សម្តេចធិបតី ហ៊ុន ម៉ាណែត ៖ លើកទី១ក្នុងប្រវត្តិសាស្ត្ររបស់កម្ពុជា ក្រោយសង្គ្រាមពលរដ្ឋមានប័ណ្ណកម្មសិទ្ធិដីធ្លីជារបស់ខ្លួន
- សៀមរាប
ខេត្តសៀមរាប ៖ សម្តេចធិបតី ហ៊ុន ម៉ាណែត បានលើកឡើងថា នៅក្នុងអាណត្តិទី៧ក្រោមការដឹកនាំផ្ទាល់របស់សម្តេចនឹងខិតខំប្រឹងប្រែងរៀបចំប័ណ្ណកម្មសិទ្ធិដីធ្លីជូនប្រជាពលរដ្ឋនៅទូទាំងប្រទេស ដែលនេះ គឺជាលើកទី១ក្នុងប្រវត្តិសាស្ត្រ ក្រោយសង្គ្រាមដែលពលរដ្ឋមានប័ណ្ណកម្មសិទ្ធិដីធ្លីជាអចលនទ្រព្យផ្ទាល់ខ្លួន ។
ក្នុងពិធីប្រគល់សញ្ញាបត្រជូនដល់និស្សិតសាកលវិទ្យាល័យ South-East Asia នៅសណ្ឋាគារសុខា ខេត្តសៀមរាប ថ្ងៃទី២១ ខែកក្កដា ឆ្នាំ២០២៦ សម្តេចធិបតី ហ៊ុន ម៉ាណែត មានប្រសាសន៍អំពីការប្តេជ្ញាចែកប័ណ្ណកម្មសិទ្ធិដីធ្លីជូនប្រជាពលរដ្ឋ ខណៈនៅថ្ងៃទី២៩ កក្កដា ខាងមុខ សម្តេចនឹងអញ្ជើញប្រគល់ប័ណ្ណកម្មសិទ្ធិដីធ្លីជូនប្រជាពលរដ្ឋនៅខេត្តកណ្តាល ដើម្បីបានប្រើប្រាស់ជាផ្លួវគ្រប់ៗគ្នា ។ ដូច្នេះ គ្រប់មន្ត្រីពាក់ព័ន្ធនឹងរួមគ្នាប្រឹងប្រែងរៀបចំប័ណ្ណកម្មសិទ្ធិដីធ្លីជូនប្រជាពលរដ្ឋ។
សម្តេចធិបតីនាយករដ្ឋមន្ត្រីបានបញ្ជាក់ថា៖«ប័ណ្ណដីយើងនឹងខិតខំក្នុងអាណត្តិនេះ ឱ្យទូទាំងប្រទេសបានប័ណ្ណដីទៅប្រជាពលរដ្ឋ ។ ខ្ញុំគិតថា នេះជាលើកទី១ ក្នុងប្រវត្តិសាស្ត្រកម្ពុជាដែលគ្រប់គ្នាមានប័ណ្ណឯកជនជាប័ណ្ណអចលនទ្រព្យរបស់ខ្លួន» ។
សម្តេចធិបតីក៏បានរំលឹកថា មុនសង្គ្រាមប្រជាពលរដ្ឋបានបង្កបង្កើនផលលើដីស្រែ ប៉ុន្តែកម្មសិទ្ធិជារបស់រដ្ឋ ។ ក្រោយមកទៀត ក៏បានចែកដីធ្លីឱ្យប្រជាពលរដ្ឋបានខ្លះៗផងដែរនៅទីក្រុង និងទីប្រជុំជន ប៉ុន្តែតំបន់ជនបទដាច់ស្រយាលមិនដែលបានចែកឱ្យពលរដ្ឋអាស្រ័យផលទេ ។
ជាមួយគ្នានោះដែរ សម្តេចធិបតីក៏បានរំលឹកឡើងវិញទៀតថា ក្រោយពីរបបសម័យប៉ុលពត ក៏បានរៀបចំឡើងវិញដោយសារផល និងទ្រព្យរបស់ប្រជាពលរដ្ឋដែលជាកម្មសិទ្ធិឯកជននេះ មានសារៈសំខាន់ក្នុងការជួយលើកកម្ពស់ និងភាពបត់បែននៃការប្រើប្រាស់។
សូមបញ្ជាក់ថា គិតត្រឹមដើមឆ្នាំ២០២៦ ក្រសួងរៀបចំដែនដីនគរូបនីយកម្ម និងសំណង់ បានវាស់វែង និងចេញប័ណ្ណកម្មសិទ្ធិ (វិញ្ញាបនបត្រសម្គាល់អចលនវត្ថុ) ជូនប្រជាពលរដ្ឋបានជិត៩លានប័ណ្ណ ដោយក្នុងនោះ រួមបញ្ចូលទាំងប័ណ្ណកម្មសិទ្ធិដីឯកជន ដីសហគមន៍ជនជាតិដើមភាគតិច និងដីឡូត៍ផ្សេងៗ នៅទូទាំងប្រទេសផងដែរ ៕
ចែករំលែកព័តមាននេះ