លោកចោរចំណាយពេល៥ថ្ងៃ ស៊ីគ្រឿងក្នុងផ្ទះអស់៦ល្វែង ប៉េអឹមស្រាវជ្រាវចាប់ខ្លួនបាន៣នាក់
- បាត់ដំបង
ខេត្តបាត់ដំបង ៖ សំណង់ផ្ទះល្វែងចំនួន០៦ របស់ក្រុមហ៊ុន «ស៊ីន ឃីម» ដែលស្ថិតក្នុងភូមិអូរដាលើ ឃុំបឹងរាំង ស្រុកកំរៀង ត្រូវបានលោកចោរចំណាយពេល០៥ថ្ងៃ ធ្វើសកម្មភាពគាស់ទម្លុះទម្លាយចូលលួចស៊ីគ្រឿងក្នុងអស់គ្មានសល់ ប៉ុន្តែត្រូវបានកម្លាំងកងរាជអាវុធហត្ថស្រុកនេះ ធ្វើការស្រាវជ្រាវតានចាប់ខ្លួនជនដៃដល់ និងអ្នកទទួលផល «ចោរកម្ម»បានចំនួន០៣នាក់ជាបន្តបន្ទាប់ កាលពីវេលាម៉ោង១០ព្រឹកថ្ងៃទី២៧ កក្កដា បន្ទាប់ពីសមត្ថកិច្ចទទួលបណ្ដឹងពីបុគ្គលិកក្រុមហ៊ុននេះ ។
យោងតាមរបាយការណ៍របស់កងរាជអាវុធហត្ថបានឲ្យដឹងថា ក្រុមជនសង្ស័យបានធ្វើសកម្មភាពគាស់ទម្លុះទម្លាយផ្ទះល្វែងទាំង០៦ខាងលើនេះ តាំងពីថ្ងៃទី២២ កក្កដា រហូតដល់ព្រឹកថ្ងៃទី២៧ កក្កដា ទើបខាងក្រុមហ៊ុនបានដឹង និងដាក់ពាក្យបណ្ដឹងទៅកាន់បញ្ជាការមូលដ្ឋានកងរាជអាវុធហត្ថស្រុកកំរៀង ដើម្បីសុំជួយអន្តរាគមន៍ ។
បើតាមរបាយការណ៍ដែលស្រង់ពីបណ្ដឹងរបស់តំណាងក្រុមហ៊ុន គឺអ្នកស្រី វណ្ណ ស្រីពេជ្រ អាយុ៣៤ឆ្នាំបានឲ្យដឹងថា សម្ភារៈដែលត្រូវបាត់បង់ ដោយសារចោរលួចរួមមាន៖ ១-ម៉ាស៊ីត្រជាក់ចំនួន១៤គ្រឿង ២-ម៉ូទ័របូមទឹកចំនួន០២គ្រឿង ៣-ម៉ាស៊ីនទឹកក្ដៅចំនួន០៧គ្រឿង ៤-បង្អួចកញ្ចក់ចំនួន០៥វង់ ៥-វាំងននចំនួន០៦ផ្ទាំង ៦-ខ្សែភ្លើង កុងតាក់ និងហ្វ្រីភ្លើង ដែលរៀបនៅក្នុងផ្ទះទាំង០៦ល្វែង០២ជាន់ ត្រូវលោកចោរគាស់ កាត់ផ្ដាច់ប្រមូលយកទាំងអស់ ។ ពោល៖ សល់តែសម្បកផ្ទះល្វែង ។
ប្រធានមន្ទីរប្រឆាំងបទល្មើសព្រហ្មទណ្ឌ លោកសូ ឌី បានប្រាប់បន្ថែមថា ក្រោយមន្ត្រីជំនាញទទួលបណ្ដឹងពីតំណាងក្រុមហ៊ុនភ្លាមៗ កម្លាំងជំនាញបានធ្វើការស្រាវជ្រាវ តាមឃាត់ខ្លួនជនសង្ស័យបានចំនួន០៣នាក់ ក្នុងនោះ មានម្នាក់ជាជនដៃដល់ ធ្វើសកម្មភាព កាស់ទម្លុះទម្លាយផ្ទាល់ រីឯចំនួន០២នាក់ទៀត ជាអ្នកទទួលទិញផល «ចោរកម្ម» ប៉ុន្តែនៅមានម្នាក់ទៀត ដែលទើបនាំខ្លួនមកសួរនាំ គឺជាថៅកែអេតចាយដែលទទួលទិញ «ផលចោរកម្ម» ទាំងអស់នេះចុងក្រោយគេ ។
