ខេត្តបន្ទាយមានជ័យ ៖ នៅថ្ងៃទី១៧ ខែកក្កដា ឆ្នាំ២០២៦ កម្លាំងមូលដ្ឋានកងរាជអាវុធហត្ថក្រុងសិរីសោភ័ណ ដឹកនាំដោយលោកវរសេនីយ៍ត្រី សុខ ឡេង មេបញ្ជាការមូលដ្ឋានកងរាជអាវុធហត្ថក្រុងសិរីសោភ័ណ បានចុះល្បាតរក្សាសន្តិសុខ ទប់ស្កាត់ និងបង្ក្រាបទល្មើសផ្សេងៗ ដែលកើតមានឡើងនៅក្នុងភូមិសាស្ត្រក្រុង លុះដល់វេលាម៉ោង១៥ និង៣០នាទី ថ្ងៃដដែល កម្លាំងជំនាញមូលដ្ឋានកងរាជអាវុធហត្ថក្រុងសិរីសោភ័ណ បានទទួលព័ត៌មានថា ក្រុមដែលជាមុខសញ្ញាប្រព្រឹត្តបទល្មើស នៅក្នុងភូមិសាស្ត្រក្រុងសិរីសោភ័ណ និងភូមិសាស្ត្រក្រុងប៉ោយប៉ែត បានមកសំងំលាក់ខ្លួននៅក្នុងបន្ទប់ជួលមួយកន្លែង ដែលមានទីតាំងស្ថិតក្នុង ភូមិសូភី សង្កាត់កំពង់ស្វាយ ក្រុងសិរីសោភ័ណ និងនៅក្នុងរោងចាំចំការមួយកន្លែង ស្ថិតក្នុងភូមិពង្រ សង្កាត់កំពង់ស្វាយ ក្រុងសិរីសោភ័ណ។ ភ្លាមៗនោះលោកវរសេនីយ៍ត្រី សុខ ឡេង មេបញ្ជាការមូលដ្ឋានកងរាជអាវុធហត្ថក្រុងសិរីសោភ័ណ ចុះប្រតិបត្តិការបង្ក្រាប និងឃាត់ខ្លួនជនសង្ស័យជាបន្តបន្ទាប់សរុបចំនួន១១នាក់(ក្នុងនោះមានស្រីចំនួន០៣នាក់) ។
ជនសង្ស័យទាំង១១នាក់ រួមមាន ៖ ១.ឈ្មោះ យ៉ន ប៊ុនថាយ (ថៃ) ភេទប្រុស អាយុ១៨ឆ្នាំ, ២.ឈ្មោះជួន ទិ ភេទប្រុសអាយុ២៦ឆ្នាំ,៣.ឈ្មោះវឿន ដាវិត ភេទប្រុស អាយុ១៧ឆ្នាំ,៤.ឈ្មោះហួត គីមហុង ភេទប្រុស អាយុ១៥ឆ្នាំ, ៥.ឈ្មោះ ប៉ូច សុធី ភេទប្រុស អាយុ២៤ឆ្នាំ,៦.ឈ្មោះ ជូ ឈិនឡុង ភេទប្រុស អាយុ២២ឆ្នាំ, ៧.ឈ្មោះ ហួ លីហួត ភេទប្រុស អាយុ២៣ឆ្នាំ, ៨.ឈ្មោះ យ៉េត រ៉ាយុទ្ធ ភេទប្រុស អាយុ១៦ឆ្នាំ, ៩.ឈ្មោះ សូត្រ សុក្រហៀង ភេទស្រី អាយុ១៥ឆ្នាំ, ១០.ឈ្មោះផល រចនា (លីណា) ភេទស្រី អាយុ១៤ឆ្នាំ, ១១.ឈ្មោះធី នីតា ភេទស្រី អាយុ១៥ឆ្នាំ ព្រមទាំងដកហូតវត្ថុតាង ១.កាំបិតកែច្នៃដងឈើស្រោបជ័រខ្មៅ ប្រវែង៦១សង់ទីម៉ែត្រ ចំនួន០១ដើម, ២.