រាជធានីភ្នំពេញ ៖ រាជរដ្ឋាភិបាល ដែលមានក្រសួងការងារ និងបណ្ដុះបណ្ដាលវិជ្ជាជីវៈជាសេនាធិកា បានកំណត់យន្តការជាក់លាក់នៅក្នុងកម្មវិធីធ្វើតេស្តទទួលស្គាល់ជំនាញពីមុន (RPL) ដើម្បីឱ្យការវាយតម្លៃប្រកបដោយយុត្តិធម៌ សុក្រឹតភាព និងស្របតាមស្ដង់ដាការងារបច្ចុប្បន្ន តាមរយៈការប្រមូលភស្តុតាងពីការសាកល្បងសមត្ថភាព, ការឆ្លើយសំណួរផ្ទាល់មាត់ និងការវាយតម្លៃលើការអនុវត្តជាក់ស្ដែងដោយជោគជ័យ ។
លោក ស៊ុន មេសា អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈបានថ្លែងថា គុណភាពនៃការវាយតម្លៃរបស់ RPL គឺអាចជឿជាក់បាន ដោយធានាទៅលើគុណភាព សុក្រឹតភាព និងស្របតាមស្ដង់ដាការងារសព្វថ្ងៃនេះ ព្រោះអ្នកវាយតម្លៃ និងផ្ដល់ពិន្ទុ គឺត្រូវឆ្លងកាត់ការបណ្តុះបណ្តាលលើវិធីសាស្ត្រវាយតម្លៃផ្អែកលើសមត្ថភាព និងចុះបញ្ជីទទួលស្គាល់ពីស្ថាបនជំនាញ ដើម្បីបញ្ជាក់ថា ជាអ្នកវាយតម្លៃផ្អែកលើសមត្ថភាព មានលក្ខណសម្បត្តិគ្រប់គ្រាន់នៅក្នុងមុខជំនាញនីមួយៗ ។
លោកបន្តថា ៖ «អ្នកវាយតម្លៃសមត្ថភាពបេក្ខជនទាំងអស់ គឺត្រូវបានជ្រើសរើសយ៉ាងម៉ត់ចត់ពីវិស័យឯកជន ដែលបានចុះបញ្ជីជាមួយក្រសួងត្រឹមត្រូវ មានវិជ្ជាជីវៈ គុណភាព និងស្ដង់ដាការងារខ្ពស់ ។ ពួកគាត់ឆ្លងកាត់ការបណ្ដុះបណ្ដាលយ៉ាងច្បាស់លាស់ ហើយត្រូវតែប្រកាន់ខ្ជាប់នូវក្រមប្រតិបត្តិ ដែលបានចែងក្នុងលក្ខណៈវិនិច្ឆ័យក្នុងការចុះបញ្ជីទទួលស្គាល់អ្នកវាយតម្លៃផ្អែកលើសមត្ថភាព» ។
ដើម្បីធានាបាននូវគុណភាពរបស់បេក្ខជន លោក ហាង ប៊ុនហេង អ្នកវាយតម្លៃមកពីវិស័យឯកជនបានសង្កត់ធ្ងន់ទៅលើសមត្ថភាពបេក្ខជន ត្រូវតែមានគ្រប់គ្រាន់ ដើម្បីអាចទទួលបានវិញ្ញាបនបត្របញ្ជាក់ជំនាញ ព្រោះអ្នកវាយតម្លៃនឹងពិនិត្យយ៉ាងហ្មត់ចត់បំផុតទៅលើការងាររបស់បេក្ខជន រាប់ចាប់ពីដំណាក់កាលដំបូងរហូតដល់ពេលបញ្ចប់ការងារ ។
ក្នុងន័យនេះ បេក្ខជនធ្វើតេស្ដជាប់ ឬធ្លាក់អាស្រ័យលើសមត្ថភាពពិតប្រាកដ គ្មានការយោគយល់ គ្មានការសូកប៉ាន់ និងគ្មានបក្ខពួកនោះទេ។ លោក ប៊ុនហេងថា៖«ការដាក់ពិន្ទុរបស់យើង គឺផ្អែកលើកត្តា ៥ចំណុច គឺពួកគាត់ត្រូវតែយល់ដឹងពីការប្រើប្រាស់សម្ភារៈសុវត្ថិភាព, ការយល់ដឹងពីសម្ភារៈដែលត្រូវប្រើប្រាស់ពាក់ព័ន្ធនឹងការងារ ឬមុខជំនាញឱ្យបានច្បាស់, ចំណេះដឹងក្នុងអំឡុងពេលធ្វើតេស្ត ឬធ្វើការងារ, ពិនិត្យមើលលទ្ធផលការងាររបស់ខ្លួន និងចំណុចចុងក្រោយ គឺការសម្អាតសម្ភារៈ និងទីតាំងរបស់ពួកគាត់ធ្វើការងារ» ។
បើតាមលោក ស៊ុន មេសា លើកឡើងថា អ្នកវាយតម្លៃទាំងអស់ ត្រូវទទួលបានការបណ្តុះបណ្តាលលើវិធីសាស្ត្រវាយតម្លៃផ្អែកលើសមត្ថភាព និងបានវាយតម្លៃសមត្ថភាពរួចហើយ ត្រូវតែចូលរួមអនុវត្តដំណើរការវាយតម្លៃផ្អែកលើសមត្ថភាពផ្ទាល់បានចំនួនពីរដងសិន មុននឹងត្រូវបានចុះបញ្ជីទទួលស្គាល់ជាអ្នកវាយតម្លៃផ្អែកលើសមត្ថភាពអាជីព (Professional Assessor) ។
បន្ថែមលើនេះ លោកបានស្នើសុំឱ្យវិស័យឯកជនចូលរួមគាំទ្រ និងជួយចាត់បញ្ជូនវិស្វករសំណង់ស៊ីវិលរបស់ខ្លួន មកចូលរួមវគ្គបណ្តុះបណ្តាលស្តីពីវិធីសាស្ដ្រវាយតម្លៃទទួលស្គាល់ជំនាញពីមុន ដើម្បីក្លាយជាអ្នកវាយតម្លៃជំនាញ និងផ្តល់ឱកាសជូនវិស្វករសំណង់ស៊ីវិលរបស់ខ្លួន មកចូលរួមជាអ្នកវាយតម្លៃទទួលស្គាល់ជំនាញពីមុន ។
យោងតាមអនុសាសន៍ណែនាំរបស់សម្តេចមហាបវរធិបតី ក៏ដូចជាលើកទឹកចិត្តដល់អតីតពលករខ្មែរមកពីប្រទេសថៃឱ្យទទួលបានការទទួលស្គាល់ជំនាញជាផ្លូវការ ក្រសួងការងារ និងបណ្តុះបណ្តាលវិជ្ជាជីវៈ បានរៀបចំការវាយតម្លៃទទួលស្គាល់ជំនាញពីមុន ដោយឥតគិតថ្លៃលើ ៨មុខជំនាញក្នុងវិស័យសំណង់ ចាប់ពីខែមេសា ឆ្នាំ ២០២៦ មក ៕ អត្ថបទសហការ
ចែករំលែកព័តមាននេះ