កម្មករសំណង់រាប់រយនាក់នាំគ្នាបិទផ្លូវតវ៉ារឿងថៅកែសំណង់មិនបើកប្រាក់ខែ
- ស្វាយរៀង
ខេត្តស្វាយរៀង ៖ មានករណីក្រុមកម្មករសំណង់រាប់រយនាក់បានលើកគ្នាបិទផ្លូវ តវ៉ារឿងថៅកែសំណង់មិនបើកប្រាក់ឈ្នួលឲ្យបង្កឲ្យកកស្ទះផ្លូវមិនអាចធ្វើចរាចរណ៍បានធ្វើឲ្យប៉ះពាល់ដល់កម្មករកម្មការនីរោងចក្រខកដំណើរមិនអាចទៅចូលធ្វើការ ដោយសារក្រុមបាតុករនៃកម្មករសំណង់នាំគ្នាបិទផ្លូវ ។ ករណីកម្មករសំណង់បិទផ្លូវនេះកើតឡើងនៅវេលាម៉ោង ៧ និង ១០នាទីព្រឹកថ្ងៃទី ១៧ កក្កដា ២០២៦ នៅផ្លូវខាងមុខតំបន់សេដ្ឋកិច្ចពិសេសតាយសេង ៣ ស្ថិតនៅភូមិ ព្រៃគគីរ ឃុំព្រៃគគីរ ស្រុកចន្រា្ទ ខេត្តស្វាយរៀង ។
ការបិទផ្លូវនេះបង្កឲ្យកកស្ទះចរចរណ៍អស់រយៈពេលជាង ០២ម៉ោងទើបក្រុមការងារនៃមន្ទីរការងារបណ្តុះបណ្តាលវិជ្ជាជីវៈខេត្តសហការជាមួយអាជ្ញាធរស្រុកចន្ទ្រាចុះធ្វើការសម្របសម្រួលជាមួយកម្មករសំណង់ឲ្យបើកផ្លូវ និងដោះស្រាយជាមួយថៅកែសំណង់ជាលទ្ធផលក្រុមកម្មករសំណង់បានយល់ព្រមបើកផ្លូវវិញ ។
លោក អ៊ូ សាខឿន ប្រធានមន្ទីរការងារ និងបណ្តុះបណ្តាលវិជ្ជាជីវៈខេត្តស្វាយរៀង បានឲ្យដឹងថា កម្មករសំណង់បាតុកម្មបិទផ្លូវនេះគឺទាមទាឲ្យថៅកែសំណង់ ដែលសាងសង់អគាររោងចក្រនៅក្នុងតំបន់សេដ្ឋកិច្ចពិសេសតាយសេង ៣ មិនបើកបើកប្រាក់ខែឲ្យកម្មករ (ប្រាក់ឈ្នួល) ហួសកាលកំណត់ទើបកម្មករសំណង់ទាំងអស់លើកគ្នាតវ៉ា ដោយបិទផ្លូវបង្កឲ្យកកស្ទះចរាចរណ៍ជាង ២ម៉ោង ។លោកបន្តទៀតថា ក្រោយមកក្រុមការងារចុះទៅអន្តរាគមន៍សម្របសម្រួល និងដោះស្រាយ ជាលទ្ធផលបានដោះស្រាយបញ្ចប់ដល់កិច្ចព្រមព្រៀងនៅវេលាម៉ោង ៩ និង ០០នាទីព្រឹកថៅកែយល់ព្រមបើកប្រាក់ខែឲ្យកម្មករសំណង់ហើយកម្មករក៏បានចូលធ្វើការវិញធម្មតា ៕
ចែករំលែកព័តមាននេះ