ជនសង្ស័យទាំង០៣នាក់ដែលឃាត់ខ្លួនបានដំបូង ក្រោយទទួលពាក្យបណ្ដឹងរួមមាន ៖ ១-ឈ្មោះ ប្រាជ្ញ គឹមសា ភេទប្រុស អាយុ៤១ឆ្នាំ ២-ឈ្មោះ សុង យ៉ន ភេទប្រុស អាយុ៤៦ឆ្នាំ និង៣-ឈ្មោះ ជា ម៉ៅ ភេទប្រុស អាយុ៤៦ឆ្នាំ ក្រុមជនសង្ស័យទាំង០៣នាក់នេះ គ្មានមុខរបរពិតប្រាកដទេ ពួកគេរស់នៅក្នុងភូមិ-ឃុំកើតហេតុខាងលើ ។
បើតាមមន្ត្រីជំនាញបានបញ្ជាក់ថា ក្រុមនេះ ត្រូវបានកម្លាំងជំនាញ ធ្វើការស្រាវជ្រាវ ឃាត់ខ្លួនបានជាបន្តបន្ទាប់ បន្ទាប់ពីទទួលបណ្ដឹងតំណាងក្រុមហ៊ុន «ស៊ីន ឃីម» គឺអ្នកស្រី វណ្ណ ស្រីពេជ្រ ។
ក្រោយពីត្រូវឃាត់ខ្លួន មន្ត្រីជំនាញដកហូតបានវត្ថុតាងមួយចំនួន ដូចជា៖ បំណែកម៉ាស៊ីនត្រជាក់ចំនួន០៦គ្រឿង, កង្ហាបឺតខ្យល់, កាមេរ៉ាសុវត្ថិភាព, វាំងននចំនួន០៦ផ្ទាំង, កន្ត្រៃចំនួន៤ ទួណឺវីស ពិលឆ្លុះ និងដង្កាប់ចំនួន០៤ (សម្ភារៈធ្វើសកម្មភាព) , ម៉ូទ័រម៉ាស៊ីនត្រជាក់ចំនួន០២ រួមទាំងខ្សែភ្លើង និងទុយោស្ពាន់ មួយចំនួនផង ។
លោក សី ឌី បានបញ្ជាក់ថា ផ្ទះល្វែងចំនួន០៦ ដែលត្រូវចោរគាស់ចូលលួចគ្រឿងក្នុងអស់គ្មានសល់នេះ ជារបស់ក្រុមហ៊ុន «ស៊ីន ឃីម» ។ កន្លងទៅ ក្រុមហ៊ុនបានជួលឲ្យអតិថិជនស្នាក់នៅ ប៉ុន្តែមួយរយៈចុងក្រោយនេះ អតិថិជនបានឈប់ជួលស្នាក់នៅ ហើយខាងក្រុមហ៊ុនបិទទ្វារទុកចោល ទើបចោរគាស់ទម្លុះទម្លាយចូលលួចគ្រឿងក្នុងបែបនេះ បើទោះជាមានអ្នកយាមជាប្រចាំក្ដី ។
ពាក់ព័ន្ធនឹងអំពើ «ចោរកម្ម» នេះ បើតាមលោក សូ ឌី បានបញ្ជាក់ដែរថា ដំបូងយើងបានឃាត់ខ្លួនជនសង្ស័យចំនួន០៣នាក់ ក្នុងនោះ មានម្នាក់ជាជនប្រព្រឹត្តផ្ទាល់ រីឯចំនួន០២នាក់ទៀត ជាអ្នកទទួលទិញផលចោរកមុ្មពីជនដៃដល់ផ្ទាល់ ។ ប៉ុន្តែក្រោយពីជន០២នាក់នោះបានសារភាព ដែលពួកខ្លួនយក «ផលចោរកម្ម» នោះទៅលក់បន្តឲ្យថៅកែទិញអេតចាយដ៏ធំមួយកន្លែងទៀត ទើបលោកមេបញ្ជាការខេត្តបញ្ជាឲ្យមន្ត្រីជំនាញ បាននាំខ្លួនលោកថៅកែអេតចាយនោះមកសួរនាំដែរ ។
លោកបានបញ្ជាក់ថា ពេលនេះ ថៅកែអេតចាយដ៏ធំនោះ មន្ត្រីជំនាញកំពុងសួរនាំតាមនីតិវិធី ។ ប៉ុន្តែលោក សូ ឌី មិនទាន់បង្ហាញអត្តសញ្ញាណលោកថៅកែអេតចាយ ដែលទទួលទិញផល «ចោរកម្ម» ចុងក្រោយនេះនៅឡើយទេ ៕
ចែករំលែកព័តមាននេះ