ទីក្រុងហាណូយ៖ រថយន្តបឺសមួយគ្រឿងដែលជាប្រភេទរថយន្តមានគ្រែសម្រាប់គេងនៅពេលយប់កំពុងបើកបរនៅផ្លូវជាតិលេខ១នៃប្រទេសវៀតណាមសុខៗស្រាប់តែឆេះយ៉ាងសន្ធោសន្ធៅមួយរំពេចកាលពីពេលរំលងអធ្រាត្រឆ្លងចូលព្រឹកថ្ងៃអង្គារនេះបណ្ដាលឱ្យស្លាប់មនុស្សយ៉ាងតិច៧នាក់ និងរបួស៥នាក់។ ហេតុការណ៍នេះកើតឡើងនៅខេត្តដូនណាយ (Dong Nai) យោងតាមអាជ្ញាធរមូលដ្ឋាន រថយន្ត២៤កៅអីនោះបើកកាត់ឃុំហុងធីញ ស្ថិតនៅចម្ងាយ៣០គីឡូម៉ែត្រពីទីក្រុងបៀនហោ នៃខេត្តដូនណាយ នៅម៉ោង២:៣០ទៀបភ្លឺ។
រំពេចនោះ រថយន្តនេះស្រាប់តែរេចង្កូត និងបើកទៅបុកដីទួលនៅខាងស្ដាំដៃជាប់មាត់ផ្លូវ។ បន្ទាប់ពីមានការប៉ះទង្គិចនោះមក រថយន្តបឺសនេះក៏បន្តបើកទៅមុខទៀត ហើយបើកបុកដីទួលមួយទៀតទើបឈប់ស្ងៀម។ មិនយូរប៉ុន្មាន អណ្ដាតភ្លើងក៏ចាប់ផ្ដើមឆាបឆេះពីខាងក្រោមឡាន ហើយក៏ហ៊ុមព័ទ្ធឡាននេះទាំងមូលតែម្ដង។ តៃកុងឡានឈ្មោះចាន់ថាញ់ហាយ វ័យ៤១ឆ្នាំ បានស្រែកប្រាប់អ្នកដំណើរទាំងអស់ឱ្យប្រញាប់ជម្លៀសខ្លួនចេញជាបន្ទាន់។ ប៉ុន្តែអគ្គិភ័យនេះឆាបឆេះយ៉ាងឆាប់រហ័សពេក។
ហេតុនេះ អ្នកដំណើរភាគច្រើនមិនអាចរត់ចេញមកខាងក្រៅទាន់ពេលវេលាបានឡើយ។ ភ្នាក់ងារអគ្គិភ័យប្រចាំខេត្តដូនណាយបានបញ្ជូនកម្លាំង និងឡានទឹក២គ្រឿងទៅកន្លែងកើតហេតុ។ ពួកគេអាចចាត់ការពន្លត់ភ្លើងនេះនៅក្នុងរយៈពេល៣០នាទី។ បន្ទាប់ពីឆ្លងកាត់ការត្រួតពិនិត្យផ្ទៃខាងក្នុងនៃរថយន្តបឺសដែលឆេះខ្លោចអស់ទៅហើយនោះ អាជ្ញាធរបានប្រមូលសាកសពជនរងគ្រោះបាន៧នាក់។ អ្នករបួស៥នាក់ត្រូវគេបញ្ជូនទៅសង្គ្រោះបន្ទាន់នៅមន្ទីរពេទ្យធំថុងញ៉ាត់ (Thong Nhat)។
ប៉ុន្តែនៅក្នុងចំណោមនោះមានម្នាក់របួសស្រាល គេក៏អនុញ្ញាតឱ្យចេញពីពេទ្យវិញភ្លាមៗ។ ក្រសួងសន្តិសុខសាធារណៈបានសរសេររៀបរាប់នៅក្នុងសេចក្ដីប្រកាសថារថយន្តបឺសនោះធ្វើដំណើរពីខេត្តឡាមដុង (Lam Dong) ឆ្ពោះទៅទីក្រុងហូជីមិញ ហើយក៏ជួបនឹងគ្រោះថ្នាក់តែម្ដង។ ដោយសារអាការៈភ័យស្លន់ស្លោ និងការឆាបឆេះយ៉ាងឆាប់រហ័សពេក មនុស្សនៅក្នុងនោះមិនដឹងត្រូវចេញតាមច្រកណាទេ។ សមត្ថកិច្ចចាប់ផ្ដើមបើកការស៊ើបអង្កេតទៅលើសំណុំរឿងនេះហើយដើម្បីចង់ដឹងថាតើហេតុការណ៍ឆេះយ៉ាងសន្ធោសន្ធៅនេះបណ្ដាលមកពីមូលហេតុអ្វីពិតប្រាកដ៕ ប្រភព៖ Vietnam Express និង Reuters
ចែករំលែកព័តមាននេះ