កាំបិតកែច្នៃដងដែកប្រវែង៩៥សង់ទីម៉ែត្រ ចំនួន០១ដើម, ៣.កាំបិតកែច្នៃដងដែក ប្រវែង១៣៩សង់ទីម៉ែត្រ ចំនួន០១ដើម, ៤.កាំបិតកែច្នៃដងដែក ប្រវែង១៥៦សង់ទីម៉ែត្រ ចំនួន០១ដើម, ៥.ឧបករណ៍សម្រាប់ប្រើប្រាស់គ្រឿងញៀនមួយចំនួន ហើយនាំមកមូលដ្ឋានកងរាជអាវុធហត្ថក្រុងដើម្បីសួរនាំតាមនីតិវិធី ព្រមទាំងបានធ្វើតេស្តទឹកនោមរករសារធាតុញៀនជាលទ្ធផលវិជ្ជមាន (+) ទាំងអស់។
លោកវរសេនីយ៍ត្រី សុខ ឡេង មេបញ្ជាការមូលដ្ឋានកងរាជអាវុធហត្ថក្រុង បានឱ្យដឹងថា ក្រោយឃាត់ខ្លួននិងសួរនាំរួច ពិនិត្យឃើញមានភាពស៊ីសង្វាក់ និងមានតម្រុយពិរុទ្ធភាព នៃបទល្មើសពាក់ព័ន្ធករណីសន្និធិអាវុធសម្រាប់ប្រហារផ្សេងៗ និងប្រើប្រាស់ដោយខុសច្បាប់នូវសារធាតុញៀន។ ដោយឡែក ជនសង្ស័យឈ្មោះ យ៉ន ប៊ុនថាយ ហៅក្រៅថៃ ជាមុខសញ្ញាសកម្ម ក្នុងអំពើលួចស្ថានទម្ងន់ទោស មានបក្ខពួកប្រហែល៥០ទៅ៦០នាក់ នៅក្នុងក្រុងប៉ោយប៉ែត ដែលជាក្រុមសកម្មក្នុងការកាប់យកម៉ូតូនៅក្នុងភូមិសាស្ត្រក្រុងប៉ោយប៉ែត។ ដោយផ្អែកលើចម្លើយសារភាព និងមានវត្ថុតាងជាក់ស្តែង កម្លាំងមូលដ្ឋានកងរាជអាវុធហត្ថក្រុង កសាងសំណុំរឿងបញ្ជូនមកកាន់បញ្ជាការដ្ឋានកងរាជអាវុធហត្ថខេត្ត ចាត់ការបន្តតាមនីតិវិធី ។
លោកវរសេនីយ៍ទោ ព្រហ្ម ថេង ប្រធានមន្ទីរស្រាវជ្រាវនិងបង្ក្រាបបទល្មើសបានឱ្យដឹងថា ការបង្ក្រាបករណីខាងលើនេះ ក៏ទទួលបានការអនុញ្ញាតពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត និងមានការសម្របសម្រួលនីតិវិធីពីលោក កើត វណ្ណារ៉េត ព្រះរាជអាជ្ញា អមសាលាដំបូងខេត្តផងដែរ ។
បច្ចុប្បន្ន ជនសង្ស័យត្រូវបានកម្លាំងការិយាល័យព្រហ្មទណ្ឌ កងរាជអាវុធហត្ថខេត្តបញ្ជូនទៅសាលាដំបូងខេត្តហើយ នៅព្រឹកថ្ងៃចន្ទ ទី២០ ខែកក្កដា ឆ្នាំ២០២៦នេះ ដើម្បីអនុវត្តតាមនីតិវិធី ៕
ចែករំលែកព័តមាននេះ