២៦ ។
ក្នុងប្រតិបត្តិការនោះ សមត្ថកិច្ចបានចុះពិនិត្យជាក់ស្តែងនៅតាមទីតាំងនីមួយៗ ដោយឃើញថា នៅសល់សម្ភារៈ និងឧបករណ៍មួយចំនួនតូចដែលមិនទាន់ដឹកជញ្ជូនចេញអស់។ ភ្លាមៗនោះ សមត្ថកិច្ច និងអាជ្ញាធរដែនដី បានពន្យល់ណែនាំអំពីទិដ្ឋភាពច្បាប់ និងផលប៉ះពាល់ធ្ងន់ធ្ងរដែលកើតចេញពីការធ្វើអាជីវកម្មរ៉ែ ដោយគ្មានការអនុញ្ញាត ព្រមទាំងបានធ្វើកិច្ចសន្យាជាមួយប្រជាពលរដ្ឋឱ្យរុះរើជម្រក សម្ភារៈ និងមធ្យោបាយធ្វើអាជីវកម្មទាំងអស់ចេញឱ្យអស់ជាប្រញាប់ ដើម្បីជៀសវាងការប្រឈមមុខតាមផ្លូវច្បាប់ ។
ប្រជាពលរដ្ឋនៅតំបន់នោះ បានលើកឡើងថា ពួកគាត់ធ្វើអាជីវកម្មនេះ លក្ខណៈគ្រួសារ ដើម្បីដោះស្រាយជីវភាពប្រចាំថ្ងៃប៉ុណ្ណោះ ដោយប្រើប្រាស់ត្រឹមម៉ាស៊ីនបាញ់ទឹកលើដីស្រទាប់លើ និងមិនបានប្រើប្រាស់សារធាតុគីមីគ្រោះថ្នាក់នោះទេ។ ពលរដ្ឋបានបន្តថា កាលពីសប្តាហ៍មុន អាជ្ញាធរបានចុះផ្សព្វផ្សាយណែនាំម្តងរួចមកហើយ ហើយពួកគាត់ភាគច្រើនបានរុះរើជាបណ្តើរៗ ប៉ុន្តែនៅសេសសល់ពលរដ្ឋមួយចំនួនតូច ដែលខ្វះខាតមធ្យោបាយដឹកជញ្ជូន ទើបមិនទាន់អាចជញ្ជូនសម្ភារចេញអស់ទាំងស្រុង ។
អាជ្ញាធរខេត្តក្រចេះ បានអំពាវនាវយ៉ាងទទូចដល់ប្រជាពលរដ្ឋទាំងអស់ឱ្យចូលរួមគោរពច្បាប់ឱ្យបានខ្ជាប់ខ្ជួន និងសហការជាមួយសមត្ថកិច្ចក្នុងការការពារ ថែរក្សាធនធានធម្មជាតិ និងសន្តិសុខសុវត្ថិភាពនៅក្នុងមូលដ្ឋានឱ្យបានល្អប្រសើរ ៕
ចែករំលែកព័តមាននេះ